Read Chang Naga TANGKHITBÜ 13 Bible Online

TANGKHITBÜ 13 - Chang Naga bible

TANGKHITBÜ 13

¹Hobaje ngei meisiau che yungnyu ka longko hapbei. Khola laang an hoba khu nyet yeman kikei. Khoeibü laanga khun nyet hoba khua Mühghaü nyikubü nyen shuong kikei.

²Meisiau laobou ngei hapbei kho kongkhü phatko, khoeibü you sapeibü you phatko, hoba khoeibü sembungei molosaonyu sembung phatan kikei. Dragonei kho la haoeibü hau, haoeibü Choba setshang hoba haoeibü songdak kuan apbei.

³Haoeibü khu shuong yoa cheje haileleko ngümnyinbü tegü, lausikei haoeibü haikhün mou kho maian kikei. Kaodak khümboei maangpangko kho meisiau phai sembei.

⁴Haoenei dragon lembei aieilausi haoei meisiau khola songdak kukei, hoba haoenei meisiau kho lembo laukei, “Ho meisiau phatko ao ki? Aoei hao khulimbo wapyola?”

⁵Hao la yonglambü hoba Mühghaü nyikubü ngüh laula sembung che kuan kikei, hoba ho kümla lit saonyito nyi hao la songdak kuan kikei.

⁶Hobaje haoei Mühghaü khulimbo nyikubü ngüh laula, hao nyen hoba hao kishang hoba khuthüka kibü shuong to nyikubü ngüh angla hao sembung ipbei.

⁷Hao la Mühghaü mütshuong to wapyola hoba haoen thükenla sakkukei hoba hao la phang thüka, mütli thüka, ngühyem thüka hoba phangshuong thüka songdak hau kuan kikei.

⁸Kao- pakjineithama haitibü San Shoushou le hoba langkei lea aoyou daneibü nyen doan aki, khübü kaonyudak kabü mütshuong pendouei hao to lemlabü.

⁹Müt at nou yemalonga haoei ditashi.

¹⁰Müt at langsenlabü kisije langsenbü to hao hauda; müt at inei haitilabü kialonga hao inei haitijan. Mühghaü mütshuong shanga natenla hoba mailemla khambü kho tou ki.

¹¹Hobaje lubü meisiau che kaodak ka longko ngei hapbei. Kho la san shoushoueibü tegü laang penyi yeman kikei hoba khoei dragonei tegü laukei.

¹²Haoei shaangbou meisiaueibü songdak pendou kikei hoba haoei kho shaangbou meisiauei chühjinei jungeikei. Hobaje haoei kaodak hoba khonei kibü shuong pendou la haileleko leiluan maibou meisiau kho lemtikei.

¹³Haoei mütshuong thedanga khuthük ka kaodak to wan yantikotham amaaphilabü yaang kümbei.

¹⁴Hobaje ho shaangbou meisiau thedanga laobou amaa- philabü shuong kümla hao la sakkuan kikei, khübüei haoei kaodaka kibü shuong khüpettikei. Haoei kaodak mütshuong pendou to laobou meisiau inthem thükan maikei hao shanga heangsho che kümla shanga lenkei.

¹⁵Kho heangshoei ngüh mangkei anglabü, hoba ladüngei ho meisiau heangsho alemlaje, haoen kho haitilabü shanga meisiau heangsho la langkei hak kula shanga hao la sei kukei.

¹⁶Haoei hanbü hoba yaangbü, keibü hoba shalebü, dongebü hoba aao, pendou la haoeneibü mae ik ayingsi khüngjaa amaaphilabü jangtikei,

¹⁷hoba kho meisiau nyen amaaphilabü ayingsi khoeibü nyen lühbak jangbü to limanje aolakei jekla ayingsi yakla asakku.

¹⁸Honei songsihon khamakei. Aola ditenbü ki haoei kho meisiau lühbak kho weashi, aishanga ho müt cheeibü lühbak. Haoeibü lühbak kho saongao lakto saosemto lak.