Read Chang Naga 2 JOHAN 1 Bible Online

2 JOHAN 1 - Chang Naga bible

2 JOHAN 1

¹Ho le, Mühghaüei pienbü Yaangennyu, hoba ngühmai himjama ngei sanoubü saoeibü shousi shuong jungto jaishou che ka ki. Ngei ong aying lausikei ngühmai ngebü dan pendouei sao to sanouda,

²aishanga kho ngühmai kün ka hoba kho kün to athakko kilabü.

³Bou Mühghaü hoba Shou Jisu Khrista ka onou, üeisanou hoba hakso, ngühmaia hoba sanoua sen yoa kilabü. Ngühmai hoba Sanou

⁴Bouei sen la ngühkhüm kubü tegü, ka shousi shuong ngühmaia paiko hapan ngo aeibou olinkei.

⁵Hobaje ngei tou ka shanga ngühkhüm haanbü che adokuda, lausikei khangla künei ai ngühkhüm sungletkei kho: senei jenabou si jenabou sanouyojan.

⁶Sanou tetlabü kho senei hao ngühkhüm hangeilamei paijan. Ho jeteibü ngühkhüm ho kanei khanglathama hapa; sanoua kishi.

⁷Aishanga Jisu Khrista müteibü hangalama loukei dogo atheletbü khüpettibou juongnyu kaodak to aa. Kho khüpettibou hoba Khrista khulimbou ki.

⁸Kanei kümbüleibüa kan konga ajimlabü lele kan lolo maang sangashi.

⁹Aoei Jisu Khristaei lenbü to liman hauda hoba kho kommanga akida haoei Mühghaü aki. Aoei lenbü kommanga kida haoeije Bou hoba Shou ham ki.

¹⁰Atei kho lenbü akünko ka jungto loualonga hao ka chem to teleiyet; salem mangkei teku;

¹¹aishanga aoei hao to salem leda haoei haoeibü kümsilei janyoda. Thonbü Ngüh

¹²Ngei kan jungto dolabü juongkotham kisije, ngei le si shiai jungeimang asühda; kan olinbü soutilabü lele ngo kan jungto louan theshuok joyolabü dogo maanglemda.

¹³Mühghaüei pienbü kaibü nousina shousi shuongei ka la salem kuda.