Read Chang Naga TANGKHITBÜ 10 Bible Online

TANGKHITBÜ 10 - Chang Naga bible

TANGKHITBÜ 10

¹Hobaje hau kibü lubü khuthük hangangbü che sangmei hele lean khuthük ka louyenko ngei hapbei; haoeibü khua yepukshangjep che jenkei, hoba haoeibü thenyek kho chanyu tegü kikei; haoeibü you wan thaonyu tegü kikei,

²hoba hao ika tulai haanbü che ipan jungkei. Haoei haoeibü mae you yungnyua hoba nanae you kaomaia nakkei,

³hoba haoei molosaonyuei ngühbü tegü ngüh yaangbüei ngekkei. Ladang haoei ngekkei, langmak nyetei jongaitiko ngühkei.

⁴Hobaje ladang langmak nyet khoei ngüh longkei ngei dola lamlean kikei; lausikei khuthük ka ngüh cheei hai laubü ngei ditkei, “Langmak nyetei ai laukei kho huan phoashi; kho tedolet.”

⁵Hobaje khuthük hangangbü ao ngei yungnyu hoba kaomaia loan hapbei haoei haoeibü mae ik khuthük ae tuokkei,

⁶hoba tou hoba ponpen lang kibou khuthük si kaodak kümbou hoba yungnyu si khonei kibü ajanjan pendou kümbou nyena haoei thekolanko hai laukei: “Touje phaiko akilabü,

⁷lausikei hangangbü nyetboubü ngühlang jihsiphaia, ladang haoei haoeibü teklaang metlaje kheijinei haoei haoeibü sambü thuseibü shuong to lenbü tegü Mühghaüeibü huphang kümsilei shuong kho loushadlabü.”

⁸Ngei khuthük ka lauko ditbü ngüh khoei kü to nyiboula joyokei hoba laukei, “Hauashi, hoba yungnyu si kaomaia loan kibou khuthük hangangbü ik ka ipan kibü tulai kho sungashi.”

⁹Hibü ngo haukei hoba kü la tulai haanbü kho kubü dogo hao to laukei. Haoei kü to laukei, “Ho sungashi hoba shauashi. Hoei kaibü shiang haijeptilabü lausikei ho ka sembunga naodei tegü teibü kilabü.”

¹⁰Ngei tulai haanbü kho khuthük hangangbü ik ka sungkei hoba shaukei, hoba kü sembunga ho naodei maimai teian kikei; lausikei ladang ngei kho shaukei, ngeibü shiang haijeptham yeikei.

¹¹Kheijinei kü to laukei, “Nyi mütli, phangshuong, ngühyem hoba Choba shuong juongnyu shanga nyibou tetenko laujan.”