Read Chang Naga MATJEMBÜSHUONG 12 Bible Online

MATJEMBÜSHUONG 12 - Chang Naga bible

MATJEMBÜSHUONG 12

¹Hobaje Efraimbü liko kamshaikei hoba Zafon danko haukei hoba Jeftha to laukei, “Aila Ammonbü khulimbo wapyola danjung haukei hoba künje anga? Künei ka thükto kaibü chem jikan apbulabü.”

²Hobaje Jefthaei haoen to laukei, “Ngo ngeibü mütli Ammonbü to aeibou dangan kikei; hoba ngei kan ngajinei kanei haoeneibü ik ka kün akhümen.

³Hobaje ladang kanei ngo akhümenlabü dogo chühenkei ngei ngeibü langkei ngeibü ika jungan Ammonbü khulimbo danjung haukei, hoba BUNYUBOUei haoen ngeibü ik to kukei, khülonga tat kan aila kü jungto longkei, ngo khulimbo wapyola se?”

⁴Kheijinei Jefthaei haoeibü mütli pendou leishaikei hoba Efraim to wapyokei, hoba Gileadbüei Efraim shikei, aieilausi haoenei laukei, “Kan Efraim ka satbü shuong kan Gileadbü, Efraim si Manasse yoa kibü shuong.”

⁵Hobaje Efraimbü khulimbo Gileadbüei Jordan dei khatshang kaian sungkei. Hobaje ladang Efraim ka satbü atei, “Ngo dantikai,” dogo laulaje Gileadbüei hao to laukei, “No Efraimbü sai?” Ladang haoei, “Aying,” dogo laulaje,

⁶haoenei hao to laulabü, “Khülonga Shibboleth dogo laushi,” hoba haoei laukei, “Sibboleth,” aishanga haoei ngüh tükde alongen; kheijinei haoenei hao lapjung loukei hoba Jordan dei khatshanga haitiko lekei. Hobaje kho jiha Efraimbü hajar saonyito nyi haitikei.

⁷Jefthaei po nyet Israelbü matjembei. Kho phaia Gileadeibü bou Jeftha haikei, hoba Gileada haoeibü sangnyua khünkei.

⁸Hao phainei Bethlehembü Ibzanei Israel matjembei.

⁹Haoeibü bousu shousi khujin kikei; hoba yaksa shou khujin kho haoei kounyangsi shuong to chem kantikei, hoba haoshou bousu shuong shanga küksithang ka lubü yaksa khujin ngakukei. Hobaje haoei po nyet Israel matjembei.

¹⁰Kho phaia Ibzan haikei, hoba Bethlehema hao khünkei.

¹¹Hao phainei Zebulunbü Elonei Israel matjembei, hoba haoei po an Israel matjembei.

¹²Kho phaia Zebulunbü Elon haikei hoba Zebulun kaodak Aijalona khünkei.

¹³Hao phainei Pirathonbü Hilleleibü shou Abdonei Israel matjembei.

¹⁴Haoeibü shou saonyi hoba shi bousu khujin kikei, hoba haoen gadu anjineileia setkei, hoba haoei po set Israel matjembei.

¹⁵Hobaje Pirathonbü Hilleleibü shou Abdon haikei, hoba Amalekbü shongh kaodak Efraim kaonyeka Pirathona khünkei.