Read Chang Naga MATJEMBÜSHUONG 16 Bible Online

MATJEMBÜSHUONG 16 - Chang Naga bible

MATJEMBÜSHUONG 16

¹Samson Gaza to haukei, hoba khünei haoei suonlamnyu che hapbei, hoba hao sao jungto atkei.

²Hobaje Gazabü la Samson loua dogo ngetikei, hoba haoenei hao kailepbei, hoba langyang sünga bakhüna thokei. Haoenei langyang sünga sangsembo thoko laukei, “Ngeyang lange asao shongko senei haiteikho, kho phaia ong senei hao haitikho.”

³Hobaje saotometu- phang sühko Samson yepbei, hoba methuphang hao meimeikei hoba sangnyu bakhün koukhün si thaonyu penyia jungkei, hoba khübü kho lühenkei, khinjin hoba lubü pendou haoeibü phaka khübü kho pean Hebron thedanga kibü shongh khu to jungan angkei.

⁴Kho phaia Sorek pholia yaksa che nyenei Delila haoei sanoukei.

⁵Hobaje Filistiabü bunyu shuong sao jungto louan sao to laukei, “Hao suletashi, hoba haoeibü hau yaangbü kho ainei kije lapenshi, hoba senei hao khühlabü hoba hao thüka bunyu lelabü lele ai huonei senei hao lapla kho chühashi, hoba kün mütpem wekoei ka la chandinam hajar cheto saongao bang kulabü.”

⁶Hobaje Delilaei Samson to laukei, “Kaibü hau yaangbü lanei ki, hoba no lai khühenla hoba thepetan phoenla kho sanoudambo kü to lenbüma?”

⁷Hobaje Samsonei sao to laukei, “Laubük haanbü nyetei haoenei ngo khüha longa ngo hau akiko aplabü hoba takübü müt tegü ong yeilabü.”

⁸Kheijinei Filistiabü bunyu shuongei sao la laubük haanbü nyet sungbakukei, hoba khübü khoei saoei hao khühkei.

⁹Tou shemjang maangkaboua saoei müt lombo setteitikei hoba saoei hao to laukei, “Samson! Filistiabü no lapla louda.” Lausikei wana jolühei meiyoujinei tegü laubük kho haoei jangthetkei. Hibü haoeibü hau ainei kije ange.

¹⁰Hobaje Delilaei Samson to laukei, “Chühashi, nyi ngo aweasüng, hoba kü to yepeia. Sanoudambo no lai khühlaje kü to lenbü.”

¹¹Hobaje haoei sao to laukei, “Haoenei ngo janglüh jolüh haanbüei khühalonga, kheijinei ngo hau akiko aplabü hoba lubü tegü ong kilabü.”

¹²Hibü Delilaei jolüh haanbü sungbakei, hoba khübü khoei hao khühkei, hoba hao to laukei, “Samson! Filistiabü no lapla louada! Hobaje shemjang maangkaboua müt thoakei.” Lausikei haoei haoeibü phem ka lüh kho lei tegü ong jangthetkei.

¹³Hobaje Delilaei Samson to laukei, “Tou sühko nyi ngo aweasüng hoba yepeia. No lai khühlaje kü la lenbüma.” Hobaje haoei sao to laukei, “Ngeibü khua khulou shen nyet neia takyoa longa hoba kho kaangkhühtham shenyoa longa kheijinei ngo hau akiko aplabü hoba lubü müt tegü yeilabü.”

¹⁴Hibü hao yepan kijinei Delilaei khulou shen nyet kho neia takyokei; hoba khübü kho saoei kaangkhühtham phenyokei; hoba hao to laukei, “Samson Filistiabü no lapla louada!” Lausikei yepbü ka hao pikei, hoba nei kong, jajin natjin hoba jim senlangkei.

¹⁵Hobaje saoei hao to laukei, “Kaibü maangpon kü yoa akinyu nyi lai ngei no sanouda dogo lenenla? Nyi ngo semnei aweasüng, hoba nyi kaibü hau yaangbü lanei ki, kü la alenda.”

¹⁶Hobaje ladang saoei hao chalou angbou aeibou thungeikei, haoeibü soushou oan sheman apbei.

