Read Chang Naga MATJEMBÜSHUONG 11 Bible Online

MATJEMBÜSHUONG 11 - Chang Naga bible

MATJEMBÜSHUONG 11

¹Tou Gileadbü Jeftha kho hau yaangbü lakjaibou che kikei, hoba hao asangalan saoeibü shou che kikei hoba Gilead ka Jeftha pakkei.

²Hobaje Gileadeibü yakei hao la bousu shousi shuong bukkukei, hoba ladang hao yakeibü shousi shuong chingkei haoenei Jeftha shian sattikei, hoba hao to laukei, “Aboueibü chemaje nyi phet aphanlabü, aishanga no lubü yaksaeibü shou ki.”

³Kheijinei haoeibü jaisinasi shuong yo ka hao satkei, hoba Tob kaodaka kikei, hoba Jeftha yoa sousiwat mütshuong jambei hoba haoen hao yoa haukei.

⁴Hobaje jih tuisho kian Ammonbü Israel to wapyo khangkei.

⁵Hobaje ladang Ammonbüei Israel khulimbo wapyokei, Gileadbü jaishou shuongei Tob kaodak ka Jeftha leian loula haukei.

⁶Hobaje haoenei Jeftha to laukei, “Kaiya hoba senei Ammonbü khulimbo wapyola no küneibü leiyeibü la leshi.”

⁷Lausikei Jefthaei Israelbü jaishou shuong to laukei, “Kanei kü to amangsen lo? Hobaje kübou chem ka ngo shian sattikei aying lo? Aila tou khonsaka kijinei kan kü jungto louda?”

⁸Haoenei Jeftha to laukei, “Khei yingbü khoei ong tou künei ka jungto sepeinyu louda, kün yoa no haulabü hoba Ammonbü to wapyolabü, hoba Gileada kibü pendou thüka küneibü khu lelabü.”

⁹Jefthaei Gileadbü jaishou shuong to laukei, “Kanei nyibou ngo chem to leijung louan Ammonbü to wapyosi hoba BUNYUBOUei haoen kü la kusi ngo kaneibü khuleibü lela se?”

¹⁰Kheijinei Gileadbü jaishou shuongei Jeftha to laukei, “Sen kanglanga BUNYUBOU aukabü yinglabü, nyi laubü tegü künei maimaitham kümlabü.”

¹¹Hibü Jeftha Gileadbü jaishou shuong yoa haukei, hoba mütshuongei hao haoen thüka khu hoba leiyeibü yeitikei, hoba Jefthaei haoeibü ngüh pendou Mizpaa BUNYUBOU thedanga joyokei.

¹²Hobaje Jefthaei Ammonbü Choba jungto ngühlang künbü hautiko laukei, “Ngeibü kaodak khulimbo wapyola no kü jungto loubü ho ngo khulimbo no ai ki?”

¹³Hobaje Ammonbü Chobaei Jefthaeibü ngühlang künbou to jongaikei, “Aieilausi Ijep ka louan Israelei ngeibü kaodak Arnon ka Jabbok sühko hoba Jordan sühko langa; hibü tou sangmaia kungaiashi.”

¹⁴Hobaje Jefthaei nyibou Ammonbü Choba jungto ngühlang künbü hautikei.

¹⁵Hobaje hao to laukei, “Hai, Jefthaei lauda, Israelei Moab kaodak ayingsi Ammonbü kaodak alang.

¹⁶Lausikei ladang Ijep ka angkei, Israelbü Saklangbü yungnyu to haukei hoba Kadesh to loukei.

¹⁷Kheijinei Israelei Edombü Choba jungto ngühlang hautiko laukei, ‘Kaibü kaodak danko kün hautishi, dogo künei sudajada;’ lausikei Edombü Chobaei ngüha ale. Kho tegü toukei haoenei Moabbü Choba jungto hautikei. Lausikei haoei ü dogo laukei. Hibü Israelbü Kadesha kikei.

¹⁸Kheijinei haoenei yamlamang danko haukei, hoba Edom kaodak si Moab kaodak chaangbou ae sühkei, hoba Arnon jipheinei sühkei, lausikei haoen Moab kaophei to üt, aishanga Arnon kho Moab leilang kikei.

¹⁹Kheijinei Israelei Amorbü Choba Sihon hoba Heshbonbü Choba jungto ngühlang künbü hautikei. Hobaje Israelei hao to laukei, ‘Kaneibü kaodak danko küneibü kaodak to kün hautishi dogo künei sudajada.’

²⁰Lausikei Sihonei haoeneibü leilang dantila Israel to maangalem, hibü Sihonei haoeibü mütli pendou yoshaitikei; hoba Jahaza shaikei, hoba Israel to wapyokei.

