Read Chang Naga MATJEMBÜSHUONG 4 Bible Online

MATJEMBÜSHUONG 4 - Chang Naga bible

MATJEMBÜSHUONG 4

¹Ehud haian phaia Israelbü shuongei nyibou BUNYUBOU thedanga ai amai kho kümbei.

²Hobaje BUNYUBOUei haoen Hazora songdakko kibü Kananbü Choba Jabin ik to yaakkei; haoeneibü sepai lajamleibou Sisera ao Haroshet Küksithang kaodaka kikei.

³Kheijinei Israelbü shuongei thuibü shanga BUNYUBOU to ngekkei, aishanga haoei namtongjin saongao gü kikei, hoba Israelbü shuong po saoche onou akiko khonkutikei.

⁴Tou kho jiha Lappidoteibü yak Debora, thuseinyu saoei Israel matjembo kikei.

⁵Hobaje Efraim shongh kaodak Rama hoba Bethel kanglanga Debora woulong phanga sao setko lekei, hoba Israelbü shuong matjemla sao jungto angkei.

⁶Saoei Kadesh Naftali ka Abinaemeibü shou Barak ngala hautiko hao to laukei, “Israel Mühghaü BUNYUBOUei ka la hai asakku lo? Hauashi, Tabor shongha Naftali phang hoba Zebulun phang ka kaibü mütli hajar an leishaiashi.

⁷Hobaje ngei Jabineibü sepai tan lajamleibou Sisera kan yoa Kishon shumang nyangko haüyola shanga haoeibü kailong hoba se- pai shuong leian longtilabü, hoba ngei kaneibü ik to hao kulabü.”

⁸Barakei sao to laukei, “No kü yoa haukho laua longa ngo haulabü. Lausikei no kü yoa tohaukho laua longa ngo ohaulabü.”

⁹Hobaje saoei laukei, “Ngo tükde ka yoa haulabü, khei yingsikei no laobou lama hauda khoei ka la nyenhang akulabü; aishanga BUNYUBOUei yaksa cheeibü ika Sisera yaaklabü.” Kheijinei Debora meimeikei hoba Barak yoa Kedesh to haukei.

¹⁰Hobaje Barakei Zebulun si Naftali Kedesh to ngakei, hoba müt hajar an hao phai to haukei, hoba Debora hao yoa angkei.

¹¹Tou Mosaeibü kou Heber ka bakbü Kenit bou Heber Kenitbü ka bangan kikei, hoba Kedesh nyangko Zaanannima yembu long sühko thi aedanga haoei neichem dangko kikei.

¹²Ladang Sisera to Abinoameibü shou Barak Tabor shongh to anga dogo ngetikei.

¹³Sisera nameibü kailong saongao gü Küksithang Haroshet ka Kishon shumang ka hao yoa haubü müt pendou leishaikei.

¹⁴Hobaje Deboraei Barak to laukei, “Khou; aishanga BUNYUBOUei Sisera ka kaibü ik to kubü chalou kho ho ki. Ka thedanga BUNYUBOU ohauda lo?” Hibü Tabor shongh ka Barakei hao phainei müt hajar an semtian yankei.

¹⁵Hobaje BUNYUBOUei Sisera hoba haoeibü kailong pendou Barakeibü in thedanga lintikei. Hobaje Sisera haoeibü kailong ka lotkei hoba youei satkei.

¹⁶Lausikei Barakei kailong hoba sepai tan kho Küksithangbü Haroshet shijung haukei hoba Sisera sepai tan pendou inei shemtikei, müt che ongkei ajouti.

¹⁷Lausikei Sisera Kenitbü Hebereibü yak Jael, saoeibü neichem lambo youei satkei, aishanga Hazor Choba Jabin hoba Kenitbü Hebereibü chemdang kanglanga sangmai kikei.

¹⁸Hobaje Sisera to haüyola Jael khong to longkei, hoba hao to laukei, “Kaiyeda, ngeibü bunyubou, kü jungto kaiyeda; tehüt.” Hobaje hao neichem to atkei hoba saoei neiei hao seilepbei.

¹⁹Hobaje haoei sao to laukei, “Sanoudambo kü la yunglabü dei shisho labü; aieilausi ngo deilada.” Hibü saoei sendei thung che ipbei hoba hao la yungla kukei, hoba hao küplepnyu phokei.

²⁰Hobaje haoei sao to laukei, “Neichem koukhüna loashi, hoba müt at louan ka to hanei müt at kiasai dogo phesi aki dogo laushi.”

²¹Lausikei Hebereibü yak Jaelei neichema jangbü bu che sungjung loukei, hoba saoeibü ika bungem che jungkei hoba hao jungto hangsho yankei hoba kaoa ayon shongko nyilit to thüngan jinkukei, aieilausi hüan hao maisho ngakan kikei. Kho tegü hao haikei.

²²Hobaje chühashi, Barakei Sisera shijung loujinei Jaelei hao to haüyola angkei hoba hao to laukei, “Kaiya, nyi lambü müt kho ngei ka la lenkho.” Hibü hao saoeibü neichem to atkei; hoba chühashi, khünei Sisera haoeibü nyilita neichem phenbü bu ngetan haibü mang lengan kikei.

²³Hibü kho chaloua Mühghaüei Israelbü shuong thedanga Kananbü Choba Jabin letikei.

²⁴Hobaje Israelbü shuongei Kananbü Choba Jabin amauti shongko haoeneibü ikei Kananbü Choba Jabin thüka aei aei thük hapbei.