Read Chang Naga JUDA 1 Bible Online

JUDA 1 - Chang Naga bible

JUDA 1

¹Ho le Jisu Khrista sambü hoba Jakobeibü na Juda ka ki. Aoyou haoei ngaan ki hoba aoyou Jisu Khrista thounoubü phanga ki, khübü jungto.

²Kan jungto onoubü hoba hakso hoba sanou apsileko yingshi.

³Sanoubü thangbou shuong, ngei kan jungto sen likobü khümenbü shangabü aeibou domang sühko kijinei, laobou Mühghaüei hao mütshuong la pendou shanga hoba che ong kukei, kho mailem hatlepla shanga thungeiko ngei kan to dolabü lele yeikei.

⁴Aishanga Mühghaü angebü dan at ho laüa aoyou shangieda maulabü shanga pienakei khübü müt kan yo to huphangshoua lotakei. Haoenei, Mühghaüei kubü solo asangalanbü la yeitida hoba haoenei seneibü Bunyubou che ong, khei Bunyubou Jisu Khrista atheletda.

⁵Kanei khümbo ngean kibü kümsilei at ngei kan la damentida. Bunyubouei, aoei mütshuong püetkei hoba haoen Ijep ka leibakei, kho phaia, aoei maialem haoen mautikei.

⁶Khuthük hangangbükei aoyouei haoeneibü jembü sanglea akiko jembü kishang chem apyokei, haoei haoen Chalou yaangbü khonei matjemla shanga thon akibü yangmenei phenan nakthühbüa phoakei.

⁷Tokei Sodom si Gomora hoba haoen lepbü sangnyu shuong damenashi. Haoeneikei jembü lolo asangalanbü la kukei hoba haang ayingbü pheeibü kümsilei to atkei, hoba pendou shanga maangsanglabü che tegü thon akibü wan kayang hapbei.

⁸Habü mütshuong shangakei jeteitham ki. Shaangla haoenei haoen lolo mangh sangda, kho phaiaje haoenei haoeneibü mang shatida, Bunyubou hau asungletda hoba thükkabü soneikangbü shuong nyikuda.

⁹Lausikei khuthük hangangbü yaangbou Maikelei mangkei Mosaeibü mang shangabü shabü mühghaü to lemenjinei hao yuktiko ngüh kaangbü laula asom. Haoei, “Bunyubouei ka to hakshi,” dogo ong laukei.

¹⁰Khübü mütei haoenei aditenbü to nyikuda, hoba asangbü meisiau tegü haoenei ai ong haangei ditenda, khoei haoen jungto leilubü sungbada.

¹¹Haoen shanga ügütü! Haoen Kain lam to haua. Nam to khamla haoen Balaameibü shedbüa koulangkei. Kora tegü haoenei khulimbo lokei hoba shembei.

¹²Khübü mütshuong kho kaneibü sanou lemsilanga od che ki. Haoenei kaneibü shaua- yunga ihimouko shauyoda. Haoen lang ayobü yeiei soubabü sangmei; hoba puang kabü mai ehekbü buheklong, li ka pheibü hoba nyinei haibü long;

¹³yungnyu sekbülakbü deishou jembü himou kümsilei tang khitko lenbü; shoongaibü khanshoulitshou, aoyou la ponpendou shanga aicheküman nakthühbü kaoen tetkuakei, kho phatko ki.

¹⁴Enok, Adam lin ka nyetbouei habü mütshuong shanga hai tetenko laukei, “Chühashi!

¹⁵Pendou thüka matjemla, hoba asaopobü dan pendou jembü asaopobüa kümbü kümsilei hoba Mühghaü angebü shabü shuongei laobou ngüh kaangbü hao khulimbo laua kho shanga shedbü kula Bunyubou haoeibü saopobü lakjaibü shuong yoa loulabü.”

¹⁶Khübü mütei ai akümda lausikei nyamnyamda hoba maang ühaida. Haoen jembü aeilam aeiphopbü shanga kida. Haoenei lilisese lauyoda lausikei ku denche ongkei napailetla shanga ponpendou müteibü thenyek to chühda.

¹⁷Lausikei, sanoubü jenabou shuong, seneibü Bunyubou Jisu Khristaei haoeibü youkoikjai danko ai laukei kho kanei damenjan.

¹⁸Haoei kan to laua, “Thonbü jihsiphaia mütshuong aoyou mailema maang adak hoba haoen jembü pejapelabü phai semda, khübü danei kan nyikuko loulabü.”

¹⁹Kho janyinbü longtibü shuong ki. Haoen pejapelabü hoba soushou akibü danshuong ki.

²⁰Lausikei kan, ngei sanoubü jenabou shuong, kan kaneibü saopobü mailema loashi hoba Soushou Saopobü seia welauashi.

²¹Kanei jembü lolo Mühghaü sanoua phoashi hoba haoeibü onoua Bunyubou Jisu Khristaei kan la kula kibü thon akibü langkei kho haiyeiashi.

²²At phenyembo kia, haoen la onou lenashi.

²³Atje wanlong ka suan sungko nyi haoen khümenjan, hoba at toje kanei hatto khuian onou lenashi; shabü dühbüa khonbü neisimei khüto kanei hatjan.

²⁴Aoei kan atuongettiko hoba nali athetiko hoba olinangko, hao soneikangbü thedanga phokula thükakei,

²⁵kho sen khümenbou Mühghaü che to, seneibü Bunyubou Jisu Khrista danko, jih pendou thedangto, tou hoba thon akibü pendou shanga, soneikangbü, songdak, sei hoba hau yingshi; Amen.