Read Chang Naga MATJEMBÜSHUONG 8 Bible Online

MATJEMBÜSHUONG 8 - Chang Naga bible

MATJEMBÜSHUONG 8

¹Kheijinei Efraimbü mütshuongei hao to laukei, “Midianbü to wapyola haujinei kün angabü ho nyi ai kümbei? Hobaje haoenei hao to ngüh kaangko lauyokei.”

²Lausikei haoei haoen to laukei, “Tou ngei kan to takteiyoko ai kümjan? Efraim semlüh pienbü kho Abiezer ih nyatbü maibou kho aying lo?

³Mühghaüei kaneibü ik to Midianbü leiyeibü Oreb si Zeeb khümbo kukei, kan to takteiyoko ngei ai kümenkei”. Kheijinei haoenei kho ditjinei hao khulimbo haoen khauangbü koujung ngaikei.

⁴Hobaje Gideon Jordan to loukei, hoba kho dankei, hoba hao yoa müt saongao sem semthetkei, lausikei shisho ong haukei.

⁵Hobaje haoei Sukkotbü to laukei, “Ngei kan to sudajada, kü phai sembü la shausiyung okshi aishanga haoen mühei haiyetnyu kia. Hobaje ngo Midianbü Choba Zeba si Zalmunna phai shijung hauda.”

⁶Hobaje Sukkotbü leiyeibü shuongei laukei, “Ngei kaibü sepai shuong la wentek kulabü lele Zeba si Zalmunna tou kaibü ika kilao?”

⁷Hobaje Gideonei laukei, “Khülonga ladang BUNYUBOUei Zeba si Zalmunna ngeibü ik to kulaje ngei yam kabü jak hoba bijakei no seinyinkulabü.”

⁸Hobaje khoka hao Penuel to angkei hoba haoen to kho khei sukeijakei, hoba Sukkotbüei jong- aibü tegü Penuelbüei jongaikei.

⁹Hobaje haoei Penuelbü to kei laukei, “Ladang ngo sangmaia nyibou longailaje ngei ho lapheishon leilutikulabü.”

¹⁰Tou Zeba si Zalmunna Karkora kikei, chaangbou aenei kibü tan pendou ka jouan kibü pendou; aishanga in jungbü hajar saongao to saoche tuongkei.

¹¹Hobaje Noba si Jogbeha chaangbou neichema kibü lamnyu khüto Gideon angkei, hoba sepai tan yoa khüto wapyokei, aishanga sepai tan alamleko kikei.

¹²Hobaje Zeba si Zammunna laangjung satkei, hoba haoei haoen shieikei, hoba haoei Midianbü Choba müt nyi, Zeba si Zalmunna lapbei hoba sepai tan pendou linjung satkei.

¹³Kheijinei Joasheibü shou Gideon lason ka Heres angshang ka sepeijung loukei.

¹⁴Hobaje Sukkotbü heshou che lapbei hoba hao to pheyokei; hoba hao shanga haoei Sukkotbü leiyeibü jaishou müt anjinlei to nyet doletan phokei.

¹⁵Hobaje hao Sukkotbü jungto louan laukei, “Zeba si Zalmunna to chühashi, aoyou shanga kanei kü to phangko laukei, ‘Kaibü eikshuong mühei nyengko kibü la ngei wentek kulabü lele Zeba si Zalmunna ka ika kiasi?’

¹⁶Hobaje haoei sangnyu ka jaishou shuong lapbei hoba haoei yamkabü jak si bijak sungjung louan khoei Sukkotbü thepetko lenkei.

¹⁷Haoei tokei Penuelbü laangeibü lapheishon leilutikukei, hoba sangnyua kibü shuong haitikei.”

¹⁸Kheijinei Zeba si Zalmunna to laukei, “Kanei Tabora haitibü mütshuong kho laibü müt?” Hobaje haoenei jongaikei, “Haoen kei no tegübü kikei. Haoen mütpem weko Chobaeibü shou phatko kikei.”

¹⁹Gideonei laukei, “Haoen ngeibü jaisinasi shuong, künyueibü shousi shuong ki. BUNYUBOU lang kisije, nyi haoen langkei khümenan phokei tegüje ngei kan tühaitikhoulabü.”

²⁰Hobaje haoei haoeibü shou jaishoubou to laukei, “Meimeiashi, hoba haosi haitiashi.” Lausikei heshoubou khoei ik ashaten, aishanga hao hatkei aieilausi hao toukei nashou ong kikei.

²¹Kheijinei Zeba si Zalmunnaei laukei, “No lolo louan haitiashi; aishanga müt kho laibü yingkeije haoeibü haukei kho hima ong ki.” Hobaje Gideon loenkei hoba Zeba si Zalmunna haitikei hoba haoei haosieibü uteibü ngüma kibü asenjang kho sungkei.

²²Kheijinei Israelbü shuongei Gideon to laukei, “Kün thüka no, kaibü shousi hoba kaibü shisi shousieikei songdakshi, aishanga Midianbü ik ka nyi kün khümenkei.”

²³Gideonei haoen to laukei, “Ngei kan thüka songadaklabü ayingsi ngeibü shousieikei kan thüka songadaklabü, kan thüka BUNYUBOUei songdaklabü.”

²⁴Hobaje Gideonei haoen to laukei, “Ngei kan ka den che himangsühda; kan mütpem wekoei soletbü peisilei chimen yakmen kü la labü.” (Aishanga khübü kho honeibü chimen yakmen kikei, aieilausi haoen Ishmaelbü kikei.)

²⁵Hobaje haoenei jongaikei, “Künei maangnyu angko khübü kho kulabü;” hoba haoenei nei che iman mütpem wekoei luluei soletbü peisilei kho khünei jinkukei.

²⁶Hobaje haoei subüjabü honei kümbü nouchi shuong yaüan chühbü kho shekel hon hajar cheto saongao nyet kikei. Khübü kho Midianbü Choba shuongei tetsida shanga lenbü namsek peisilei khapbü hoba nakthüngbü hele ayoko hoba haoeibü uteibü ngüma yakbü peisilei ayoko kikei.

²⁷Hobaje Gideonei khoei ungshedbou sao- pobü neisimei che kümbei hoba kho haoeneibü sangnyu Ofraa phokei, hoba Israelbü pendouei kho phai pejapelako satkei, hoba kho ong Gideon si haoeibü chempen shanga sung che yeian apbei.

²⁸Kho tegü Israelbü thedanga Midianbü yantikei, hoba haoen touje khu aphonen. Hobaje Gideon hanga po saonyi kaonyeka hakso kikei.

²⁹Hobaje Joasheibü shou Jerubbaal ngaikei hoba haoen chema kikei.

³⁰Tou Gideoneibü shousi anjinlei kikei, aishanga haoei yak juong kikei.

³¹Hobaje Shekhema kibü thangnyuei hao la bousushou che bukkukei, hoba haoei haoeibü nyen Abimelek nyenkukei.

³²Hobaje Joasheibü shou Gideon baushi sinan haikei, hoba haobou Joasheibü heea Abiezer chungeibü Ofra sangnyua khünkei.

³³Gideon haisilengko Israelbüei nyibou sepeian apbei, hoba Baal phai pejapelako jungeikei hoba Baal Berith haoeneibü mühghaü la yeikei.

³⁴Hobaje Israelbüei BUNYUBOU haoeneibü Mühghaü, aoei haoen dangbou labou pendou ka khümenkei, hao adamen.

³⁵Hobaje haoenei Jerubbaal, (kho Gideon) haoei Israelbü to maibü pendou kümasikei haoen chemdang to sanou alen.