Read Chang Naga MATJEMBÜSHUONG 19 Bible Online

MATJEMBÜSHUONG 19 - Chang Naga bible

MATJEMBÜSHUONG 19

¹Khübü chaloua ladang Israela choba akitei, Levibü che Efraim shongh kaodak thon aenei hauan kikei; haoei Bethlehem Jihuda ka thangnyu che sungkei.

²Hobaje thangnyuei hao to maangpokkei, hoba Jihuda a kibü Bethlehema bou chem ka sao satan apbei hoba lit lei thüng khünei kikei.

³Hobaje saoeibü lao meimeikei, hoba sao to sukojako joyoan sao nyibou leian loula sao phaito haukei. Hao yoa hao haoeibü sambü hoba gadu tang che kikei. Hobaje hao saoeibü bou chem to loukei, hoba ladang yaksanyueibü bouei hao hapbei, haoei olinko hao to haüyola loukei.

⁴Hobaje haoeibü kou yaksanyueibü bouei hao sühtikei, hoba hao yoa chalou semnyet thüngkei, hibü haoenei shaukei- yungkei, hoba khünei kikei.

⁵Hobaje leibounyeta ngeyang enyu meimeikei hoba haula lamlekei, lausikei yaksanyueibü bouei haishoubou to laukei, “Wentek shishoei kaibü maanglemashi hoba kho phaia ong kan hautilabü.”

⁶Hibü haoen setkei, hoba haosi ham liko shaukeiyungkei; hoba yaksanyueibü bouei müt khoto laukei, “Ngei sudajada, hehoat dogo kian taoje khei ong kishi hoba kaibü maang olinko kishi.”

⁷Hobaje müt kho haula lamlekei, lausikei haishoubouei hao to sukeijakei, hoba khünei hao toukei thüngkei.

⁸Hobaje ngaobounyet nyeyang enyu ungla meimeikei, hoba yaksanyueibü bouei laukei, “Ngei kato sudajada, no shauayungashi hoba chakung angom shongko haiteishi;” hoba haosi hamei shaukeiyungkei.

⁹Hobaje ladang müt kho haula meimeikei, hao hoba thangnyu hoba haoeibü sambü, haishoubou, yaksanyueibü bouei hao to laukei, “Chühashi, tou chasem sühda, langyang sünga haiteishi, dogo ngei sudajada, chühashi, chalou danda hanei otashi, hoba kaibü maang olinko kishi, hoba ngenet enyu meimeishi, hoba chem to hauashi.”

¹⁰Lausikei müt khoei teyepbho dogo laukei, hao meimeikei hoba bangjung haukei, hoba Jebus thedang ae (kho Jerusalem) sühko loukei, hao yoa gadu onkünbü tang che, hoba thangnyu hao yoa kikei.

¹¹Haoen Jebus nyangko kijinei chalou satkhüman kikei, hoba sambouei bunyubou to laukei, “Tou kaiya, sen Jebusbü sangnyu to sepeikho hoba khünei otkho.”

¹²Hobaje haoeibü bunyubouei hao to laukei, “Aoyou Israelbü aying haoen yenbou sangnyu aeto asepeilep; lausikei sen Gibea aeto haukho.”

¹³Hobaje haoei haoeibü sambü to laukei, “Kaiya, sen khübü che ayingsi chenei Gibea ayingsi Ramaa yepbho.”

¹⁴Hibü haoen haoeneibü lamnyu to haukei; hoba haoen Benjamineibü Gibea nyangko kijinei chanyu nepbei.

¹⁵Hobaje haoenei Gibea khünei hauan sühla sepeikei. Hobaje hao atkei, hoba sangnyu lambheka setkei; aishanga aoeikei haoen haoeneibü chem to aleiyet.

¹⁶Hobaje chühashi, nangnak baushi che sek ka kümbalei ka lungko kikei; müt kho Efraim shongh kaodak ka kikei, hoba Gibeaa homan kikei, hoba khünei kibü shuong kho Benjaminbü kikei.

¹⁷Haoei haoeibü nyekei chühangtikei, hoba sangnyu khongnyua yenbou paibü kho hapbei; hoba baushibou khoei laukei, “No lato hauda hoba no lae aeka louda?”

¹⁸Hobaje haoei hao to laukei, “Kün Jihudaa kibü Bethlehem ka Efraim shongh kaodak thi aeto haukei, ngo thi aeka ki, hoba ngo Jihudaa kibü Bethlehem to haukei, hoba ngo tou ngeibü chem to hauda, hoba ngo leiyetla müt aokei aki.

¹⁹Khei yingsikei küneibü gadu shanga youho si shausiyung kia; hoba kü shanga kaibü samnyu hoba no khangenbü shuong yoa kibü heshou shanga wentek si ih kia, aieikei shalean aki.”

²⁰Hobaje baushibou khoei laukei, “Ka yoa hakso kishi; no khambü pendou ngei nongnaelabü, khonga ong tesüh.”

²¹Hibü haoei hao haoeibü chem to leiyetkei hoba gadu la shausiyung okkei, hoba haoenei haoeneibü you makkei hoba shaukeiyungkei.

²²Haoen maang olinko kijinei, chühashi, sangnyubü sousiwat mütshuongei chem kho komlepbei; hoba koukapa kokeikei; hoba haoenei chem bunyubou baushibou to laukei, “Kaibü chem to lotbü müt kho ao yingkeije khünei jungeila leianba.”

²³Kheijinei chem bunyubou kho haoen jungto tangto angan laukei, “Touh! ngeibü jaisinasi shuong, hainyu amaiko tejungei; ho müt kün chem to tou loubü ki, amaibü tekümma.

²⁴Chühashi, hanei hao thangnyu hoba kü shou saosüngbü medei che kia, ngei haosi leian longkukho; hoba kanei haosi jungeiashi, hoba haosi kan maang leashi; lausikei ho müt toje amaibü ai teküm!”

²⁵Lausikei müt shuongei hao to ngüha ale; hibü müt khoei haoeibü thangnyu kho senjung loukei hoba haoen jungto leian angkukei; hoba haoenei sao jungeikei, hoba ngeyang sühko sao to aseasangko jungeikei; hoba ladang langesaokei haoenei sao litikei.

²⁶Kheijinei yaksanyu ngeyang enyu loukei, hoba saoeibü lao kishanga müt khoeibü koukhüna lang angeshongko phetetnyu yepbei.

²⁷Hobaje saoeibü lao kho ngeyang laksepbei, hoba koukhün kho ipbei, hoba haoeibü lam to haula longkei hoba chühashi, yaksanyu, haoeibü thangnyu kho saoeibü ik sangchimaanga koukhün junga lengtian kikei.

²⁸Hobaje haoei sao to laukei, “Piashi, haukho.” Lausikei ajongai; kheijinei haoei sao gadu taaka künan müt kho meimeian haoeibü chem to ungkei.

²⁹Hobaje ladang hao haoeibü chem to loukei haoei in che sungbakei hoba haoeibü thangnyu hatlepan phejan anthüknyi la wapnyinan Israel phang leikhu leithang pendou aeto hautikei.

³⁰Hobaje kho hapbü pendouei laukei, “Ijep kaodak ka Israel longbü chalou ka tat sühko ho tegü ladangkei ühaüthük hoba haüthükko alou; ho shanga damanchühashi, sangkuashi hoba lenyoashi.”