Read Chang Naga 1 JOHAN 4 Bible Online

1 JOHAN 4 - Chang Naga bible

1 JOHAN 4

¹Sanoubü jenabou shuong, soushou pendou to maitelem, lausikei haoen Mühghaü ka yinglaoje takteiashi, aishanga amlangbü thuseibü juongnyu kaodak to aa.

²Kanei Mühghaü Soushou honei shenlabü; Jisu kho müt tegü loubü Khrista ki dogo sungletbü soushou weko kho Mühghaü ka ki,

³hoba soushou laobouei ong Jisu asungletda kho Mühghaü ka aying. Kho Khrista Khulimbü kümsilei ki; hoba kanei hao louada dogo dida; tou mangkei hao kaodaka kia.

⁴Nashousi shuong kan Mühghaüeibü ki, hoba kanei amlangbü thuseibü thükena, aieilausi kaodaka kibou toje kan to kibü Mühghaü Soushou kho yaangbou ki.

⁵Amlangbü thuseibü shuong kaodakeibü ki, hoba khoei haoenei kaodakei laubü hima lauda, hoba kaodakei haoen to ditkuda.

⁶Sen Mühghaüeibü ki; Mühghaüei sen to ditkuda dogo haoei ngekei; ao Mühghaüeibü aying haoei sen to aditkuda. Hoei senei ngühmai soushou si shedbü soushou kho shenda.

⁷Sanoubü jenabou shuong, senei cheei che to sanouakho, aishanga sanou Mühghaü ka louda hoba aoei sanouda hao Mühghaü ka bukbü shou ki hoba haoei Mühghaü ngekei.

⁸Aoei asanouda haoei Mühghaü angekei, aishanga Mühghaü kho sanou ki.

⁹Hao danko sen lang kitilabü lele Mühghaüei hao Shou jayangshou kaodak to hautikukei dogo laubü khünei Mühghaü sanou kho tang khitkei.

¹⁰Sanou kho honei ki: senei Mühghaü sanoukei aying, lausikei haoei sen sanoukei hoba seneibü shabü angtila shanga haoei hao Shou jayangshou kaodak to hautikei.

¹¹Sanoubü jenabou shuong, Mühghaüei sen hainyu sanoukeilonga seneikei jenabou si jenabou sanouyojan.

¹²Aoeikei Mühghaü hapan achühkei; senei jenabou si jenabou sanouyoa longa, Mühghaü sen to ki, hoba haoeibü sanou sen to penbüsoubü yeida.

¹³Hao sen to, sen hao to ki dogo senei ngekei, aieilausi haoei sen la hao Soushou phejan kuakei.

¹⁴Bouei Shou kaodak khümenbou yeitila hautikei dogo künei hapa hoba aukabü künda.

¹⁵Jisu kho Mühghaü Shou ki dogo müt atei theleda longa, Mühghaü hao to ki hoba hao Mühghaü to ki.

¹⁶Sen shanga Mühghaü sanou laobou ki, kho künei ngekei, hoba mailema. Mühghaü sanou ki; hoba ao sanoua kida hao Mühghaü to kida, hoba Mühghaü hao to ki.

¹⁷Matjemnyet sen maang nakhaitila shanga sen yoa sanou pentisoutikei, aieilausi ho kaodaka seneibü langkei kho Khristaeibü to jetei ki.

¹⁸Sanoua hatlabü aki, lausikei penbüsoubü sanouei hatbü shian sattida. Hatbü kho kayanga thonakei, hoba ao hatda hao sanoua penbüsoubü ayeikei.

¹⁹Senei sanouda aieilausi haoei shaang sen to sanoukei.

²⁰Atei “Ngei Mühghaü sanouda” dogo lauan haojai haona mangsensije hao kho yepeijawebü ki; aishanga aoei haoei hapbü jaisina to asanoudaje haoei haoei ühüpbü Mühghaü sanoula athük.

²¹Aoei Mühghaü sanouda haoei haojai haonakei sanoujan, ho ngühkhüm haoei kün la kukei.