Read Chang Naga MATJEMBÜSHUONG 20 Bible Online

MATJEMBÜSHUONG 20 - Chang Naga bible

MATJEMBÜSHUONG 20

¹Kheijinei Israel shousi shuong pendou longkei hoba Dan ka Beersheba sühko Gilead kaodak yoan Mizpaa BUNYUBOU jungto müt che tegü ong shuong yoshaikei.

²Hobaje Israel phang mütli pendou thüka kongnyu shuong Mühghaü mütli kamshaishanga haoen lolo yokei, in jungbü hajar saonyi.

³Ladang Benjamineibüei Israel mütli Mizpa süha dogo ditkei, kheijinei Israelbüei phekei, “Ho amaibü kümsilei ho lai haüthükkeije kün la lenbüshi.”

⁴Hobaje Levibou yaksanyu haitibou laoei laukei, “Benjamin shangabü Gibea to ngo loukei, ngo hoba ngeibü thangnyu sühla loukei.

⁵Hobaje Gibeabüei ngo khulimbo meimeikei, hoba nangnak ngo kaijembo chem kho komlepbei,; haoenei ngo haitila loukei, hoba ngeibü thangnyu to amaibü kümbei hoba sao haia.

⁶Hobaje ngei ngeibü thangnyu künbakei hoba netla yeiko jemnyinkei hoba Israel phetphan kaonyek pendou to sao hautikei; aishanga haoenei Israela mangsenlabü hoba pejapela jungeia.

⁷Chühashi, kan Israelbü kan pendou, kanei hanei songsido hoba dambü lenashi.”

⁸Hobaje müt pendou müt che tegütham loan laukei, “Sen che ongkei lulueibü neichem lambo ohaulabü.”

⁹Lausikei tou Gibea to senei ho hai kümlabü; hoba kho khulimbo tan tan anglabü.

¹⁰Israel phang pendou ka saongao weko ka an hoba hajar weko ka saongao hoba hajar an weko ka hajar che, mütshuong shanga shausiyung sungbala shanga hoba haoen ladang loulaje, haoenei Benjamineibü Gibeaa Israel to pejapelabü kümbü thüng kho haoenei kümlabü.

¹¹Hibü Israelbü bousu pendou müt che tegü yeian sangnyu khulimbo kamshaikei.

¹²Hobaje Israelbü chemdang shuongei Benjaminbü mütli pendou peanchühko müt hautiko laukei, “Kan yoa ho ai kümsilei amaibü haüthükkei?

¹³Tou Gibeaa sousiwat mütshuong kho künei haoen haitilabü hoba Israel ka shabü sungngaila shanga khübü kho litian apashi.” Lausikei Benjaminbüei haoeneibü jaisina Israelbü ngüha ale.

¹⁴Hobaje Benjaminbüei Gibea sangnyu shuong ka Israel khulimbo lason to haula liko loukei.

¹⁵Hobaje kho chaloua sangnyu shuong ka Benjaminbüeibü shousi shuong in jungbü hajar saoto lak kikei; kho Gibeaa kibü pienbü saongao nyetje ayoko.

¹⁶Khübü pendou yoa lanthükbü shanan pienbü müt saongao nyet kikei; mütpem wekoei khuloupemei ongkei atheko püklaangsenei tetla thükan kikei.

¹⁷Hobaje Israel mütshuong, Benjamin ayoko in jungbü hajar saongao lei kikei, khübü pendou wapyobü müt kikei.

¹⁸Israel mütshuong meimeikei hoba Bethel to angkei, hoba Mühghaü to, “Benjaminbü to wap- yola kün laobou shaang angla?” dogo phekei. Hobaje BUNYUBOUei laukei, “Jihuda shaang anglabü.”

¹⁹Kheijinei Israelbü ngeyang enyu meimeikei hoba Gibea khulimbo shaikei.

²⁰Hobaje Israelbüei Benjamin khulimbo wapyola haukei, hoba Israelbüei haoen khulimbo Gibeaa wapyo lothetko lokei.

²¹Hobaje Benjaminbü Gibea ka longkei, hoba khünyet kho Israelbü hajar saonyi haitikei.

²²Lausikei Israelbü shuong hau kingaikei hoba khangnyet loshanga lokei.

²³Hobaje Israel mütliei BUNYUBOU thedanga chasem sühko haapbo BUNYUBOU to pheko laukei, “Küneibü jaisina Benjaminbü khulimbo künei lason wapyola toukei haulep sai?” Hobaje BUNYUBOUei jongaikei, “Haoen khulimbo angashi.”

²⁴Hibü Israel mütli Benjaminbü khulimbo nyibounyet loukei.

²⁵Hobaje nyibounyetkei Benjaminbü haoen khulimbo Gibea ka longkei, hoba Israelbü hajar anthükset haitikei; khübü pendou in jungbü ong kikei.

