Read Chang Naga TANGKHITBÜ 14 Bible Online

TANGKHITBÜ 14 - Chang Naga bible

TANGKHITBÜ 14

¹Kheijinei ngei chühkei, hoba San Shoushou kho Zion shongha loan kikei. Hobaje hao yoa haoeibü nyen hoba hao boueibü nyen khüngjaa doan müt hajar saongaoto sanyito lei kikei.

²Hobaje ngei khuthük ka dei jungnyu koubü hoba langmak yaangbü langh tegü ditkei. Ngei ditbü langh kho kongkin tuokbü shuongei tuokbü tegü kikei.

³Haoenei Choba setshang thedanga hoba langkeibü meisiau lei thedanga hoba jaishou shuong thedanga chia haanbü che atkuko kikei. Kaodak pendou ka angthetbü müt hajar saongaoto saonyito lei to liman kho chia kho aoeikei ditletla athükko kikei.

⁴Haoen kho yaksa to akhonyobü mütshuong, haoen haoen lolo saüenan phokei. Haoen kho San Shoushou haushang pendoua hao phai sembü shuong ki. Haoen kho mütshuong yo ka Mühghaü shanga hoba San Shoushou shanga angthetbü, shaangbü buhek shuong ki.

⁵Haoenei ladangkei ayepei; haoen nali athebü shuong ki.

⁶Hobaje khuthük hangangbü lubü che mühyaaka seengaiko ngei hapbei. Kaodaka kibü shuong phangshuong, phang, ngühyem hoba mütli weko to ngekletla shanga thon akibü ngühlang maibü haoei künan kikei.

⁷Haoei ngüh yaangbü cheei laukei, “Mühghaü to hatashi hoba hao sangashi, aieilausi haoeibü matjembü jihsiphai loua. Khuthük si kaodak yaübou, yungnyu si dei pakshang kümbou lemashi.”

⁸Nyiboubü khuthük hangangbüei phai sembo laukei, “Sao tuonga, Babilon yaangbü, sao tuonga! Mühghaü maangshat sungbatibou ih, laobouei phangshuong pendou la sao asangalanbü ih yungtida, kho sao tuonga.”

⁹Hobaje khuthük hangangbü semboubüei haosi phai sembo ngüh yaangbüei laukei, “Ao mütei meisiau hoba khoeibü heangsho lemda, hoba haoeibü khüngjaa ayingsi ika shangmo leda,

¹⁰haoeibü maangshat thunga shenko kheibü Mühghaü khauang ih khokei haoei yunglabü. Hobaje saopobü khuthük hangangbü shuong thedanga hoba San Shoushou thedanga wan hoba wansat moliei hao khon kulabü.

¹¹Haoen khonkubü wankhük ponpen thon akiko angan apda; aoyouei kho meisiau hoba haoeibü heangsho lemda, ayingsi hao nyen shangmo sungletda, change nangnak haoen hakso aki.”

¹²Hanei Mühghaü ngühkhüm hoba Jisu to mailembü jungeibü Mühghaü mütshuong natenbü shanga ki.

¹³Hobaje ngei khuthük ka ngüh che lauko ditkei, “Doashi: Tou ka jaüan Bunyuboua haibü shuong olinbou. Haü, haoen haoeneibü khonsak ka haksolabü, dogo Soushouei lauda, aishanga haoeneibü kümsilei haoen phai semda!”

¹⁴Hobaje ngei chühkei, hoba sangmei thupaibü che hapbei hoba kho sangmeia müt phatbü che setan hapbei. Haoeibü khua honeibü khun che hoba haoeibü ika langku akbü che jungan kikei.

¹⁵Kheijinei lubü khuthük hangangbü che lembüchem ka longan sangmeia setan kibou khüto ngüh yaangbüei ngekko laukei, “Langku attiashi hoba latashi, aishanga youlat jih süha; aishanga kaodakeibü youshou nyenetakei.”

¹⁶Kheijinei sangmeia setbouei kaodak to haoeibü langku litikei hoba kaodak youshou kho latkei.

¹⁷Hobaje khuthük kabü lembüchem ka lubü khuthük hangangbü che longkei; hoba haoeikei langku akbü che jungan kikei.

¹⁸Kheijinei wan thüka sei kibou khuthük hangangbü lubü che lemshon ka longkei. Haoei langku akbü jungbou khüto ngüh yaangbüei ngekko laukei, “Kaibü langku akbü kho attiashi hoba kaodak semlühlaak ka semlüh shen shuong kho latshaiashi; aishanga kho semphema.”

¹⁹Hibü khuthük hangangbüei kaodak to haoeibü langku attikei hoba kaodak semlüh laak ka mai yoshaikei hoba kho Mühghaü maangpok semlüh ngünshang yaangbü to tekan jinkei.

²⁰Hobaje kho ngünshang kho sang batanga nakeikei, hoba ngünshang ka sii phak che haüko hoba mail saoan sühko dangshatko koukei.