Read Chang Naga MATJEMBÜSHUONG 9 Bible Online

MATJEMBÜSHUONG 9 - Chang Naga bible

MATJEMBÜSHUONG 9

¹Tou Jerubbaaleibü shou Abimelek kho nyueibü chempen jungto Shekhem to haukei hoba haoen hoba hao nyueibü chempen pendou to lenkei.

²Shekhembü bukmüt pendou to lenashi, “Kan shanga laobou maibou, Jerubbaaleibü shousi anjinlei pendou khoei kan thüka songdakla si cheei ong songdakla? Toukei ngo kaneibü lo hoba phe dogo damenashi.”

³Hobaje hao nyueibü chempen shuongei habü ngüh pendou hao shanga Shekhembü pendoueibü nouei ditko laukei, hoba haoeneibü maangponei Abimelek phai semmang sühko yeikei; aishanga haoenei laukei, “Hao küneibü jaisina ki.”

⁴Hobaje haoenei hao la Baal-berith lemshang chem ka chandinam anjinlei kukei, hoba haoei khoei haangalongbü hoba maang ashikbü mütshuong hao phainei semla munam kukei.

⁵Hobaje haoei Ofraa boueibü chem to haukei hoba haoei jaisinasi shuong, Jerubbaaleibü shousi shuong müt anjinlei laang che thüka haitikei. Lausikei Jotham Jerubbaaleibü shou nashoubou thamje joukei, aishanga hao lolo hao huan apbei.

⁶Hobaje Shekhembü müt pendou kamshaikei hoba Milo chung pendou hoba haoen haukei, hoba Shekhema yembueibü thaonyu nyangko Abimelek choba yeitikei.

⁷Ladang kho Jotham to lenkei, hao haukei hoba Gerizim shongha lokei. Hobaje kaang ngekko haoen to laukei, “Mühghaüei kan to ditlabü shanga Shekhembü kü to ditshima.

⁸Nyetche chalou bunyu shuong haoen thüka choba che naangenko pienla haukei hoba haoenei oliv bu jungto hauan laukei, ‘Kün thüka songdakshima!’

⁹Lausikei oliv bunyuei haoen to laukei, ‘Ngei ngeibü haabü laobouei seneibü Mühghaü hoba müt hangentida kho ngei apyoan bunyu thüka soueila haulep lo?’

¹⁰Hobaje bunyu shuongei bhuklong to laukei, ‘No kaiya, hoba kün thüka songdakashi.’

¹¹Lausikei bhuklongei haoen to laukei, ‘Ngei ngeibü teibü apyoan hoba hek maibü apyoan bunyu shuong thüka soueila haulep lo?’

¹²Hobaje bunyu shuongei semlüh long to laukei, ‘No kaiya, hoba kün thüka songdakashi.’

¹³Hobaje semlühlongei haoen to laukei, ‘Ngei ngeibü ih laobouei Mühghaü si müt olintida kho apyoan bunyu thüka soueila haulep lo?’

¹⁴Kheijinei bunyu pendouei bilong to laukei, ‘No kaiya hoba kün thüka songdakashi.’

¹⁵Hobaje bilong khoei bunyu shuong to laukei, ‘Tükdebü kanei ngo pienda yingalonga khülonga kaiya hoba ngeibü yeme phanga kanei maanglemashi hoba khei ayinglonga bilong ka wan longashi hoba Lebanon cedar bulong shuong suiashi.’

¹⁶“Khei yingsije tou kanei Abimelek choba yeitibü kho maia hoba tükdebüei yingalonga hoba kanei Jerubbaal hoba hao chempen to maian jungeikei yingalonga hoba haoeibü kümeileieibü mubü kümbei yingalonga.

¹⁷(Aishanga kan shanga kübouei wapyokei, hoba haoeibü langkeiei lemla kuko kümbei, hoba Midianbü ik ka kan khümenkei;

¹⁸hoba tat kanei kübou chempen khulimbo longda hoba haoeibü shousi shuong laang che thüka ong müt anjinlei haitikei, hoba haoeibü sambüsaoeibü shou Abimelek ong Shekhem bukmüt thüka choba yeitikei, aieilausi hao kho kaneibü thenbou ki.)

