Read Chang Naga MATJEMBÜSHUONG 1 Bible Online

MATJEMBÜSHUONG 1 - Chang Naga bible

MATJEMBÜSHUONG 1

¹Tou ho longkei, Joshua haian phaia, Israelbü shuongei BUNYUBOU to phekei, “Kün shanga Kananbü to wapyola ao shaang angla?”

²BUNYUBOUei laukei, “Jihuda anglabü; chühashi, kaonyek kho ngei haoeibü ik to kua.”

³Hobaje Jihudaei haoeibü jaisina Simeon phang to laukei, “Kü la janletkubü kaophei to kü yoa kaiyang, senei Kananbü khulimbo wapyokho hoba ngei kho tegü ka la janletkubü kaophei to ka yoa haulabü.” Hibü Simeon hao yoa haukei.

⁴Kheijinei Jihuda angkei hoba BUNYUBOUei Kananbü si Perizbü haoen ik to kukei, hoba haoenei hajar an Bezeka thükkei.

⁵Haoenei Bezeka Adonibezek hapbei, hoba hao khulimbo wapyokei, hoba haoenei Kananbü hoba Perizbü thükkei.

⁶Lausikei Adonibezek alapouko sattikei; lausikei haoenei hao shijung haukei, hoba hao lapbei, hoba haoeibü ikbem si youbem jeman apbukei.

⁷Hobaje Adonibezekei laukei, “Choba anjinlei haoeneibü ikbem hoba youbem jeman apan ngeibü khümsok phanga atbülebü haushaiko kikei, ngei kümbü tegü kho maimai Mühghaüei kü la ngeitikua.” Hobaje haoenei hao Jerusalem to sungbakei hoba hao khünei haikei.

⁸Hobaje Jihudabü shousi shuongei Jerusalem khulimbo wapyokei, hoba kho lekei, hoba inei wapshembei, hoba sangnyua wan sapbukei.

⁹Hobaje thonla Jihudabü shousi shuongei shongh kaodaka chaangbou aepheia hoba pholi kaodaka kibü Kananbü khulimbo wapyola yankei.

¹⁰Hobaje Jihudabüei Hebrona kibü Kananbü khulimbo haukei; (tou Hebron kho shangiedje Kiriath Arba kikei) hoba haoenei Sheshai, Ahinaan hoba Talmai thükkei.

¹¹Kho ka haoen Debira kibü khulimbo haukei, (Shangiedje Debir nyen kho Kiriath Sefer kikei.)

¹²Hobaje Kalebei laukei, “Aoei Kiriath Sefer thüklaje hoba lelaje, ngei ngeibü nouyangshou Aksa yakla lela hao la kulabü.”

¹³Hobaje Kalebeibü na Kenazeibü shou Othnielei kho lekei, hoba haoei haola haoeibü nouyangshou Aksa hao la yakla lela kukei.

¹⁴Ladang sao hao jungto loukei, saoei hao to saoeibü bou to sek che phela thungeikei, hoba saoei saoeibü gadu ka lotkei, hoba Kalebei sao to laukei, “Nyi ai mangsühda?”

¹⁵Saoei hao to laukei, “Kü la jongsak che labü, nyi ngo yungkük kaodaka apyosije kü la deikhün kushi.” Hobaje Kalibei sao la deikhün thükkabou hoba phangaenei kibü deikhünkei kukei.

¹⁶Hobaje Mosaeibü koueibü mütlang mütli shousi shuong chaangbou aephei Arad nyangko kibü woklong sangnyu ka Jihuda shousi shuong yoa angan Jihuda yam to atkei; hoba haoen hauan mütshuong yoa kikei.

¹⁷Hobaje Jihudabü shuong Simeonbü shuong yoa haukei, hoba haoenei Zefata kibü shuong thükkei, hoba kho lepde mautikei. Hibü sangnyu nyen kho Horma nyenkei.

