Read Chang Naga MATJEMBÜSHUONG 10 Bible Online

MATJEMBÜSHUONG 10 - Chang Naga bible

MATJEMBÜSHUONG 10

¹Hobaje Abimelek phaia Israelbü khümenla Puaeibü shou hoba Dodoeibü shi Tola Issakar ka longkei. Hobaje hao Efraim shongh kaodak Shamira kikei.

²Hobaje haoei po saoto sem Israel matjembei. Kho phaia hao haikei hoba Shamira khünkei.

³Hao phainei Gileadbü Jair longkei, haoei Israel po saoto nyi matjembei.

⁴Hobaje haoeibü bousushou khujin kikei, hoba haoenei jungeila gadu khujin phokei hoba haoenei Gilead kaoa Havoth aenei sangnyu khujin kikei hoba kho tat sühko kia.

⁵Hobaje Jair haikei, hoba Kamona khünkei.

⁶Hobaje nyibou Israelbüei BUNYUBOU thedanga ai amai kho kümbei hoba Baal hoba Ashtarot Sira mühghaü, Sidon mühghaü, Moab mühghaü, Ammon shousi shuongeibü mühghaü, hoba Filistiabü mühghaü shuong khangenkei, hoba haoenei BUNYUBOU apyokei, hoba hao akhangen.

⁷Hobaje Israelbü khulimbo BUNYUBOU khauangkei hoba haoei haoen Filistiabü ikto hoba Ammonbü shuong ikto yakkukei,

⁸hoba khüpo kho haoenei Israelbü shousi shuong shieinangeikei hoba khonkutikei. Po anthükset Israelbü pendou Jordan danjung hauan Gileada Amorbü kaodaka kibü pendou haoenei khonkutikei.

⁹Hobaje Jihuda khulimbo, Benjamin khulimbo, hoba Efraim chemdang khulimbo wapyola shanga Ammonbü shousi shuongei Jordan danjung haukei, khei yingbü khoei Israel aeibou khonsakko kikei.

¹⁰Hobaje Israel shousi shu- ongei BUNYUBOU to ngekko laukei, “Künei ka khulimbo shabü shona, aieilausi künei Mühghaü inletkei hoba Baal khangena.”

¹¹Hobaje BUNYUBOUei Israelbü to laukei, “Ngei kan Ijepbü ka hoba Amorbü ka, Ammonbü ka hoba Filistiabü ka akhümen lo?

¹²Toukei Sidonbü hoba Amalekbü hoba Moabbüei kan khonkutikei hoba kanei kü to ngekkei hoba haoeneibü ik ka ngei kan khümenkei.

¹³Khei yingsikei kanei ngo inletkei hoba lubü mühghaü lembei; hibü touje ngei kan akhümenlabü,

¹⁴hauashi hoba kanei pienbü mühghaü shuong to ngekashi, kan khonkubü chaloua haoenei kan khümentiashi.”

¹⁵Hobaje Israelei BUNYUBOU to laukei, “Künei shabü shona, ai ong ka thedanga maia dogo damda kho kün to kümshi, khei tat kün ong khümenshi dogo künei ka to sudajada.”

¹⁶Hibü haoenei küksithang mühghaü shuong apbei hoba BUNYUBOU khangenkei; hoba Israelbü khon- yaangsakbü shanga hao maangshat yeikei.

¹⁷Kheijinei Ammonbü liko takshatkei, hoba Gileada shaikei. Hobaje Israel shousi shuong haoen lolo liko yoshaikei, hoba Mizpaa shaikei.

¹⁸Hobaje mütshuong, Gileada leiyeibü shuongei cheei che to laukei, “Ammonbü shousi shuong khulimbo wapyo khangla ao ki? Gileada kibü pendou thüka hao kongnyubou lelabü.”