¹⁹Kholonga tat kanei maia hoba tükdebüei Jerubbaal hoba haoen chempen to kümbei yingalonga Abimelek to olinangko kishi hoba haoeikei kan to olinangko kishi.

²⁰Lausikei kho tegü ayinglonga Abimelek ka wan longashi, hoba Shekhem bukmüt hoba Milo chung suiashi, hoba Shekhem bukmüt hoba Milo chung ka wan longashi hoba Abimelek suiashi.”

²¹Hobaje Jotham laangjung haukei hoba satkei hoba Beer to haukei hoba jai to hatbüei khünei kikei.

²²Hobaje Abimelekei Israel thüka po sem songdakkei.

²³Hobaje Mühghaüei Abimelek si Shekhembü kanglanga shabü soushou che hautikei, hoba Shekhembüei Abimelek to maangshat lamlam amaiko kümbei;

²⁴khei Jerubbaaleibü shousi müt anjinlei to ik atbü mu loutikei hoba haoeneibü sii haoeneibü jaisina Abimelek la nyeilabü, aoei haoen haitikei; hoba Shekhembü aoyouei haoeibü jaisinasi shuong haitila hao hau kitikei kho shanga.

²⁵Hobaje Shekhembü mütshuongei hao khulimbo shongh thüka la thotikei, hoba khüto haubü pendou haoenei maklangkei hoba kho Abimelek la lenkei.

²⁶Hobaje Ebedeibü shou Gaal haoeneibü thenbou yoa Shekhem to atkei; hoba Shekhembü mütshuongei hao to maanglembei.

²⁷Hobaje haoeneibü sek to koukei, hoba haoeneibü semlühlaak ka semlühhek yoshaikei hoba khübü kho nitkei hoba lem likei hoba haoeneibü mühghaü chem to atkei, hoba shaukoyungko Abimelek to khükkei uokkei.

²⁸Hobaje Ebedeibü shou Gaalei laukei, “Abimelek ai? Senei hao khangenlabü lele sen Shekhembü ao ki? Hao Jerubbaaleibü shou hoba hao kongnyubou Zebul aying lo? Shekhemeibü bou Hamur kanei khangenashi; lausikei aila hao khangenla?

²⁹Habü mütshuong ngeibü ika kikei tegüje kheijinei ngei Abimelek kuktikhoulabü.” Hobaje haoei Abimelek to laukei, “Kaibü sepai tan juong la yeitiashi hoba longashi!”

³⁰Hobaje ladang sangnyu songdakbou Zebulei Ebedeibü shou Gaaleibü ngüh ditkei, hoba hao khauangbü ditkei,

³¹hoba haoei Arumaa Abimelek jungto ngühlang hautiko laukei, “Chühashi, Ebedeibü shou Gaal hoba haoeibü thenbou shuong Shekhem to louakei, hoba chühashi, haoenei no khulimbo sangnyu tensepda.

³²Hibü tou tao nangnak hauashi, no hoba ka yoa kibü mütshuong hauan seka thoteishi.

³³Hobaje chanyu phamsi lengko tongde meimeian sangnyu to nujung atshi, hoba chühashi ladang no hoba hao yoa kibü mütshuong no khulimbo longlaje nyi haoen to ka la maibü che kümshi.”

³⁴Hibü Abimelek hoba hao yoa kibü mütshuong pendou nangnak meimeikei, hoba Shekhem khulimbo tan leia thoan haiteikei.

³⁵Hobaje Ebedeibü shou Gaal longkei hoba sangnyu to atshanga bakhüna lokei, hoba Abimelek hoba hao yoa kibü mütshuong thoshang ka meimeikei.

³⁶Hobaje ladang Gaalei mütshuong kho hapbei, haoei Zebul to laukei, “Chühashi, shonghkhu ka mütshuong louyenada!” Hobaje Zebulei hao to laukei, “Nyi shongh shuong yeme kho müt tegü hapbü onga.”

³⁷Gaalei nyibou jongaiko laukei, “Chühashi, kaonyek jenyu ka mütshuong louada, hoba tan cheje thulenbü yembu long aeka louada.”