¹⁸Jihudaei toukei Gaza kho kaophei yoan hoba Ekron kho kaophei yoan lekei.

¹⁹Hobaje BUNYUBOU Jihuda yoa kikei, hoba haoei shongh kaodak lekei, lausikei haoei yomanga kibü shuong shian asattien, aieilausi haoenei nameibü kailong kikei.

²⁰Hobaje Mosaei laubü tegü Kaleb la Hebron kukei, hoba kho ka haoei Anak shousi sem shian apbei,

²¹Lausikei Benjaminbüei Jerusalema kibü Jebusbü shian asatti, hibü tat sühko Jerusalema Benjaminbü yoa Jebusbü kida.

²²Hobaje Josef chemdang kei Bethel khulimbo angkei, hoba BUNYUBOU haoen yoa yokei.

²³Hobaje Josef mütliei Bethel pheian chühla hautikei. (Tou sangnyu nyen kho shangiedje Luz kikei.)

²⁴Hobaje pheian chühbü shuongei sangnyu ka müt che longko hapbei, hoba haoenei hao to laukei, “Sanoudambo sangnyu to atbü lam künla lenbüma, hoba künei ka to sanouko jungeikho.”

²⁵Hobaje haoei haoen la sangnyu lamnyu kho lenkei, hoba haoenei sangnyu kho inei wapshembei, lausikei haoenei müt kho hoba haoen chempen pendou sattikei.

²⁶Hobaje müt kho Hitbü kaonyek to haukei, hoba sangnyu che kümbei, hoba kho nyen Luz nyenkei; tat sühko kho nyen kho kia.

²⁷Hobaje Manasseei Bethshean hoba kho sanga kibü shuong ayingsi Taanak ayingsi kho sanga kibü shuong ayingsi Dora kibü shuong hoba kho sanga kibü shuong ayingsi, Ibleama kibü shuong, hoba kho sanga kibü shuong ayingsi Meggiddoa kibü shuong, hoba kho sanga kibü shuong shian asatti; lausikei Kananbüei khei ong kaonyeka kikei.

²⁸Ladang Israel hau kian apbei, haoenei Kananbü shuong tukosekko kümsilei kümtikei, lausikei haoen lepdeje shian üp.

²⁹Hobaje Efraimei Gezera kibü Kananbü shian asatti; lausikei haoen yoa Kananbü Gezera kikei.

³⁰Zebulunei Kitrona kibü shuong, ayingsi Nahalola kibü shuong shian asatti; lausikei Kananbü haoen yoa kikei, hoba kümaleia tukosekko kümtibü phanga kilabü lele yeikei.

³¹Asherei Akoa kibü shuong, ayingsi Sidona kibü shuong, ayingsi Ahlaba kibü shuong, ayingsi Akziba kibü shuong, Helbaa kibü shuong, ayingsi Afeka kibü shuong, ayingsi Rehoba kibü shuong shian asatti;

³²lausikei kaonyeka kibü mütli Kananbü yoa Asherbü kikei; aishanga haoenei haoen shian asatti.

³³Naftali Beth Shemesa kibü shuong ayingsi Beththanata kibü shuong shian asatti, lausikei haoei Kananbü kho kaonyeka kibü shuong yoa kikei, kheiyingsikei Beth Shemes si Beth Anata kibü shuong shanga kümaleia tukosekko kümlabü lele yeikei.

³⁴Hobaje Amorbüei Danbü shongh kaodak to thungan sattikei, aishanga haoenei haoen yomang to louyanla asakku;

³⁵lausikei Amorbü Heres shong- ha Aijalona hoba Shaalbima akukkuko ong kikei. Lausikei Josef chemdangeibü ik haoen thüka kaangkhühtham kikei, hoba haoen kümaleia tukosekko kümlabü lele yeikei.

³⁶Hobaje Amorbü leilang kho Akrabbim Danshang ka Sela ka thükae sühko angan kikei.