Read Chang Naga MATJEMBÜSHUONG 18 Bible Online

MATJEMBÜSHUONG 18 - Chang Naga bible

MATJEMBÜSHUONG 18

¹Khubü chaloua Israela Choba akitei, hoba khübü chaloua Dan phangei haoen jembü kila shanga kishang phet che lambo kikei; aieilausi kho chalou sühko Israel phang yoa haoeneibü phet aikei haoen jungto alouko kiteikei.

²Hibü Danbüei haoen phang lühbak khümbo ka maangkaangbü müt ngao, Zora ka hoba Eshtaol ka kaonyek pheila hoba shuchühko paila hautikei, hoba haoenei haoen to laukei, “Hauashi, hoba kaodak kho kaikaijembo paiashi.” Hobaje haoenei Efraim shongh kaodak, Mikaeibü chem to loukei, hoba khünei shaikei.

³Haoen Mikaeibü chema kijinei haoenei Levibü heshouboueibü ngüh shenkei. Hobaje haoen sepeian hao to laukei, “Aoei no hato leian loukei? Hanei no ai kümda? Hanei kaibü kümsilei ai?”

⁴Hobaje haoei haoen to laukei, “Mikaei kü to ho tegü kümkei, haoei ngo jekthetan phokei, hoba ngo haoeibü ungshedbou la yeian kia.”

⁵Hobaje haoenei hao to laukei, “Künei ka to sudajada, kün haubü kho thük hapla si ühüplaje Mühghaü ka ngetishima.”

⁶Hobaje ungshedbouei haoen to laukei, “Haksoa haushi, kan haushanga BUNYUBOU kia.”

⁷Hibü müt ngao kho bangjung haukei hoba Laish to loukei hoba khünei kibü mütshuong hapbei. Haoen lai Sidonbü tegü sangsemetnyu hoba khümetangetan kikei kho hapbei; aishanga khonei haoen to amaibü kümlabü lele hau akitei hoba haoen Sidonbü ka saabüa kikei, hoba müt aotokei ai phenyoan aki.

⁸Hobaje ladang haoen jaisinasi shuong jungto Zora si Eshtaol to loukei; haoeneibü jaisinaei haoen to laukei, “Kan haubü ailai ong yingkei?”

⁹Hobaje haoenei laukei, “Meimeiashi, Laish shila sen angkho, aishanga künei kaodak kho hapa; hoba chühashi, kho aeibou maiakei. Kan semetham kilep lo? Hauan kaonyek kho lela tesuktedem.

¹⁰Kan ladang haulaje küpjemetnyu kibü kaonyek che to loulabü hoba kaonyek kho yaang; aieilausi Mühghaüei kho kan la kua; kaodaka kibü aieikei amühlabü kaonyek che ki.”

¹¹Hobaje Zora hoba Eshtaol ka Dan chempen müt saongao lak wapyola lason hele lean haukei.

¹²Hobaje haoen angkei hoba Jihudaa Kiriath Jearima shaikei; hibü tat sühko kho kaoen to haoenei Mahane Dan dogo lauda; chühashi, kho Kiriath Jearim phainei ki.

¹³Hobaje kho ka haoen Efraim shongh kaodak danko haukei, hoba Mikaeibü chem to loukei.

¹⁴Kheijinei Laish kaodak pheila haubü müt ngao khoei haoeneibü jaisinasi shuong to laukei, “Ungshedbou saopobü neisimei che hoba terafim hoba chandinam tühnyinbüei yaübü heangsho noksa che kia dogo kanei angekei lo? Hibü tou kanei ai kümlaje damanchühashi.”

¹⁵Hobaje haoen thiaeka sepeikei hoba Levibü heshoubou Mikaeibü chem to loukei, hoba hao to lai kije phekei.

¹⁶Hobaje müt saongao lak, aoyou Dan shousi shuong kikei, haoen wapyobü hele lean bakhün to atshanga lokei.

¹⁷Hobaje kaonyek shuchühla haubü müt ngao kho angkei hoba thi aeka atkei, hoba heangsho, ungshedbou saopobü hele, hoba terafim kho, hoba tühnyinan kümbü heangsho noksa kho sungbakei; hoba ungshedbou kho bakhün to atbü lamnyua wapyobü hele lebü müt saongao lak yo khünei lokei.

¹⁸Hobaje ladang khübü kho Mikaeibü chem to atkei, hoba heangsho, ungshedbou saopobü hele terafim hoba tühnyinbü noksa sungbakei, ungshedbouei haoen to laukei, “Kan ai kümda?”

¹⁹Hobaje haoenei hao to laukei, “No sangsembo kiashi, kaibü ikei kaibü sembung yemlepashi, hoba kün yo to kaiya, hoba no küneibü bou che hoba ungshedbou che yingashi. Ka shanga müt cheeibü chema ungshedbou yeila maibou si ayingsi Israela phang che hoba chung che thüka ungshedbou yingla maibou?”

²⁰Hobaje ungshedbou maang olinko kikei, hoba ungshedbou saopobü hele terafim hoba heangsho jungan mütshuong yoa haukei.

²¹Hibü haoen sepeian bangjung haukei, hoba nashou hanbü hoba samkeisamuk hoba peisilei shuong haoen thedanga phokei.

²²Ladang Mikaeibü chem ka haoen longche haukei, Mikaeibü chem nyangko kibü mütshuong liko yoshaikei, hoba Dan shousi shuong kho laphetkei.

²³Hobaje haoenei Dan shousi shuong to ngekkei, hoba haoenei haoeneibü thenyek sepeikei, hoba Mika to laukei, “Shuong hatetche loulabü lele no aiei khonsakda?”

²⁴Hobaje haoei laukei, “Kanei ngei kümbü mühghaü shuong künlangda hoba ungshedbou leian hauda, hoba ngeije ai jouan ki? Kholonga kanei aila kü to, ‘No aiei khonsakda’ dogo pheda?”

²⁵Hobaje Danbü shuongei hao to laukei, “Maangsak yembü müt atei ka to meitisi no kaibü langkei chemdang maubüla kün yoa ngüh tüang.”

²⁶Kheijinei Danbü kho haoeneibü lam to haukei, hoba haoen yongko hau kibü dogo Mikaei chühensi haoeibü chem to sepeinyu ngaikei.

²⁷Hobaje Mikaei ai kümbei, kho jungan hoba haoei ungshedbou leian Danbü sangsembo küpjembüa kibü mütli jungto Laish to loukei, hoba inei haoen thükenkei, hoba haoenei sangnyu wanei jikan apbei. Hobaje khúmenbü akitei, aieilausi kho Sidon ka lounyu bangan kikei, hoba aotokei phenyoan akitei; hoba kho Beth Rehob nyangko kibü yomanga kikei. Hobaje haoenei sangnyu kümbei hoba khünei kikei.

²⁹Hobaje sangnyu nyen kho haoenei haoeneibü bou Dan, ao Israela bukkei, haoeibü nyen phaika Dan dogo nyenkei; lausikei shaanglaje sangnyu nyen kho Laish kiteikei.

³⁰Hobaje Danbüei haoenei lemla shanga heangsho kho phokei; hoba Gershomeibü shou, hoba Mosaeibü shi Jonathan khünei ungshedbou kümbei; hoba mütshuong langsenbü to ohaushongko haoeibü shousi shisi shuong haoeneibü ungshedbou kikei.

³¹Hibü Shiloa Mühghaüeibü chem lalokche kikei, khülokche Mikaeibü heangsho kho haoenei phokei.