³⁸Kheijinei Zebulei hao to laukei, “Senei khangenlabü lele Abimelek ao dogo nyi laubü kho touje kaibü sembung lanei ki? Nyi nyikubü mütshuong habü ho aying lo? Tou hauan haoen to wapyoashi.”

³⁹Hobaje Shekhem thüka leiyeibü lean Gaalei Abimelek to wapyola haukei.

⁴⁰Hobaje Abimelekei shijung haukei hoba hao thedanga hao satkei, hoba bakhün to atshang sühkoa müt juong leiluan tuongkei.

⁴¹Hobaje Abimelek Arumaa kikei, hoba Zebulei Gaal si haoeibü chempen Shekhemaje akienlabü lele shian apbei.

⁴²Nyibounyet mütshuong sek to koukei. Hobaje Abimelek la ngetikei.

⁴³Hobaje haoei jembü mütshuong kho sungkei hoba tan sem la jankei, hoba seka thoan haiteikei, hoba haoei chühkei hoba chühashi, mütshuong kho sangnyu ka longbü hapbei, hoba haoei haoen khulimbo meimeikei hoba haoen haitikei.

⁴⁴Abimelek hoba hao yoa kibü tan thedang aeto laangkei hoba sangnyu bakhün lamnyua loan kijinei tan penyi khoei seka kibü pendou haitikei.

⁴⁵Hobaje khünyet chaseko Abimelekei sangnyu khulimbo wapyokei, hoba haoei sangnyu kho lekei, hoba khünei kibü mütshuong haitikei, hoba haoei sangnyu kho lemailela mautikei hoba jem phinan phokukei.

⁴⁶Ladang Shekhem laang- chema kibü pendouei kho ditkei haoen El Berith chem lapheishon to atkei.

⁴⁷Hobaje Abimelek to Shekhem laangchema kibü müt pendou kamshaiakei dogo ngetikei.

⁴⁸Hobaje Abimelekei Zalmon shongh to angkei, hao hoba hao yoa kibü müt pendou hoba Abimelekei haoeibü ika wou che jungkei hoba bulong bubhek che wapan attikei hoba kho hekei hoba kho haoeibü phaka pekei. Hobaje hao yoa kibü müt to haoei laukei, “Kanei ngo ai kümbo hapbei, panteiashi, hoba ngei kümbü tegü kümashi.”

⁴⁹Hobaje pendouei kho tegü mütpem wekoei bubhek che che wapletkei hoba Abimelek phai sembei, hoba khubü kho lapheishona shaangan phokukei, hoba kho thüka haoenei lapheishona wan jinkukei, hibü toukei Shekhem laangchem lapheishona kibü müt pendou bousu yaksa hajar che thüng haikei.

⁵⁰Kheijinei Abimelek Thebez to haukei, hoba Thebez khulimbo louan setkei, hoba kho lekei.

⁵¹Lausikei sangnyu manga hau kibou laangchem che kikei, hoba sangnyua kibü pendou khüto satetlangkei, bousu yaksa pendou haoen lolo khinngailangkei, hoba laangchem chemdak to angan apbei.

⁵²Hobaje Abimelek laangchem khüto loukei hoba kho to wapyokei, hoba kho wanei jikkula haujembo laangchem koukhün to haukei.

⁵³Hobaje yaksa cheei Abimelekeibü khu to ngünbü laang che baman yantikuan haoeibü khu tetnyinkukei.

⁵⁴Kheijinei haoei haoeibü in si aubu jungbou heshoubou kho ngaan laukei, “Kaibü in setenan ngo haitiashi, aishanga ngo yaksa cheei ong haitikei dogo laulabü;” hoba haoeibü heshoubouei hao haitikei.

⁵⁵Hobaje ladang Israelbüei Abimelek haia dogo ngekei, haoen mütpem weko lulu kishang to linkei.

⁵⁶Kho tegü Abimelekei hao bou khulimbo haoeibü jaisina müt anjinlei haitibü ka Mühghaü phoklambü hao thükto loukei.

⁵⁷Hobaje toukei Shekhembü amaibü kümsilei pendou haoeneibü khua Mühghaüei attikukei. Hobaje haoen thükto Jerubbaaleibü shou Jothameibü khüksiuok loukei.