Read Chang Naga MATJEMBÜSHUONG 21 Bible Online

MATJEMBÜSHUONG 21 - Chang Naga bible

MATJEMBÜSHUONG 21

¹Tou Israelbüei Mizpaa sen aoeikei lulueibü yaksa shou Benjaminbü la yakla lela akulabü dogo theyolanyoan kikei.

²Hobaje mütshuong kho Bethel to loukei hoba khünei Mühghaü thedanga chasem sühko setkei, hoba haoen ngüh longko aeibou haapbei.

³Hobaje haoenei laukei, “O BUNYUBOU, Israel Mühghaü, Israela tat chung phang cheei apenko ho aila Israel to haüthükkei?”

⁴Hobaje nyibounyet kho mütshuong tongde meimeikei hoba khünei lemshang kümbei hoba juokbü lembü hoba sangmai lembü kukei.

⁵Hobaje Israelbüei laukei, “Israelbü phang tan yoshaishang to BUNYUBOU jungto üangbü Israelbü phang yoa ao ki?” Aishanga BUNYUBOU jungto Mizpa to ao üanglaje hao shanga theletlanletbü yaang kikei, hoba laukei, “Hao maimaitham haitilabü.”

⁶Hobaje Israelbü shousi shuongei haoeneibü jaisina Benjamin shanga phokaiko dambei hoba laukei, “Tat Israel ka phang che wapan apa.

⁷Haoen jouan kibü shanga yakla lela senei ai kümla? Aieilausi shousi shuong yak shanga akulabü dogo BUNYUBOU nyen phongko senei thealana.”

⁸Hobaje haoenei laukei, “Israelbü phang yoa BUNYUBOU jungto Mizpa to üangbü che kia sai?” Hobaje chühashi, Jabesh- Gilead ka shuong kamshaishang to aokei alou.

⁹Aishanga ladang müt pakkei chühashi, khünei Jabesh-Gileada kibü aokei akitei.

¹⁰Hibü shuongei khüto maang kaangbü müt hajar anthük nyi hautikei hoba haoen la sakkuko laukei, “Hauashi hoba Jabesh- Gileada kibü shuong inei yaksa si nashou hanbü yoan haitiashi.

¹¹Hobaje kanei bousu phai pendou hoba bousu to jambü yaksa pendou khümbo lemailela mautiashi.”

¹²Hobaje haoenei Jabesh-Gileada kibü yoa bousu to ajambü saüsüngbü medei saongao lei hapbei, hoba Kanana kibü Shilo shaishang to haoenei khübü kho leian loukei.

¹³Hobaje Rimmon Laanga kibü Benjaminbü shousi shuong jungto thangyenbü khümboei ngühlang hautikei, hoba haoen la sangmai ngekletkukei.

¹⁴Kho chaloua Benjaminbü sepeinyu loukei, hoba senei Jabesh-Gileadbü sao shuong aoyou langkei khümenkei, haoen la kukei, khei yingsikei, haoen shanga haoen apen.

¹⁵Hobaje mütshuongei Benjaminbü shanga phokaiko dambei, aieilausi Israelbü phang yoa BUNYUBOUei khün che yettikukei.

¹⁶Kheijinei shuonga leiyeibü jaishou shuongei laukei, “Benjaminbü ka yaksa mautikusije jouan kibü shuong shanga yak shanga lai lela?”

¹⁷Hobaje haoenei laukei, “Israel ka chung che haman üpla shanga haoen shanga Benjamin ka satenbü phet cheje kijan.

¹⁸Kheiyingsi dogokei senei seneibü shousi ka yakla lela haoen la akulabü, aishanga Israelbü shousi shuongei theyolanyoko laukei, Benjaminbü la aoei yak kulaje hao shedsikhau yingshi.”

¹⁹Hobaje haoenei laukei, “Chühashi, Shiloa po weko BUNYUBOUeibü lem che kia, khoei Bethel chanepphei Bethel ka Shekhem to angshang ae chaangbou aephei hoba Lebona chaangbou aepheinei kia.”

²⁰Hobaje haoenei Benjaminbü shousi shuong la sakkuko laukei, “Hauan semlühlaaka thoshi;

²¹hoba Shilobü sao shuong tomshang to tombotombo longa longa kheijinei kan semlühlaak ka kaiyang, hoba kan mütpem wekoei Shilobü sao shuong lulueibü yakla lela lapshi, hoba Benjamin kaodak to haushi.

²²Hobaje ladang haoeneibü nyusibou hoba jaisinaei kün to louan ngüh longlaje, khei künei haoen to laulabü, ‘Sanoudambo haoen künla sakbüma, aieilausi lasona haoen ka mütpem weko shanga künei yak asung, ayingsi kanei haoen la haoen aku; khei aying tegüje kan to shed kakan kikhoulabü.’ ”

²³Hobaje Benjaminbü shousi shuongei kho tegü kümbei, hoba haoeneibü lühbak thüng, aoyou tombei hoba aoyou haoeibü langkeia yakla lela haoen lekei, hoba haoen ngaikei hoba sangnyu shuong kümbei, hoba khünei kikei.

²⁴Hobaje Israel shousi shuongei kho chaloua kho ka bangjung satkei, mütpem weko lulueibü chung hoba lulueibü chempen jungto hoba haoen mütpem weko lulueibü phet lamjung haukei.

²⁵Khübü chaloua Israela choba akitei, mütpem wekoei lulu maang lekei.