Read Chang Naga TANGKHITBÜ 1 Bible Online

TANGKHITBÜ 1 - Chang Naga bible

TANGKHITBÜ 1

¹Ho Mühghaüei Jisu Khrista la kubü tang khitbü ki. Ho tongde loushedla kibü haoeibü khangenbü shuong la lentila shanga haoei hao la kukei. Hao khangenbü Johan la ho ngetila shanga Khristaei haoeibü hangangbü hautikei,

²hoba Johanei haoei hapbü pendou lenkei. Haoei Mühghaü ngühlang hoba Jisu Khrista langkei aukabü kukei.

³Aoei ho welaje haoei haükei hoba aoyouei ho thusei ngüh shuong to ditlaje hoba hanei dobü to ngüha lelaje haoenei haükei, aishanga pienbü jih kho khama nyanga.

⁴Ho Johanei Asia kabü lashong nyet to doda. Ao tou ki, ao kiteikei hoba ao louada, kho Mühghaü ka kan to onoubü hoba hakso yingshi; hoba Choba setshang junga kibü soushou nyet ka,

⁵hoba maanglemenbü aukabü, Jisu Khrista, ao haibü ka langngaibü shaangbou ki hoba ao kaodak Choba shuongeibü songdakbou ki, hao ka kan to onoubü hoba hakso yingshi. Aoei sen sanouda, hao haikubü danko aoei sen shabü ka dongetikei,

⁶hoba haoeibü Mühghaü hoba Bou khangentila aoei sen haoeibü ungshedbü shuong sangle yeitikei, hao to soneikangbü hoba sei tou hoba ponpen yingshi. Amen.

⁷Hao sangmeia louada. Müt- pem wekoei hao haplabü. Aoyouei hao to sepbei haoenei hao haplabü, hoba kaodak phangshuong pendouei hao shanga mang haaplabü. Haü, Amen.

⁸“Tou ao ki, ao kiteikei, hoba ao louada, kho thükenbou Bunyubou Mühghaüei lauda, ‘Ngo Alfa hoba Omega.’ ”

⁹Ngo kan jaisina Johan ki. Ngei kan yoa shieinangei hoba Choba sangle hoba natenbüa khristan che tegü janyoda. Ngo Patmos sua kikei aishanga ngei Mühghaü ngühlang hoba Jisu aukabü shangabü songlenkei.

¹⁰Bunyubou chaloua kü thükto Soushou lotkei, hoba ngei kü phainei teklaang langh che tegü ngüh yaang ditkei.

¹¹Khoei laukei, “Nyi ai hapdaje le chenei doashi, hoba kho lashong nyet to hautishi: Efesia to, Smerna to, Pergama to, Thiatira to, Sardia to, Filadelfia to hoba Laodikia to.”

¹²Kü to aoei joyodaje dogo chühla ngo sepeikei, ladang ngo sepeikei ngei honeibü wanthung nyet hapbei,

¹³hoba wanthung yoa Müteibü Shou phatko, mangsho youdema atko lean hoba khukua honeibü khükhom kaian hapbei.

¹⁴Haoeibü khu kabü khulou kho sanwi tegü thupaitham, hoba haoeibü nyek kho wanlüh maimai kikei.

¹⁵Haoeibü you kho yaüshema juokbü namsek chinam tegü kikei, hoba haoeibü ngüh kho dei juong ngühbü tegü kikei.

¹⁶Haoeibü mae ika haoei khanshoulitshou nyet kikei, hao sembung ka jijiham akbü inlou che longkei, hoba hao thenyekei chajihbou chanyu tegü haukei.

¹⁷Ladang ngei hao hapbei, ngo haibü mang tegü hao junga phetetkei. Haoei haoeibü mae ikei kü to shangan laukei, “Tehütma; ngo shaangbou hoba phaibou,

¹⁸langkei kibou kho ki. Ngo haikei, hoba tou ngo ponpen shanga lang kida, hoba ngei haibü hoba Yemsang koukhin ki.”

¹⁹Hibü nyi ai ong hapbei, tou ai ong ki, hoba phaito ai ong loushedlabü ki, doashi.

²⁰Nyi ngeibü mae ika khanshoulitshou nyet hapbü, hoba honeibü wanthung nyeteibü huphang ngüh kho ho: khanshoulitshou nyet kho lashong nyeteibü khuthük hangangbü shuong, hoba wanthung nyet kho lashong nyet ki.