Read Chang Naga MATJEMBÜSHUONG 6 Bible Online

MATJEMBÜSHUONG 6 - Chang Naga bible

MATJEMBÜSHUONG 6

¹Toukei Israelbü shuongei BUNYUBOU thedanga ai amai kho kümbei; hoba BUNYUBOUei haoen Midianbü ika po nyet khümbo kukei.

²Hobaje Midianbü ikei Israelbü thükkei, hoba Midianbü kibüei Israelbüei haoen lolo shongha püngkhün, laangbob, hoba lapheishon kümbei.

³Hobaje ladang ong Israelbüei kesiong lilabü wenkei, kheijinei Midianbü, Amalekbü, hoba chaangbou aekabü mütshuong longan haoen shiko kikei.

⁴Hobaje haoen khulimbo la tho hoba Gaza sühko hauan kao kabü langle leiluku dogo kümbei hoba Israelbü shanga ai peisileikei aphoku hoba sanlon, masu, ayingsi gadu aikei aphoku.

⁵Aishanga haoen lulueibü samkeisamuk, shatsinam yoa neichem künan angkei, koksüng shoongbü tegü haoen tan tan lotkei, haoen hoba haoeneibü ut wesiawekhümbo kikei. Hobaje kaonyek kho leilukula haoen khüto lotkei.

⁶Hobaje Midianbüei Israelbü aeibou yantikei. Hobaje Israel shousi shuongei BUNYUBOU to ngekkei.

⁷Ladang Israelbü shuongei Midianbü shanga BUNYUBOU to ngekkei,

⁸BUNYUBOUei Israelbü shuong jungto thuseibü che hautikei, hoba haoei haoen to laukei “Israelbü Mühghaü BUNYUBOUei hai lauda, Ngei kan Ijep ka leian longkei, hoba aao chem ka lei- yenkei.

⁹Hobaje ngei kan Ijepbü ik ka khümenkei, hoba kan thedang ka haoen shian apbei hoba haoeneibü kaodak kan la kukei.

¹⁰Hobaje ngei kan to lenkei, ‘Ngo kaneibü Mühghaü BUNYUBOU ki hoba kanei Amorbü, aoeibü kaoa kan ki, haoeneibü mühghaü shuong to soumo teku.’ Lausikei kanei ngeibü ngüh ditashi.”

¹¹Hobaje BUNYUBOU khuthük hangangbü loukei hoba Ofraa yembulong phanga setkei, kho Abiezerbü Joash shangabü kikei, hoba haoeibü shou Gideonei Midianbü ka kho huan phola shanga onang nitshang whet youshou nakko kikei.

¹²Hobaje BUNYUBOUeibü hangangbü hao jungto longkei hoba hao to laukei, “BUNYUBOU ka yoa kia, no hau yaangbü müt!”

¹³Hobaje Gideonei hao to laukei, “Ngeibü bunyubou, BUNYUBOU kün yoa kia longa, khülonga aila khübü pendou kün to haüthükkei? Hobaje küneibü pisibousi shuongei BUNYUBOUei sen Ijep la leian longkei dogo lauko haoeibü maangpanglabü kümsilei shanga lenbü pendou kho lan ki? Lausikei touje BUNYUBOUei kün nanganapbei, hoba Midianbü ika khümbo kuan apbei.”

¹⁴Hobaje BUNYUBOUei hao to chühkei, hoba laukei, “Kaibü hau haka jaüan hauashi, hoba Midianbü ik ka Israel khümenla ngei no ohauti lo?”

¹⁵Hobaje haoei hao to laukei, “O BUNYUBOU, ngei ailai küman Israel khümenla? Chühashi, Manassea kün chung hau akiboutham, hoba kün chempen yoa ngo hanboutham ki.”

¹⁶Hobaje BUNYUBOUei hao to laukei, “Maimaitham ngo ka yoa kilabü, hoba nyi Midianbü müt che tegü ong thüklabü.”

¹⁷Hobaje haoei hao to laukei, “Ka thedanga ngei onou hapan kia longa kü to joyobü ho no dogo laula kü la tetsida che lenbüma?”

¹⁸Ngei ka to sudajada ngo ka jungto louan ngeibü lembü shausiyung sungbaan kho ka thedanga aphoku shongko ha ka tesatma. Hobaje haoei laukei, “No nyibou alongei shongko ngei haiteilabü.”

¹⁹Hobaje Gideon atkei hoba lonshou che, hoba wen efa che, tokai ajinbü wentek lamlekei, phe kho haoei kam chenei jinkei, hoba haoei shikdei kho chak chenei jinkei, hoba yembulong phang che to sungbakei, hoba lembei.

²⁰Hobaje Mühghaü hangangbüei hao to laukei, “Phe hoba tokai ajinbü wentek kho sungashi, hoba kho laangthüka tenan phoashi, hoba shikdei kho yeian jinashi;” hoba kho tegü haoei kümbei.