²⁶Kheijinei Israelbü pendou sepai tan pendou BUNYUBOU jungto angkei hoba Bethel to louan haapbei. Haoen khünei BUNYUBOU thedanga setkei; khünyet chasem sühko nyengkei hoba BUNYUBOU thedanga juokbü lembü hoba sangmai lembü kukei.

²⁷Hobaje Israelbüei BUNYUBOU to phekei (aishanga Mühghaüeibü saopobü Ngühkhüm Busen khünei kikei.

²⁸Hobaje Aroneibü shou, Eleazareibü shou Finehasei kho thedanga khübü chaloua khangenkei) hoba laukei, “Toukei küneibü jaisina Benjaminbü khulimbo anglep sai, si khüae lela?” Hobaje BUNYUBOUei laukei, “Angashi, aishanga ngietje ngei hao kaneibü ik to kulabü.”

²⁹Hibü Israelei Gibeaa kaijembo la thoan haiteikei.

³⁰Hobaje Israelbüei sembounyet Benjamin khulimbo angkei, hoba lubü chaloua tegü ong Gibea khulimbo lason leithetnyu lokei.

³¹Hobaje Benjaminbüei mütli khulimbo haukei hoba sangnyu ka linjung longan kikei hoba lubü chaloua tegü haoenei khongthua at, Bethel to angshang aenei at hoba Gibea to angshang khongthua at, dogo Israelbü müt khujin thüng haitila khangkei.

³²Hobaje Benjaminbüei laukei, “Shaangla tegütham ong haoen sen thedanga tuongda.” Lausikei Israelbü shuongei laukei, “Sen atkho, hoba sangnyu ka haoen lamkhong to linjung loutikho.”

³³Hobaje Israelbü pendou haoen kishang ka meimeikei hoba haoen lolo Baaltamara leithetan lokei hoba Israelbü shuong la thoan kibü shuong haoen thoshang ka, khei Maare Gibea ka longkei.

³⁴Hobaje Gibea khulimbo Israel pendou ka pienbü hajar an loukei, hoba lason kho aeibou kaangan apbei; lausikei Benjaminbüei lounyu akiko haoen thükto thushed lotlabü dogo angeko kikei.

³⁵Hobaje BUNYUBOUei Israelbü la Benjamin thüktikukei, hoba khünyet Israelbüei Benjaminbü hajar saoto ngaoto saongao shemtikei; khübü pendou in jungbü ong kikei.

³⁶Hibü Benjaminbüei haoen athük dogo ngekei. Aishanga Israelbüei Benjaminbü la younak kukei, aieilausi Gibeabü khulimbo la thotian phokubü to haoenei maanglem phokei.

³⁷Hobaje la thoan kibü shuongei tongde leithetkei, hoba la thoan kibü shuong longan sangnyu pendou inei wapetkhümbei.

³⁸Hobaje Israelbü si thoan kibü kanglanga shenla ngelabü sangkubü kho haoenei sangnyu ka wankhük yaang tujung angtilabü shanga kiteikei.

³⁹Hobaje Israelbü lason to atan lokei hoba Benjaminbüei Israelbü thükko müt khujin thüng haitila khangkei, aishanga haoenei laukei, “Shaangbü lason tegü ong haoen sen thedanga tuongda.”

⁴⁰Lausikei ladang sangnyu ka wankhük sangmei hima tujung longkei, Benjaminbüei haoen phai to chühngaikei hoba sangnyu khümbo ka wankhük angko hapbei.

⁴¹Kheijinei Israelbü se- peikei hoba Benjaminbü mokkei, aishanga haoen thükto thushedei sühda dogo chühenkei.

⁴²Hibü Israelbü ka thenyek sepeian yamae to satkukei, lausikei lasonei haoen laphetkei; hoba aoyou sangnyu ka longkei, Israelbüei kanglanga haoen shemtikei.

⁴³Benjaminbü kho haoenei kailepbei, hoba haoen shijung haukei, hoba chaangbou Gibea thedang ae sühko nakeila leko yantikei.

⁴⁴Hobaje Benjaminbü hajar anthükset tuongkei; pendou laakbü ong kikei.

⁴⁵Hobaje haoen yamae sepeian Rimmon laang lambo satkei, hoba haoen hajar ngaoje lamkhonga haitikei; hoba haoen Gidom sühko khaplapbo shikei, hoba haoen hajar nyi haitikei.

⁴⁶Hibü khünyet Benjaminbü in jungbü haitibü pendouei hajar saoto ngao; haoen pendou laakbü ong kikei.

⁴⁷Lausikei müt saongao lak ngaikei hoba yamae Rimmon laang lambo satkei hoba Rimmon laangpoba lit lei kikei.

⁴⁸Hobaje toukei Israelbüei Benjaminbü khulimbo ngaikei hoba haoenei hapbü pendou, khei bousu, yaksa, nashousi hoba shatsinam khümbo haikei. Hobaje haoenei sangnyu khümbo wanei thean apbukei.