Read Chang Naga MATJEMBÜSHUONG 5 Bible Online

MATJEMBÜSHUONG 5 - Chang Naga bible

MATJEMBÜSHUONG 5

¹Kheijinei Debora si Abinoameibü shou Barakei chia atko laukei:

²Israela leiyeibü shuongei thük hapbü shanga, maangnyu angko mütshuongei lembü kubü shanga kanei BUNYUBOU sangashi.

³Ditashi, O Choba shuong, nou haangashi, O konglebü shuong, BUNYUBOU la ngei chia atkulabü.

⁴BUNYUBOU no ladang Seir ka longkei; ladang no Edom khongthu ka longkei. Kaonyudakei lühkei, tokei mühshuong moletnyu atkei. Haü, sangmei shuongei dei sinan yantikei.

⁵BUNYUBOU thedanga shongh shuongei lühkei, khei hauan Sinai, Israel Mühghaü BUNYUBOU thedanga lühkei.

⁶Anateibü shou Shamgar chaloua, Jael chaloua thusheda müt akitei, hoba walama paibü shuongei kolama paikei.

⁷Israela sangsiyam, sangliphang la yeikei. No Debora Israela yaksa che tegü along shongko haoen thakan apbei.

⁸Haoenei mühghaü shuong pienkei. Kheijinei bakhüna wapyo kikei; Israel, hajar an yoa, Aih ayingsi aubu che ongkei haplao?

⁹Ngeibü maangpon Israel lajamleibü shuong; Aoyouei maanglansele haoen lolo lembei, haoen yoa kia. Kanei BUNYUBOU sangashi.

¹⁰Kan gadu thupaibüa setbü shuongei kho shanga lenashi. Kan shona imbü nei maibüa setbü shuong, Hobaje kan lama paibü shuong.

¹¹Dei khushang ka, laujin kipbü ngühlang ka lounyu bangan. Khünei BUNYUBOU thükbü shuong shanga nopngaiko laulabü, Khei Israela sangkhong thüksimin kümsilei shanga. Kheijinei BUNYUBOUeibü mütli shuong bakhün to yankei.

¹²Piashi, Piashi, Debora; Piashi, Piashi, chia che atkuashi. Meimeiashi, Barak, thüngbü shuong leilangashi, O Abinoameibü shou.

¹³Kheijinei yaangenbü shuong, joubü paijung louyankei. BUNYUBOUeibü mütli, hao shanga hau yaangbü khulimbo louyankei.

¹⁴Efraim ka khüto haoen meimeijung Amalek yomang to haukei; Benjamin kaibü mütli yoa ka phaito sembei. Makir ka sepai leiyeibü shuong louyankei; Hobaje Zebulun ka sepai leiyeibüeibü ju jungbü shuong louyankei.

¹⁵Debora yoa Issakareibü leiyeibü shuong kikei; Issakar ailai kikei, kho tegü Barak kikei. Pholi khüto haoen hao phai nyangko nujung atkei. Reuben phang yoa maangpon takteiyobü yaangbü kikei.

¹⁶Sanlon ngala metbü ditla. Aila nyi san chema haiyeida? Reuben phang yoa maangpon lamyobü yaang kikei.

¹⁷Jordan phainei Gilead haiyeiko kikei; hoba Dan, aila haoeibü long shuong yoa kikei. Hobaje yongkoa hao louyanshang Asher atopeiko setakei.

¹⁸Haoeneibü langkei hailabü, thushed yeitibü kho Zebuluna mütli kikei. Hobaje Naftali yamshui shongh thüka.

¹⁹Choba shuong louan wapyokei, Taanaka Meggido dei nyangko; haoenei nam aikei ku ühüp.

²⁰Khuthük ka haoenei wapyokei. Khanshoulitshou shuongei jembü lama Sisera khulimbo wapyokei.

²¹Kishon shumangei haoen kujung koukei. Shangied kibü shumang Kishon shumang O kü soushou, hau yaangbüei paijung hauashi.

²²Kheijinei haoeibü koli shuong laangyoko paibü, Kolieibü youmangei paibü ngühlang yaang longkei.

²³“Meroz khükeiuokeiashi, dogo BUNYUBOU hangangbüei lauda, Khünei kibü aeibou khükeiuokeiashi. Aieilausi BUNYUBOUeibü thuibü jungto alou; hau yaangbü khulimbo BUNYUBOU thuibü jungto alou.”

²⁴Yaksa pendou to haünyu kho, Kenbü Hebereibü yak Jael, Neichema kibü yaksa pendou yoa sao haünyu.

²⁵Haoei dei hikei hoba saoei sendei kukei, Saoei sendei onbü yaangbü phau chenei hao la sungbakukei.

²⁶Saoei saoeibü ikei neichema jaangbü bu, hoba saoeibü ik maeae kümbüleibü bungüma yembei; saoei Sisera to thüngkei, saoei haoeibü khu jangnyinkukei. Saoei haoeibü nilit netla yeitikukei hoba hanyetkukei.

²⁷Sao thedanga hao khüpetkei, hao tuongkei hoba hao leketkei. Sao thedanga hao khüpetkei, hao tuongkei. Lan hao khüpetkei khünei hao haibü mang leketkei.

²⁸Koulom ka saoei chühan yantikei, hoba ngekkei Siseraeibü nyuei kümkhünyet ka ngekkei; “Aila haoeibü kailong halokche phaida? Aila haoeibü kailong you khülokche phai senngaida?

²⁹Saoeibü maanglimaangsang. Yaangennyu saoei jongaiko sao to laukei, haü, sao lolo sao to jongaida.

³⁰Haoen soletbü peisilei lamyobü hoba janyobü che aying lo? Bousu weko medei che che ayingsi nyibang Sisera laje pa nei soletbü laü jinbü pa nei, Ngeibü ngüm shangakei jijiham noksa jinbü nei dogo se?”

³¹Kho tegü kaibü dangbou pendou mauashi, O BUNYUBOU; lausikei ladang hao jembü haua meimeijung haulaje haoen chanyu tegütham kitiashi! Hobaje po saonyi kaonyeka hakso kikei.