²¹Kheijinei BUNYUBOU hangangbüei haoeibü ika kibü ju thon khoei phe si tokai ajinbü wentek kho to meitikei hoba laang kho ka wan longkei hoba phe si tokai ajinbü wentek kho lonshembei, hoba BUNYUBOUeibü hangangbü kho hao thedang ka bangkei.

²²Hobaje Gideonei hao BUNYUBOUeibü hangangbü dogo ngekei, hoba Gideonei laukei, “Ügütü, O BUNYUBOU Mühghaü! Tou ngei BUNYUBOUeibü hangangbü theshuok haüyobü hapa.”

²³Hobaje BUNYUBOUei hao to laukei, “No hakso kishi, tehüt, no ühailabü.”

²⁴Kheijinei Gideonei khünei BUNYUBOU la lemshang che kümbukei, hoba kho “BUNYUBOU kho sangmai ki” dogo nyenkei. Tat sühko kho Abiezerbü Ofraa kia.

²⁵Khüyoutham BUNYUBOUei hao to laukei, “Kaboueibü masu pongsu leashi, khei nyiboubü masu pongsu po nyet kibü kho leashi, hoba kaboueibü Baal lemshang kho leilukuashi hoba kho nyangko kibü Ashera kho wapan koutiashi.

²⁶Hobaje kho lapheishon thüka BUNYUBOU kaibü Mühghaü la senyühshembo lemshang che kümashi, hoba nyiboubü masu pongsu kho leashi, hoba nyi Ashera wapan koutibü bu yoa kho juokbü lembü kuashi.”

²⁷Kheijinei Gideonei haoeibü sambü müt an leikei hoba BUNYUBOUei hao to joyobü tegü kümbei; lausikei haoei kho chalou sakteia kümlaje chempen si sangnyua kibü to hatsije haoei kho nangnak kümbei.

²⁸Hobaje ladang sangnyua kibü ngeyang enyu pikei, chühashi, Baal lemshang leiluan kikei, hoba kho nyangko kibü Ashera wapan apan kikei, hoba nyiboubü masu pongsu ong lemshang küman kishanga leman kikei.

²⁹Hobaje haoen cheei che to laukei, “Ho aoei kümbei?” Hobaje ladang haoenei pheyokei, haoenei laukei, Joasheibü shou Gideonei ho kümsilei kümbei.

³⁰Kheijinei sangnyubü püh pendouei Joash to laukei, “Kaibü shou haitila leian kaiyang; aieilausi haoei Baal lemshang leilukua, hoba haoei kho nyangko kibü Ashera wapan koutikei.”

³¹Lausikei Joashei hao khulimbo lobü pendou to laukei, “Kanei Baal shanga tokyolep lo? Ayingsi haoeibü pü lelep lo? Aoyouei hao shanga tekyolaje ngeyangje hao haitilabü, hao mühghaü che, yingalonga haoei hao lolo tokyoko wapyotiashi, aieilausi haoeibü lemshang müt cheei leilukua.”

³²Hibü kho chalou ka khangan hao to Jerubbaal dogo laukei kho tetlabü ‘Hao khulimbo Baalei tokyotiashi,’ aieilausi haoeibü lemshang haoei leilukua.

³³Kheijinei Midianbü, Amalekbü chaangbou aenei kibü pendou liko yoshaikei, hoba Jordan danan Jezreel pholia shaikei.

³⁴Lausikei BUNYUBOU soushou Gideon thük to loukei; hoba haoei teklaang metkei; hoba Abiezera kibü hao phai haula liko yoshaikei.

³⁵Hobaje haoei Manasse pendou aeto ngühlang künbü hautikei; hoba haoenkei hao phai semla liko yoshaikei; hoba haoei ngühlang künbü Asher to, Zebulun to hoba Naftali to hautikei; hoba haoenei haoen shuokla angkei.

³⁶Hobaje Gideonei Mühghaü to laukei, “Nyi lenbü tegü nyi Israel ngeibü ika khümenlep yingalonga,

³⁷chühashi, ngei amshanga sanloneibü wi iman phokukho; wia ong nin mongan kia longa, hoba kao pendou ulangtham kia longa kheijinei nyi lenbü tegü nyi Israel ngeibü ikei khümenlabü dogo ngei ngelabü.”

³⁸Hobaje kho, kho khei kikei, aishanga hao nyibounyet kho enyu pikei, hoba wi kho haushaian nyatsi wi ka dei khuongphau che semletkei.

³⁹Hobaje Gideonei Mühghaü to laukei, “Ngo khulimbo no khau tüangma hoba ngei khei tou ho ong joyokho, ngei ka to sudajada, wi ho toukei che ong aukabü kutiashi; touje wi kho ulangtham aptiashi, hoba kaoen pendoua nin mongtiashi.”

⁴⁰Khüyou kho Mühghaüei kho tegü kümbei, aishanga wi kho ong ulangtham kikei, hoba kao pendou nin dangan kikei.