Read Chang Naga 1 JOHAN 5 Bible Online

1 JOHAN 5 - Chang Naga bible

1 JOHAN 5

¹Aoyouei Jisu kho Khrista dogo mailemda hao Mühghaü ka bukbü shou ki, hoba aoyouei bou che to sanouda haoei hao shou tokei sanouda.

²Senei ladang Mühghaü to sanouda hoba haoeibü ngühkhüm shuong jungeida kheijinei senei Mühghaü shousi shuong to sanouda dogo senei ngekei;

³aishanga Mühghaü to sanoulabü kho hao ngühkhüm jungeilabü shanga ki. Hao ngühkhüm shuong atshaibü aying,

⁴aieilausi Mühghaü ka bukbü shou wekoei kaodak thükda, hoba kaodak thüklangbü kho seneibü thükenbü mailem ki.

⁵Jisu kho Mühghaü Shou dogo mailembü to liman kaodak thükenbou kho ao ki?

⁶Jisu Khrista kho dei hoba sii danko loubü ki; deiei ong aying, lausikei dei hoba sii danko loukei. Ngühchung künbou kho Soushou, aieilausi Soushou kho ngühmai ki.

⁷Aukabü künbou sem ki:

⁸Soushou, hoba dei, hoba sii; hoba sem pendou kho nyekchüh che ong.

⁹Senei müteibü aukabü sungletda, lausikei Mühghaü aukabü kho yaangbou. Mühghaü aukabü khoje hao Shou shangabü.

¹⁰Aoei Mühghaü Shou to mailemdaje hao to kho aukabü thüngakei. Aoei maialemda haoei Mühghaü kho yepeibula yeitida, aieilausi haoei hao Shou shangabü Mühghaü aukabü to maialem.

¹¹Mühghaü aukabü kho ho ki: haoei sen la thon akibü langkei kua hoba kho langkei hao Shou to ki.

¹²Aoei Shou ki, haoei kho langkei ki; aoei Mühghaü Shou aki haoei kho langkei aki.

¹³Kanei thon akibü langkei kia dogo ngelabü shanga ngei ho kan Mühghaü Shou to mailembü shuong to doda.

¹⁴Senei haoei maangangbü tegü denche hialonga haoei sen to ditkuda dogo senei hao to maanglemenbü ki.

¹⁵Haoei sen to ponpendou ditkuda dogo senei ngeasikei, senei hao ka senei ai shanga hikei kho kia dogo senei ngeakei.

¹⁶Atei haojai haonaei hailabü lele ayingko shabü shonko hapalonga, haoei hao shanga welaukulabü hoba hao shanga langkei hapbulabü. Kho hailabü lele ayingko shabü shonbü shanga ong.

¹⁷Asaopobü pendou shabü, lausikei ühailabü shabü at kia.

¹⁸Mühghaü ka bukbü shouei shabü ashonda, lausikei Mühghaü Shouei hao lomda, hoba amaibouei hao to ajungda.

¹⁹Sen Mühghaüeibü dogo senei ngeakei hoba kaodak khümbo amaibou seisihauei yepeitida.

²⁰Hobaje Mühghaü Shou loua dogo senei ngeakei, hoba senei tükdebü Mühghaü aoje ngela shanga haoei sen la ditenbü kuakei. Sen hao Shou Jisu Khrista to kisije, sen tükdebü to ki. Kho tükdebü Mühghaü, thon akibü langkei ki.

²¹Nashousi shuong, ayingbü mühghaü shuong ka kan lolo satenan kiashi.