Read Chang Naga TANGKHITBÜ 12 Bible Online

TANGKHITBÜ 12 - Chang Naga bible

TANGKHITBÜ 12

¹Kheijinei khuthüka ama- aphilabü yaang hapbei. Kho chanyu hele la lebü yaksa che kiteikei; litnyu kho saoeibü youphanga kikei, hoba saoeibü khua khanshoulitshou anthüknyi kibü khun che hanan kikei.

²Sao mang akongko kikei, hoba na hapla shanga nabukshat longbü ka saoei ngekkei.

³Hobaje khuthüka lubü amaaphilabü che hapbei. Kho khu nyet yembü hoba laang an angbü hoba haoeibü khua Choba khun nyet kibü Dragon saklangbü yaangbü che kiteikei.

⁴Haoeibü meiei mühkabü khanshoulitshou phejan sem ka che senletkei hoba kaodak to attikei. Kheijinei buksilengko suila shanga dragon kho na hapla nyangko kibü yaksa kho thedanga lokei.

⁵Saoei bousushou che, aoei namjuei phangshuong pendou songdaklabü ki, hao bukkei. Hobaje na kho Mühghaü jungto hoba Mühghaüeibü Choba setshang jungto leiangkei.

⁶Kheijinei yaksa kho chalou hajar che, saoanto saosem shanga laonei sao pangteilabü shanga Mühghaüei kaoen che lamlekukei, khüto satkei.

⁷Hobaje khuthüka lason che kikei. Maikel hoba haoeibü khuthük hangangbü shuongei dragon khulimbo wapyokei. Dragon si haoeibü khuthük hangangbü shuongeikei wapyokei,

⁸lausikei hao to thüklabü lele hau akitei hoba thonla haoen shanga khuthüka kishang ühüp.

⁹Dragon yaangbü, kaopakbü pinyu, aoto Shabü mühghaü ayingsi Satan dogo lauda, aoei kaodak khümbo khüpettida, hao kho kaodak to attikei, hoba haoeibü khuthük hangangbü shuongkei hao yoa attikei.

¹⁰Hobaje khuthüka ngüh yaangbü cheei lauko ngei ditkei, “Thonla Mühghaüei sen khümena. Haoei sen la haoeibü sei, hoba sangle hoba haoeibü Khrista hau lena, aishanga seneibü jaisina la shed kubou, aoei seneibü Mühghaü thedanga change nangnak haoen la shed kuda, hao kho attida.

¹¹Haoenei hao kho San Shoushoueibü sii hoba haoenei aukabü künbü ngühlangei thükkei, aishanga haoeneibü langkei aphokai hoba haila maangangko kikei.

¹²Kho shanga kan khuthük shuong hoba kan khünei kibü shuong olinashi. Kao hoba yungnyu shanga ügütü! Aishanga haoeibü jih tuisho ong dogo ngean shabü mühghaü aeibou khauang longko kan jungto louyena.”

¹³Hobaje ladang dragonei hao kaodak to attibü ngekei, bousushou che bukkubü yaksanyu kho haoei shieinangeikei.

¹⁴Hobaje pinyu ka huletan yama po sem tho shanga pangteila kibü saoeibü kishang to sao seengjung haula shanga sao la aulu yaangbü cheeibü kaak penyi kukei.

¹⁵Pinyu khoei sao phonglangtila shanga hao sembung ka yaksanyu phainei dei shumang tegü koutikei.

¹⁶Lausikei kaonyu khoei yaksanyu to thuila loukei, hoba kaonyuei hao sembung hakoukei hoba dragonei hao sembung ka longtibü shumang pendou jenkhümbei.

¹⁷Kheijinei dragon yaksanyu to aicheküman khau angkei, hoba saoeibü joubü shousi shuong aoyouei Mühghaü ngühkhüm jungeida hoba Bunyubouei kubü aukabü lanko hatlepda, khübü to wapyola haukei. Hobaje hao yungkoa lokei.