Read Chang Naga 1 JOHAN 2 Bible Online

1 JOHAN 2 - Chang Naga bible

1 JOHAN 2

¹Kü shousi shuong, kanei shabü ashontila shanga ngei ho kan to doda. Müt atei shabü shona tegükei Bou to sen shanga sukujakulabü saopobü müt che kia. Kho Jisu Khrista.

²Hao sen shanga shabü angbou ki; seneibü shabü ong aying, lausikei kaodak khümboeibü shabü shanga ki.

³Senei hao ngühkhüm jungeisije senei hao ngeakei dogo chong- chingla thükkei.

⁴Aoei “Ngei hao ngeakei,” dogo lauan hao ngühkhüm ajungeida, hao kho yepeibü hoba ngühmai kho hao to aki;

⁵lausikei Mühghaü ngüha lebou müteibü langkeia ong Mühghaü to sanoubü pentisoutida. Khoei ong sen Mühghaüeibü dogo ngeda.

⁶Müt atei ngo Mühghaü to kida dogo laualongaje haokei Jisu Khrista lai kikei kho tegü kijan.

⁷Sanoubü thangbou shuong, ngei kan jungto ngühkhüm haanbü che doda aying, lausikei khangla kanei ai ngühkhüm hapbei kho doda. Hangbü ngühkhüm kho kanei ditbü ngühlang kho ki.

⁸Ngühkhüm haanbü che ngei kan jungto doda. Kho ngühmai Khrista to hoba kan to hapda; aishanga nakthüh dankhümda hoba tükdebü ngesakbü kho hauakei.

⁹Aoei hao ngesakbüa kia dogo lauda hoba jembü jaisina mangsenda, hao toukei nakthühbüa kia.

¹⁰Aoei jembü jaisina sanouda hao ngesakbüa ki, hoba hao to phaiyetlabü ai aki.

¹¹Lausikei aoei jembü jaisina mangsenda hao nakthüha ki hoba nakthüh phanga paida; hao lae haudaje haoei angekei, aieilausi nakthühei haoeibü nyek thutia.

¹²Ngei kan to shousi shuong dogo doda, aieilausi hao nyen laüa kaneibü shabü apbua.

¹³Ngei kan to bousi shuong dogo doda, aieilausi kanei amaibou kho thükena.

¹⁴Ngei kan to shousi shuong dogo doa, aieilausi kanei khangla thama ao kikei hao ngeakei. Ngei kan to heshou shuong dogo doa, aieilausi kan hau kia hoba Mühghaü ngüh kan to kia, hoba kanei amaibou kho thükena.

¹⁵Kaodak ayingsi kaodaka kibü peitoleito tesanou. Atei kaodak sanoualonga hao to Bou to sanoubü aki;

¹⁶aishanga kaodaka kibü phe dühbü, nyekei dühbü, hoba kibükeibü shanga yonglam lilibü pendou Bou ka aying, lausikei kaodak ka louda.

¹⁷Kaodak hoba khoei müteibü nyekdüh maangdüh senyüh shemtila kubü pendou dankhümda; lausikei aoei Mühghaü maangangbü kümda hao ponpen thon akiko kilabü.

¹⁸Nashousi shuong, tou ho thonbü angh ki. Kanei Khrista Khulimbou louada dogo dida, hoba maimaitham Khrista khulimbü juong longan apa. Khoei senei thonbü angh kho lousüha dogo ngeda.

¹⁹Haoen sen ka satkei lausikei haoen seneibü aying; haoen seneibü tegüje haoen sen yoa ong khüpbhoulabü. Haoen satan apbü khoei haoen aokei seneibü aying dogo shangashattida.

²⁰Lausikei Saopobüei makenko pienbü kho kan ki, hoba kan pendouei ngühmai ngebü ki.

²¹Ngei kan to kanei ngühmai ange dogo dokei aying, lausikei kanei kho ngeakei, hoba ngühmai aikei yepeibü alongda dogo kanei ngebü shanga dokei.

²²Jisu kho Khrista yingkei dogo atheletbü to liman yepeibü ao ki? Kheibü müt Khrista khulimbou ki; haoei Bou si Shou ham atheletda.

²³Hobaje aoei Shou atheletda hao Boueikei konga; aoei Shou sungletda haoei Boukei ki.

²⁴Kanje khangla kanei ai ditkei kho kan to thüngtiashi. Kanei khangla ai ditkei khonei kialongaje, kanei Shou hoba Bou to kei thangjambüa kilabü.

²⁵Ho haoei sen to thekubü thon akibü langkei ki.

²⁶Aoyouei kan ayinglam to leilangmang sühda, haoen shangabü ngei habü ngüh kan to doa.

²⁷Hao ka kanei ai naangenko pienbü hapbei, kho kan to kisije, aoeikei kan la lenla akhamda. Haoei kan naangenko pienbü khoei kan la ajanjan pendou shangabü lenda; hoba haoeibü lenbü kho ngühmai, hoba ho yepeibü aying. Hibü haoei kan to lenbü tegü hao yoa thangjambo kishi.

²⁸Hobaje tou, nashousi shuong, hao tang khitjinei sen maang khailabü, hoba hao loujinei hao thedanga ihimoula shanga hao to kishi.

²⁹Kanei hao saopobü ki dogo ngesije, aoei ong janbü kümda hao kho Mühghaü ka bukbü ki dogo kanei ngekei.