Read Chang Naga 1 JOHAN 3 Bible Online

1 JOHAN 3 - Chang Naga bible

1 JOHAN 3

¹Sen to Mühghaü shousi shuong dogo ngalabü lele Bouei sanou lenenbü kho maangpanglabü latetche. Hobaje sen hao shousi shuong ki! Kaodakei sen angebü tetlabü kho kaodakei hao ange.

²Sanoubü jenabou shuong, sen mudonga Mühghaü shousi shuong ki, lausikei sen ailai yinglabü kho tang mokhit. Senei ngeakei, ladang hao tang khitlaje sen hao maimai kilabü, aishanga hao ailai ong ki, kho tegü senei hao haplabü.

³Aoyouei Khrista to kho maanglem ki, Khrista lai hinseian ki haokei kho tegü jembü lolo saüenda.

⁴Aoyouei shabü shonda ngühkhüm lulimda; aishanga shabü kho ngühkhüm tubou ki.

⁵Shabü künlangla hao tang khitkei dogo kanei ngeakei, hoba hao to shabü aki.

⁶Ao hao to kida haoei shabü ashonda; aoei shabü shonda haoei Bou ühüpbei, ayingsi haoei hao angekei.

⁷Nashousi shuong, kan aolakei ayinglam to teleilangti. Aoei sao- pobü jungeida hao kho saopobü;

⁸lausikei aoei shabü jungeida hao shabü mühghaüeibü, aishanga shabü mühghaüei khanglathama shabü shonko loukei. Shabü mühghaü kümsilei mautilabü nyek- chüha Mühghaü Shou tang khitkei.

⁹Mühghaü ka bukbü shou aoeikei shabü ajungeida, aishanga hao to Mühghaü haang ki; haoei shabü langkei kila athük, aieilausi hao Mühghaü ka bukbü shou ki.

¹⁰Mühghaü shousi shuong si shabü mühghaü shousi shuong hoei bangnyinda: aoyouei saopobü ajungeida ayingsi haoeibü jaisinasi shuong to asanouda, haoen Mühghaüeibü aying.

¹¹Aishanga senei jenabou si jenabou sanouyojan dogo laubü ngühlang kanei khanglathama dida.

¹²Kain amaiboueibü kiteikei hoba haoei haona haitikei, hao tegü ayingjan. Haoei aila haitikei? Aieilausi haoeibü kümsilei shuong kho amaibü hoba haonaeibü kümsilei shuong kho saopobü kiteikei.

¹³Jaisinasi shuong, kaodakei kan mangsenalonga, maang tepang.

¹⁴Sen haibü ka langkeishang to khada dogo senei ngeakei, aieilausi senei seneibü jaisinasi shuong to sanouda. Aoei asanouda hao haibüa kia.

¹⁵Aoei haoeibü jaisina to mangsenda hao müt haitibou ki, hoba müt haitibü aokei hao to thon akibü langkei aki dogo kanei ngeakei.

¹⁶Senei sanou ngea, aieilausi Khristaei sen shanga hao langkei phoyokei. Seneikei seneibü jaisinasi shuong shanga seneibü langkei apyojan.

¹⁷Ao mütei nyaksinam kian haojai haonaje khambokei hapda lausikei ik asengda, hao to Mühghaü sanou lai küman kila?

¹⁸Nashousi shuong, seneibü sanou kho ngühkongje ayingjan; kho kümsilei hoba ngühmai yingjan.

¹⁹Khoei ong sen ngühmaieibü ki dogo lenenlabü, hoba ainei ong seneibü maangponei sen yuktida kheijinei sen lolo hao thedanga han shangashattida; aishanga Mühghaü kho seneibü maangpon to yaangbou hoba haoei pendou ngekei.

²¹Sanoubü jenabou shuong, seneibü maangponei sen ayukti longa sen Mühghaü jungto maangyaangko loula thükakei,

²²hoba hao ka senei hibü pendou haplabü, aieilausi senei hao ngühkhüm jungeida hoba hao maanghaibü kümda.

²³Haoei sen la kubü ngühkhüm: hao Shou Jisu Khrista to mailemlabü hoba haoei sen la sakkubü tegü jenabou si jenabou sanouyolabü kho ki.

²⁴Aoei Mühghaü ngühkhüm jungeida hao Mühghaü to kida, hoba Mühghaü hao to kida. Hobaje haoei sen la kubü Soushou danko hao sen yoa kida dogo senei ngekei.