Read Chang Naga MATJEMBÜSHUONG 2 Bible Online

MATJEMBÜSHUONG 2 - Chang Naga bible

MATJEMBÜSHUONG 2

¹Tou BUNYUBOUeibü hangangbü Gilgal ka Bokim to angkei; hoba haoei laukei, “Ngei kan Ijep ka angtikei, hoba ngei kaneibü pisibou la thekubü kaodak to kan leian loukei; hoba ngei laukei, ‘Ngei kan to theyolanyobü ladangkei aleilulabü;’

²hoba ho kaodaka kibü to kanei theyolan- yobü akümjan; kanei haoeneibü lemshang leilukujan. Lausikei ngeibü ngüha ale. Aila kanei ho kümbei?

³Hibü ngeikei lauda, ‘Kan thedang ka ngei haoen shian asattilabü, lausikei kan shanga haoen dangbou kilabü, hoba haoeneibü mühghaü shuong kan shanga sung che kilabü.’”

⁴Ladang BUNYUBOU khuthük hangangbüei habü ngüh Israel shousi pendou to joyokei, mütshuongei ngüh longkei hoba haapbei.

⁵Hobaje haoenei kho kaonyek to Bokim dogo laukei, hoba khünei haoenei BUNYUBOU la haitibü lembü kukei.

⁶Ladang Joshuaei mütshuong lintikei, Israelbü wekoei lulueibü phet kibü kaonyek kho lela haukei.

⁷Hobaje Joshua salang sünga hoba jaishou shuong aoyou Joshua phainei langkei kikei, hoba aoyouei BUNYUBOUei Israel shanga kümsilei yaangbü kümbü hapbei, haoeneibü salang sünga Israelei BUNYUBOU khangenkei.

⁸Hobaje Naneibü shou Joshua BUNYUBOU khangenbou, salang po saongao to saochea haikei.

⁹Hobaje Gaash shongh chanep aephei Efraim shongh kaodaka haoeibü phet Timnat Heres leilang phanga haoenei hao khünkei.

¹⁰Hobaje kho meten pendou haoeneibü pisibou jungto yoshaikei; hoba haoen phainei BUNYUBOU angebü ayingsi haoei Israel shanga kümbü angebü meten longkei.

¹¹Hobaje Israel shousi shuongei BUNYUBOU thedanga ai amai kho kümbei, hoba Baal shuong khangenkei.

¹²Hobaje haoen Ijep kaodak ka leian longbü haoeneibü pisibou Mühghaü BUNYUBOU inletnyu apbei, hoba lubü mühghaü phai sembei, haoen kaijembo kibü mühghaü shuong, hoba haoen lolo khübü to khüpetkei, hoba haoenei BUNYUBOU khauangtikei.

¹³Hobaje haoenei BUNYUBOU inletkei hoba Baal hoba Ashtarot khangenkei.

¹⁴Hobaje Israel khulimbo BUNYUBOU khauangkei. Hobaje soshausoyungbü la haoen soshausoyungtikei. Hobaje haoei haoen kaijembo kibü dangbou labou shuong la haoen yaakkei, hibü touje haoen dangbou thedanga aloenen.

¹⁵BUNYUBOUei haoen la maangsangla kubü tegütham hoba BUNYUBOUei haoen to thebülanbü tegü haoen lato ong haukei, BUNYUBOUeibü ik haoen khulimbo amaibü shanga kikei, hoba haoen ailai ong aleko kikei.

¹⁶Kheijinei BUNYUBOUei matjembü shuong longtikei, aoyouei haoen soshausoyungbü dan ik ka haoen püetkei.

¹⁷Hobaje kho khei yingsikei haoenei matjembü shuong to ngüha ale; aishanga lubü mühghaü shuong phaito pejapelako haukei, hoba haoen lolo khübü to khüpetkei. Haoeneibü pisibou aoyouei BUNYUBOUei sakkubü ngüha leko kikei haoen paibü lamnyu ka tongde haoenei sepeian satan apbei hoba haoenei kho tegü aküm.

¹⁸Hobaje ladang ong BUNYUBOUei haoen shanga matjembü longtikei, kheijinei matjembü yoa BUNYUBOU kiteikei, hoba haoeneibü dangbou ik ka matjembou salang sünga püetkei, aishanga aoyouei haoen khonkutikei hoba khonsaktikei kho shangabü ngühbü ngühlangei meitiko BUNYUBOUei onouan apbei.

¹⁹Lausikei ladang ong matjembü haikei, haoen sepeinyu satkei, hoba haoeneibü pisibou to kei amaibou kümbo lubü mühghaü shuong phai hauko haoen to khangenko haoen to khüpetkei, haoenei kümbü shuong ka ayingsi haoen maangpon kaangbü ka haoen anang.

²⁰Hobaje Israel khulimbo BUNYUBOU khauangkei, hoba haoei laukei, “Ho mütliei ngei haoeneibü pisibou la sakkubü ngeibü thebülanbü leilua, hoba ngeibü ngüha alebü,

²¹ngeikei tou ka jaüanje Joshuaei hao haijinei apyobü phang che ongkei haoen thedang ka shian asattilabü.

²²Khoei haoen danko haoeneibü pisibousi shuongei tegü BUNYUBOUeibü lamnyua paiasaoje Israel shousi shuong takteilabü.”

²³Hibü khübü phang chemalaje shian üpbo BUNYUBOUei apyokei. Hobaje haoei haoen Joshua ik to khümbo aku.