Read Chang Naga TANGKHITBÜ 15 Bible Online

TANGKHITBÜ 15 - Chang Naga bible

TANGKHITBÜ 15

¹Hobaje ngei lubü yaangbü hoba maangpanglabü ama- aphilabü müha hapbei; kho shieinangei nyet kibou khuthük hangangbü nyet kiteikei. Khübü kho thonbü shieinangei, aishanga khübünei Mühghaü maangpok koukei.

²Hobaje wan yoa kheibü mangchüh yungnyu tegü ngei hapbei. Ngei tokei meisiau thüka hoba khoeibü heangsho thüka hoba khoeibü nyen lühbak thüka thükenbü shuong hapbei. Haoenei haoeneibü ika Mühghaü kongkin jungan mangchüh yungkoa lokei.

³Haoenei Mühghaü khangenbou Mosa chia hoba San Shoushoueibü chia hai atko laukei, “Thükenbou Mühghaü Bunyubou, kaibü kümsilei shuong kho yaangbü hoba maangpanglabü; O phangshuong Choba, ka lamnyu tangbü hoba ngühmai ki.

⁴Bunyubou, aoei ka to ühütla, hoba ka nyen soneiakangtila? Aishanga no ong saopobü ki. Phangshuong pendou ka jungto loulabü hoba ka thedanga khüpetlabü, aieilausi kaibü saopobü kümsilei shuong tangkhida.”

⁵Kho phaia ngei chühkei, hoba khuthük ngühchung neichem lembüchem ipbei.

⁶Hobaje kho lembüchem ka shieinangei nyet kibou khuthük hangangbü nyet kho longkei. Haoenei hinseibü hoba chamang shoubü hele lekei hoba honeibü khükhomei khuku jembo kaian kikei.

⁷Hobaje langkeibü meisiau lei yoa cheei khübü khuthük hangangbü nyet la ponpen thon akiko lang kibou Mühghaü maangshatei shenko hon thung nyet kukei.

⁸Hobaje Mühghaü soneikangbü hoba haoeibü sei ka longbü wankhükei lembüchem kho shenkei; hoba khübü khuthük hangangbü nyetei khübü shieinangei nyet kho akhüm shongko aokei kho lembüchem to atla athük.