¹⁷Hobaje haoei sao la haoeibü maangpon pendou ngetikei, hoba sao to laukei, “Khujin ladangkei ngeibü khua jinan achüh. Aishanga ngeibü nyueibü nyusem ka ngo Mühghaü shanga Nazarit ki. Ngeibü khu shuan apalonga, kheijinei ngeibü hauei ngo apyolabü, hoba ngo hau akiko aplabü, hoba lubü müt tegü yeilabü.”

¹⁸Ladang Delilaei sao to haoeibü maangpon pendou lena dogo chühenkei, saoei Filistiabü leiyeibü shuong ngala hautiko laukei, “Touje kaiyanga, aishanga haoei kü la haoeibü maangpon khümbo lena.” Kheijinei Filistiabü leiyeibü shuong pendou sao jungto longkei, hoba haoeneibü ika nam kho jungan loukei.

¹⁹Hobaje saoei hao saoeibü youshia yeptikei, hoba saoei müt che ngakei hoba hao la haoeibü khua khulou shen nyet kho shuan aptikei. Kheijinei saoei hao khon kutila khangkei, hoba haoeibü hau satkei.

²⁰Hobaje saoei laukei, “Samson, Filistiabü no lapla louda!” Hobaje ngakbü ka hao pienkei hoba laukei, “Ngo nyishou tegü satan aplabü hoba ngo lolo hopatham kilabü.” Lausikei BUNYUBOUei hao apyoa dogo haoei ange.

²¹Hobaje Filistiabüei hao lapjung louan, haoeibü nyek phekan apbukei, hoba Gaza to hao leijung yankei hoba chinam namlühei khühkei hoba thüngshanga hao la youshou nittikei.

²²Lausikei khu shuan apan haoeibü khua nyibou khulou yemla khangkei.

²³Hobaje Filistiabü leiyeibü shuongei haoeneibü mühghaü Dagon la lembü yaangbü lemla hoba olinyola kambei; aishanga haoenei laukei, “Seneibü mühghaüei seneibü dangbou Samson sen ik to kua!”

²⁴Hobaje mütshuongei hao hapjinei haoenei haoeneibü mühghaü nyen sangkei, aishanga haoenei laukei. “Seneibü mühghaüei sen la seneibü dangbou hoba seneibü kaodak leilukubou, aoei sen juong haitikei hao kua.”

²⁵Hobaje haoeneibü maangpon olinyoko kijinei, haoenei laukei, “Sen shanga louyola Samson ngaashi.” Hibü haoenei thüngshang ka Samson ngakei, hoba haoen thedanga hao louyojayola yeitikei. Hobaje haoenei hao thaonyu kanglanga lotikei.

²⁶Hobaje Samsonei haoeibü ika jenan kibou nashou khoto laukei, “Ngo nongla shanga chem thungetbü thaonyu kho kü la peman chühtishi.”

²⁷Tou chem kho bousu yaksaei shenan kikei; hoba Filistiabü songdakbü pendou khünei kikei, hoba chemdaka bousu yaksa hajar sem thüng Samson louyola lebü chühko kikei.

²⁸Kheijinei Samsonei BUNYUBOU to welaukei, “Ngei ka to sudajada, ngo damenkaima, hoba hau kitikaima, ngei ka to sudajada, toubü ho ong, O Mühghaü, khei ngeibü nyek penyi shanga ngei Filistiabü to phoklamlabü lele.”

²⁹Hobaje Samsonei chem thungetan kibü chenyu thaonyu penyi to hatlepbei, hoba haoei khübü to nongetkei, che haoeibü mae ikei hoba che kho nanae ikei hatlepbei.

³⁰Hobaje Samsonei laukei, “Filistiabü yoa ngo haitikai.” Hobaje haoeibü hau pendouei hao khüpjung koukei, hoba chem kho songdakbü shuong hoba khüto adan kibü pendou thük to atkei. Hibü langkei kijinei haoei lajuche haitikei, khotoje hao haijinei haitibü juongbou kikei.

³¹Kheijinei haoeibü jaisina hoba haoeibü chempen pendou louyenkei, hoba hao sunglangkei, hoba hao sungjung angan Zora hoba Eshtaol kanglanga haoeibü bou Manoaeibü heea hao khünkei. Haoei po saoche Israel matjembei.