Read Chang Naga MATJEMBÜSHUONG 3 Bible Online

MATJEMBÜSHUONG 3 - Chang Naga bible

MATJEMBÜSHUONG 3

¹Tou lajucheei Kanana wap- yobü shanga ai angekei, khei haoen danko Israelbü takteila shanga BUNYUBOUei apyobü phangshuong habü ho ki.

²Israelbü meten shuongei wapyo kho ngelabü, khei shangied ngean achühbü shuong la haoei lenla shanga ho kikei.

³Phang habü ho ki, Filistiabü bou ngao, hoba Kananbü pendou hoba Sidonbü hoba Lebanon shongha kibü Hivbü Baal Hermon shongh ka Hamat lamnyu to haushang sühko thinei kibü sühko.

⁴Hobaje BUNYUBOUei Mosa danko haoeneibü pisibou la sakkubü ngüha lela si alelaje dogo ngela haoenei Israelbü takteila shanga kikei.

⁵Hibü Kananbü, Hitbü, Amorbü, Perizbü Hivbü, hoba Jebusbü yoan Israelbü shousi shuong kikei.

⁶Hobaje haoenei haoeneibü nouyangshousi shuong yakla ngakei, hoba haoeneibü shousi la haoeneibü jembü nouyangshousi shuong kukei, hoba haoenei haoeneibü mühghaü shuong khangenkei.

⁷Hobaje Israel shousi shuongei BUNYUBOU thedanga ai amai kho kümbei, hoba BUNYUBOU haoeneibü Mühghaü maan apbei hoba Baal hoba Ashtarot khangenkei.

⁸Hibü Israelbü khulimbo BUNYUBOU khauang longkei, hoba haoei haoen Mesopotamiabü Choba Kushan Rishathaim la yaakkei, hoba Israelbüei Kushan Rishathaim po set khangenkei.

⁹Lausikei ladang Israelbü shuongei BUNYUBOU to ngekkei, BUNYUBOUei Israelbü shuong shanga khümenbou che longtikukei, Kalebeibü na Kenazeibü shou Othniel aoei haoen khümenkei.

¹⁰Hobaje BUNYUBOUeibü soushou hao thük to loukei, hoba haoei Israelbü matjembei, hao wapyola haukei. Hobaje BUNYUBOUei haoeibü ika Mesopotamiabü Choba Kushan Rishathaim kukei, hoba Kushan Rishathaim thüka haoei thük hapbei.

¹¹Hibü kaonyeka po saonyi hakso kikei. Kheijinei Kenazeibü shou Othniel haikei.

¹²Hobaje nyibou Israel shousi shuongei BUNYUBOU thedanga ai amai kho kümbei, hoba Israel khulimbo BUNYUBOUei Moabbü Choba Eglon hau kitikei, aieilausi haoenei BUNYUBOU thedanga ai amai kho kümbei.

¹³Hobaje haoei hao jungto Ammon hoba Amalekbü shousi shuong leishaikei; hoba hao haukei hoba Israel thükkei, hoba haoenei pünglong sangnyu lekei.

¹⁴Hobaje Israel shousi shuongei Moabbü Choba Eglon po anthükset khangenkei.

¹⁵Lausikei ladang Israelbü shuongei BUNYUBOU to ngekkei, BUNYUBOUei haoen shanga khümenbou che longtikukei. Nanthükbü müt che Benjaminbü Geraeibü shou Ehud; hoba Israelbü shuongei Moabbü Choba Eglon jungto hao danko khüm kukei.

¹⁶Hobaje Ehudei hao shanga jijiham akbü in che süng iknop che yaükei, hoba haoei kho mae youshia neimanga hopbei.

¹⁷Hobaje haoei Moabbü Choba Eglon la khüm kho kukei. Tou Eglon aeibou müt netthembü kikei.

¹⁸Hobaje ladang Ehudei khüm kho kukhümbei khüm jungbü shuong kho haoei ngaian aptikei.

¹⁹Lausikei haoje Gilgal nyangko laangeibü heangsho kishang ka sepeijung ngaikei hoba laukei, “O Choba, ka shanga ngei huphang ngüh che kia.” Hobaje haoei laukei, “Ngüh tüang,” hoba hao nyangko lobü pendou hao jungka angan apbei.

²⁰Hobaje Ehud hao jungto haukei, hoba hao mütpem pop- chem lubüa setan kikei. Hobaje Ehudei laukei, “Ngei ka shanga Mühghaü ka ngühlang che künbakei.” Hobaje hao haoeibü setshang ka meimeikei.

²¹Hobaje Ehudei haoeibü nanae ik kho sungenkei, hoba haoeibü mae youshi ka in kho setenkei, hoba haoeibü shimunga sepbei.

²²Hobaje in yoa singketkei atkei. Hobaje haabüei in kho naanglepbei; aishanga haoei shimung ka in kho asenen, hoba phet nujung longkei.

²³Kheijinei Ehud chem ka longkei, hoba shemjang koukap shuong kho khinkukei.

²⁴Tou hao satan phaia haoeibü sambü shuong loukei, hoba haoenei hapbei hoba chühashi, popchem shuong kho koukhinjinei khinkhüman kikei, hoba haoenei laukei, “Maimaitham hao shemjang liboua yei suda.”

²⁵Hobaje haoen phenyeman ayei shongko haoenei haiyeiko kikei, hoba chühashi, haoei shemjang kho aip, hibü haoenei lipthetlabü sungjung louan khübü kho ipbei, hoba chühashi, haoeneibü bunyubou kho shona tuongan haian kikei.

²⁶Haoen haiyoko kijinei Ehud satkei, hoba heangsho jakenbü laang kishang danjung haukei, hoba Seira to satetlangkei.

²⁷Hobaje ladang hao loukei, haoei Efraim shongh kaodak kaonyeka teklaang metkei, hoba Israel shousi shuong shongh kaodak ka hao shaangan yankei.

²⁸Hobaje haoei haoen to laukei, “Kü phai semashi, aishanga BUNYUBOUei kaneibü dangbou Moabbü kaneibü ik to kua, hoba haoen hao phai to yankei.” Hobaje Moab aei Jordan dei haübü kho kiman sungkei hoba müt che ongkei adantiko lapbei.

²⁹Hobaje kho chaloua haoenei Moabbü hajar an thüng haitikei; pendou hau kibü hoba lanthükbü ong kikei, hoba müt che ongkei asaten.

³⁰Kho tegü kho chaloua Moab kaodak Israelbü ik to lotkei. Hobaje po saolei sühko kaonyeka hakso kikei.

³¹Hobaje hao phainei Amateibü shou Shamgar kikei aoei Filistiabü saongao lak masu nangbü juei haitikei; hoba haoeikei Israelbü khümenkei.