Read Chang Naga MATJEMBÜSHUONG 7 Bible Online

MATJEMBÜSHUONG 7 - Chang Naga bible

MATJEMBÜSHUONG 7

¹Kheijinei Jerubbaal (kho Gideon) hoba hao yoa kibü müt pendou tongde meimeikei hoba Harod deikhün nyangko shaikei, hoba Midianbü shaishang kho haoen aenei chanep phei More shongh nyangko pholia kikei.

²Hobaje BUNYUBOUei Gideon to laukei, “Ngei haoen la Midianbü kula shanga ka yoa kibü mütshuong kho juongsepa khei ayinglonga Israelei haoen lolo liliko, küneibü ikei kün lolo khümenkei dogo laulabü.

³Hibü tou müt shuongeibü noua ho dittiashi, ‘Aoyou hatko lühko ki, hao Gilead shongh ka chem to ngaiashi.’” Hobaje hajar saoto nyi sepeinyu ngaikei hoba hajar an joukei.

⁴Kheijinei BUNYUBOUei Gideon to laukei, “Mütshuong kho toukei juonga, haoen dei to leian kaiyan hoba ngei ka shanga haoen takteilabü; hoba ao shanga ngei ka to, ‘Ho müt ka yoa haulabü,’ dogo laulaje ka yoa haulabü. Hobaje ao shanga, ‘Ho müt ka yoa ohaulabü,’ dogo lenlaje hao kho ohaulabü.”

⁵Hibü haoei haoen dei to leiyankei, hoba BUNYUBOUei Gideon to laukei, “Mütpem weko aoei keiei sebü tegü lishangei dei selaje nyi hao bangnyinan phoshi, aoei dei yungla youkükei khüpetda kho tegü lulu phoshi.”

⁶Hobaje sembunga ikei mokjung louan jenbü, müt saongao sem kikei. Lausikei joubü pendou kho dei yungla haoeneibü youkükei khüpetkei.

⁷Hobaje BUNYUBOUei Gideon to laukei, “Ikei mokjung louan yungbü saongao sem khoei ngei kan khümenlabü hoba Midianbü kaibü ika khümbo kuan aplabü, hoba müt pendou jembü kishang to ngaitiashi.”

⁸Hibü mütshuongei haoeneibü insiaubu hoba teklaang jungkei hoba haoei Israel mütli pendou kho mütpem weko lulueibü neichem to ngaitikei. Lausikei saongao sem khoje haiteikei, hoba Midianbü shaishang haoeibü youdang aenei yomanga kikei.

⁹Hobaje khüyoutham BUNYUBOUei hao to laukei, “Meimeiashi, shaishang to no yanashi, aishanga ngei kho kaibü ika kua.”

¹⁰Lausikei no yanla hatalonga, kaibü sambü Pura yoan yanashi;

¹¹hoba haoen ai lauyodaje nyi ditlabü. Hobaje phaila shaishang to haula shanga kaibü ik hau kingaitilabü. Kheijinei haoei haoeibü sambü Pura yoa in si aubu jungbü shaishang thükkabou to yankei.

¹²Hobaje koksüng shoongbü tegü yomanga Midianbü, Amalekbü, hoba chaangbou aenei kibü müt pendou phekde yeplepan kikei, hoba yungnyu phetsen tegü tan tan haoeneibü ut aweenko kikei.

¹³Hobaje ladang Gideon loukei, chühashi, müt cheei hao thangbou to mangh che lenko kikei, hoba laukei, “Chühashi, ngei mangh che likei, hoba ditashi, barli wentek che Midianbü shaishang to shanjung louyankei hoba neichem to loukei, hoba khoei thangouan kho tuongkei. Hobaje hekolambo khüpeikei hoba kaoa shimde yepbei.”

¹⁴Hobaje hao thangbouei jongaiko laukei, “Ho Israelbü müt che Joasheibü shou Gideoneibü in to liman lubü ai aying; haoeibü ika Mühghaüei Midian hoba tan pendou khümbo kua.”

¹⁵Ladang Gideonei mangh lenbü hoba tetlabü kho ditkei, hao khüpetan kaoa youkükei thungan lembei, hoba Israelbü shaishang to ngaikei, hoba laukei, “Meimeiashi, aishanga BUNYUBOUei Midianbü kaneibü ik to khümbo kua.”

¹⁶Hobaje müt saongao sem kho tan sem la jankei hoba haoen pendoueibü ika teklaang hoba kongbü thamchak maanga wanthung jinan haoei ika jungtikei.

¹⁷Hobaje haoei haoen to laukei, “Kü to chühashi, ladang ngo shaishang thükkabou to loulaje, ngei lai kümlaje, kho tegü, kaneikei kümlabü.

¹⁸Ladang ngei teklaang metlaje, ngo hoba kü yoa kibü pendouei kheijinei shaishang pendou aeka kanei teklaang metshi, hoba laushi, ‘BUNYUBOU shanga hoba Gideon shanga.’ ”

¹⁹Hibü Gideon hoba hao yoa müt saongao kho aukoujih asüh shongko haoen lapheibü longsilengko shaishang thükkabou khüto loukei; hoba haoenei teklaang kho metkei. Hobaje haoeneibü ika thamchak shuong kho netla yeiko phetnyinkei.

²⁰Hobaje tan sem khoei teklaang metkei hoba thamchak shuong phetnyinkei hoba wansembung kho haoeneibü ik nanaenei hoba haoeneibü mae ika teklaang metla jungkei hoba haoenei uihinkei, “BUNYUBOU hoba Gideon shangabü in!”

²¹Hobaje haoen mütpem weko haoen kishang shaishanga lokei, hoba tan pendou laangkei, hoba haoenei uihinkei hoba haoen lintikei.

²²Hobaje haoenei teklaang saongao sem kho metkei, hoba BUNYUBOUei mütpem weko lulueibü jenabou to hoba tan pendou khulimbo in litikei, hoba shuong kho Zesera ae Beth-Shitta sühko Tabbat nyangko Abelmehola leilang sühko laangjung satkei.

²³Hobaje Israelbü kho Naftali ka hoba Asher ka hoba Manasse pendou ka ngashaikei, hoba Midianbü shijung haukei.

²⁴Hobaje Gideonei Efraim shongh kaodak pendou to ngühlang hautiko laukei, “Midianbü khulimbo kaiyena, hoba haoen thedanga Jordan shumang kho leashi, Beth-bara sühko, khei Jordan sühko leashi.”

²⁵Hobaje haoenei Midianbü leiyeibü müt nyi Oreb si Zeeb lapbei, hoba haoenei Oreb laanga haitikei. Hobaje Zeeb semlüh nitshanga haitikei, hoba Midian shijung haukei, hoba haoenei Oreb si Zeebeibü khu Jordan danjung Gideon jungto sungbakei.