Read Chang Naga MATJEMBÜSHUONG 15 Bible Online

MATJEMBÜSHUONG 15 - Chang Naga bible

MATJEMBÜSHUONG 15

¹Lausikei longche kian, whet youshou latbü jiha Samsonei lonshou che jungan yak peanchühla yankei, hoba haoei laukei, “Ngo yak jungto shemjang to atlabü.” Lausikei saoeibü bouei atla asakku.

²Hobaje saoeibü bouei laukei, “Maimaitham nyi sao lepde mangsenda dogo dambei; hibü ngei ka thangbou la sao kua. Saoeibü na aei saomaibü ayinglo? Sanoudambo sao jeila na ong leashi.”

³Hobaje Samsonei haoen to laukei, “Toubüaje ngei Filistiabü to ladang amaibü kümlaje kü la shed khühkula akaklabü!”

⁴Hibü Samsonei hauan selong saongao sem lapbei, hoba wanemshang sungbaan haoei mei si mei khüh- yoan mei penyi bang kanglanga wanemshang che che khühkukei.

⁵Hobaje ladang haoei wanemshanga wan sapbukei, haoei selong shuong kho Filistiabüeibü sek youshou angko kishang to hautikukei hoba youthep hoba youshou angko kibü hoba oliv bamang jikan apbukei.

⁶Kheijinei Filistiabüei laukei, “Ho aoei kümbei?” Hobaje haoenei laukei, “Timna boueibü kounyangbou Samson; aieilausi haoei sao yakla lekei hoba sao haoeibü thangbou la kuan apbei. Hobaje Filistiabü angkei hoba sao hoba saoeibü bou wanei juokettikei.”

⁷Hobaje Samsonei haoen to laukei, “Kanei hai kümda yinga longa, ngei kan to phoklamlabü, kho phaia ong ngei nanglabü.”

⁸Hobaje haoei youshon si youshi to meitiko juong haitikei, hoba hao louyankei hoba Etam laanglip poba kikei.

⁹Kheijinei Filistiabü angkei hoba Jihudaa shaikei hoba Lehia shikei.

¹⁰Hobaje Jihuda mütshuongei laukei, “Aila kün khulimbo kan longkei?” Haoenei laukei, “Haoei kün to kümbü tegü hao to kümlabü lele kün Samson khühla longkei.”

¹¹Kheijinei Jihudabü müt hajar sem Etam laanglip pob to louyankei, hoba Samson to laukei, “Filistiabü sen thüka songdakbü dogo nyi angekei lo? Khülonga ho nyi kün to ai kümbei?”. Hobaje haoei haoen to jongaikei, “Kü to haoenei kümbü tegü ngeikei haoen to kümbei.”

¹²Hobaje haoenei hao to laukei, “Filistiabü ik to künei no kula shanga no khühla kün louyankei.” Samsonei haoen to laukei, “Kanei ngo ühaitilabü dogo kan lolo kü la thebü.”

¹³Haoenei hao to laukei, “Tükde ong, künei no khei ong khühlabü hoba haoeneibü ik to kulabü, künei no ühaitilabü.” Hibü haoenei hao janglüh haanbü penyiei khühkei hoba hao laanglip ka sungankei.

¹⁴Ladang hao Lehi to loukei, Filistiabüei hao to haüyola uihinjung angkei, hoba BUNYUBOUeibü soushou hao thükto loukei, hoba haoeibü phema kibü janglüh kho haana wan lapbü phatko kikei, hoba haoeibü phema khübü kho tühnyinkei.

¹⁵Hobaje haoei gadueibü kaolo haansang che hapbei hoba haoeibü ik longan kho japan sungkei hoba khoei haoei müt hajar che haitikei.

¹⁶Hobaje Samsonei laukei, “Gadueibü kaolo cheei shaang shaang onko, Gadu cheeibü kaoloei müt hajar che ngei haitikei.”

¹⁷Ladang haoei laubü nangkei haoei kaolo kho haoeibü ik ka wenan apbei; hoba kho kao to Ramath Lehi dogo nyenkei.

¹⁸Hobaje hao aeibou deilako kikei, hoba haoei BUNYUBOU to ngakei hoba laukei, “No khangenboueibü ikei ho khümembü yaangbü nyi sakkua, hoba ngo tou deilaei hailep lo? Hobaje kipan üpbü ik to ngo atlep lo?”

¹⁹Hobaje Lehia kibü kaokhong Mühghaüei ipan kho ka dei pakkei, hoba ladang yungkei haoeibü soushou nyibou loungaikei, hoba hao hau kingaikei. Hibü kho nyen kho Enhakor dogo nyenkei, tat sühko kho Lehia kia.

²⁰Hobaje Filistiabü jihaphaia haoei po saoche Israel matjembei.