Read Chang Naga MATJEMBÜSHUONG 13 Bible Online

MATJEMBÜSHUONG 13 - Chang Naga bible

MATJEMBÜSHUONG 13

¹Hobaje nyibou Israelbüei ai BUNYUBOU thedanga amai kho kümbei; hoba BUNYUBOUei haoen Filistiabü ik to po saonyi kukei.

²Hobaje Danbü phang ka Zorabü che nyenei Manoa kikei, hoba yak angkong kikei, hoba shou abuk.

³Hobaje BUNYUBOUeibü hangangbü kho yaksanyu jungto longkei hoba laukei, “Chühashi, no angkong shou abukda, lausikei no mang akongko aplabü hoba bousu shou che buklabü,

⁴khoei maangsangashi, ih ayingsi nyakidei teyung, hoba asaopobü aikei teshau.

⁵Aishanga ditashi, no mangakongko aplabü hoba bousu shou che buklabü. Haoeibü khua khujin ajinkulabü, aishanga bukjinei thama nashou kho Mühghaü shanga Nazarit che kilabü hoba Filistiabü ik ka haoei Israelbü khümenla khanglabü.”

⁶Kheijinei yaksanyuei jembü lao to lenkei, “Mühghaü müt che kü jungto loukei, hoba haoeibü thenyek Mühghaüeibü hangangbü phatko aeibou hatlamoklabü kikei, hao lakaje ngei hao to aphe, hoba haoei kü la haoeibü nyen alen;

⁷lausikei haoei kü to laukei, ‘Chühashi, no mang akongko aplabü, hoba bousushou che buklabü; hibü ih ayingsi nyakidei teyung hoba asaopobü aikei teshau, aishanga nashou kho buknyet ka hao hainyet sühko Mühghaü shanga Nazarit che kilabü.’ ”

⁸Kheijinei Manoaei BUNYUBOU to sukeijakei hoba laukei, “O BUNYUBOU, ngei ka to sudajada, nyi hautibü Mühghaü müt kho kün jungto hautibüma, hoba bukla kibü nashou to künei ai kümlaje künla lenbüma?”

⁹Hobaje Mühghaüei Manoaeibü ngüha lekukei. Hobaje BUNYUBOU hangangbü kho nyibou yaksanyu jungto sao khongthua setan kijinei loukei, lausikei lao Manoa, sao yoa akitei.

¹⁰Hobaje yaksanyu kho panteiko laangkei hoba saoeibü lao to laukei, “Chüh- ashi, nyetche kü jungto longbü müt kho kü jungto longakei.”

¹¹Hobaje Manoa meimeikei hoba yakphai to haukei, hoba müt kho jungto louan hao to laukei, “Ho yaksa to joyobü kho no sai?” Hobaje haoei laukei, “Haü, kho ngo.”

¹²Hobaje Manoaei laukei, “Ladang kaibü ngüh haüthüklaje shoueibü langkei haang ailai kila, hoba haoei ai kümla?”

¹³Hobaje BUNYUBOU hangangbüei Manoa to laukei, “Ngei yaksanyu to laubü pendou saoei maangsangko kishi.”

¹⁴Semlüh hek ka longbü aikei saoei ashaulabü, ayingsi sao la ih ayingsi nyakidei teyungti ayingsi asaopobü peisilei aikei ashaulabü; ngei sao la sakkubü pendou sao la jungeitiashi.

¹⁵Hobaje Manoaei BUNYUBOU hangangbü to laukei, “Sanoudambo künei no senetmangsühda, hoba ka shanga lonshou che lemlekukho.”

¹⁶Hobaje BUNYUBOU hangangbüei Manoa to laukei, “Nyi ngo senetsi dogokei ngei kaibü shausiyung ashaulabü; lausikei nyi juokbü lembü che lamlea longa kheijinei BUNYUBOU la kuashi.” (Aishanga Manoaei hao BUNYUBOUeibü hangangbü dogo angeko kikei.)

¹⁷Hobaje Manoaei BUNYUBOUeibü hangangbü to laukei, “Kaibü ngüh haüthükjinei künei ka to souhat lenla shanga kaibü nyen ao?”

¹⁸Hobaje BUNYUBOUeibü hangangbüei hao to laukei, “Ho maangpanglabü” dogo ngean aila nyi ngeibü nyen pheda?

¹⁹Hibü Manoaei lonshou kho shausiyung lembü yoa lekei hoba BUNYUBOU aoei maangpanglabü kümda hao la kho laang thüka lembei.

²⁰Hobaje ladang lemshang ka wanlong kho müh ae angkei, BUNYUBOUeibü hangangbü kho Monoa si haoyak haosiei chühko kijinei wanlonga angkei, hoba haoeneibü thenyek kaoei khüpbei.

²¹Lausikei BUNYUBOUeibü hang- angbü touje Manoa si haoyak haosi jungto along. Kheijinei ong Manoaei hao BUNYUBOUeibü hangangbü dogo ngekei.

²²Hobaje Manoaei haoyak to laukei, “Maimaitham seti hailabü, aieilausi setiei Mühghaü hapa.”

²³Lausikei hao yakei laukei, “BUNYUBOUei seti haitilabü tegüje setiei juokbü lembü hoba shausiyung kubü tesungletkhoulep, ayingsi habü pendou seti la alenkhoulep, ayingsi ho sühkoje seti la angetilabü.”

²⁴Hobaje yaksa khoei bousushou che bukkei, hoba haoeibü nyen Samson nyenkei, hoba nashou kho chingkei. Hobaje BUNYUBOUei hao haükukei.

²⁵Hobaje Zora hoba Eshtaol kanglanga Mahanedana hao to BUNYUBOU soushouei thungeila khangkei.