²¹Hobaje BUNYUBOU Israel Mühghaüei Sihon hoba haoeibü mütli pendou haoeibü ikto kukei, hoba haoenei haoen thükkei. Hibü kho kaodaka kibü Amorbü kaodak pendou kho Israelei lekei.

²²Hobaje haoenei Arnon ka Jabbok sühko hoba yamlamang ka Jordan sühko Amorbü kaodak pendou lekei.

²³Hibü tou kho tegü BUNYUBOU Israelbü Mühghaüei jembü mütli Israel thedanga Amorbü ka sungletkukei, hoba khübü kho nyi lela se?

²⁴Kaibü mühghaü Khemoshei ai ka la kukei, kho alelep lo? Hobaje BUNYUBOU küneibü Mühghaüei kün thedanga aoyou ka ong sungletkukei pendou kho künei lelabü.

²⁵Tou Moabbü Choba Zippereibü shou Balak toje no maibou sai?

²⁶Ladang Israel Heshbon hoba kho sangnyu shuonga hoba Aroer hoba kho sang shuonga hoba Arnon yungkoa sangnyu pendoua po saongao sem kikei, kheijinei nyi aila kho jihaphaia sepeinyu alengai?

²⁷Hibü ngei no khulimbo shabü ashon hoba kü to wapyobüei nyi kü to amaibü jungeida, BUNYUBOU matjembouei tat Israel mütli hoba Ammonbü kanglanga janthetkushima.”

²⁸Lausikei Ammonbü Chobaei Jefthaei ngühlang laobou hao jungto hautikei kho aditku.

²⁹Kheijinei BUNYUBOUeibü soushou Jeftha thükto loukei hoba haoei Gilead hoba Manasse danko hoba Gileada Mizpa danko haukei, hoba Gileada Mizpa ka haoei Ammonbü jungto haukei.

³⁰Hobaje Jefthaei BUNYUBOU la thekuko laukei, “Nyi Ammonbü ngeibü ik to maimaitham kua longa,

³¹hoba ladang ngei Ammonbü thüka thük hapan longeilaje ngeibü chem koukhün ka ao kü to haüyola loulaje BUNYUBOU shangabü yinglabü. Hobaje ngei hao juokbü lembü shanga kulabü.”

³²Hibü haoen khulimbo wap- yola Jefthaei Ammonbü jungto danthetjung haukei, hoba BUNYUBOUei haoeibü ika haoen kukei.

³³Hobaje haoei Aroer ka Minnith kommaang sühko, sangnyu saoche, hoba Abel Keramim sühko hoba juong haitiko haoen thükkei. Kho tegü Ammonbü Israelbü phanga phokei.

³⁴Kheijinei Jeftha haoeibü chem Mizpa to longeikei; hoba chühashi, haoeibü shou senkaangbü jungan saikosaiko hao shuokla longkei, sao kho, haoeibü shou che kho ong kikei. Sao to liman haoei bousu yaksa shousi che ongkei akitei.

³⁵Hobaje ladang haoei sao hapbei haoei haoeibü neisimei jitnyinkei, hoba laukei, “Ügütü, ngeibü nouyangshou! Nyi ngo maiko yantia, hoba nyi ngo khonsak yaang yeitia; aishanga ngei BUNYUBOU to ngeibü sembung ipa, hoba ngei takletbü sungngaila athük!”

³⁶Hobaje saoei hao to laukei, “Abou, nyi BUNYUBOU to kaibü sembung ka ailai longkei kho tegü kü to kümshima, aishanga BUNYUBOUei kaibü dangbou shuong Ammonbü to ka shanga phok lambua.”

³⁷Hobaje saoei bou to laukei, “Kü shanga ho ong kümshima, lit nyi kü mütpem apyokai, khünei ngo shongh to angan nongailabü hoba ngo hoba ngeibü himshuong saosüngbü medei manghaaplabü.”

³⁸Hobaje haoei laukei, “Hauashi.” Hobaje haoei sao lit nyi hautikei; hoba sao bangjung haukei; sao hoba saoeibü himshousi shuong shongh to angan sao saosüngbü medei jih waangko mang haapbei. Aieilausi sao saosüngbü medei kikei.

³⁹Hobaje lit nyi thonlama sao bou jungto ngaikei, aoei haoei theletbü tegü sao to kümbei; hoba saoei ladangkei bousu angeko kikei. Hobaje Israela ho song che yeian apbei.

⁴⁰Khei Israelbü sao shuongei po weko Gileadbü Jefthaeibü nouyangnyu mang haapla po chenei chalou leinyet haukei.