Read Chang Naga TANGKHITBÜ 16 Bible Online

TANGKHITBÜ 16 - Chang Naga bible

TANGKHITBÜ 16

¹Hobaje ngei lembüchem ka ngüh yaangbü cheei khübü khuthük hangangbü nyet khüto longan lenko ditkei, “Hauashi hoba Mühghaü khauang thung kho kaodak thükto khokan jinkuashi.”

²Shaangbou khuthük hangangbü kho haukei hoba haoeibü thung kho kaodaka khokan jinkukei; hoba kho meisiaueibü shangmo kibü mütshuong hoba khoeibü heangsho lembü shuong to phetla yalabü mou longkei.

³Nyiboubü khuthük hangangbüei haoeibü thung kho yungnyu to khokan jinkei; hoba kho müt haibü sii tegü sii la yeikhümbei hoba yungnyua kibü langkeibü yangsikok pendou haikhümbei.

⁴Semboubü khuthük hangangbüei haoeibü thung kho shumang to hoba deipakshang to luan jinkei; hoba haoen sii la yeikei.

⁵Hobaje ngei dei kabü khuthük hangangbüei lauko ditkei, “O Saopobou, no ao ki hoba ao kiteikei, kaibü matjem janbü ki, aieilausi no ngühmaanglanbü ki!

⁶Aishanga aoyouei Mühghaü mütshuong hoba thuseibü shuong sii koutikei nyi haoen la sii yungla kukei; kho haoenei mubü ki.”

⁷Hobaje ngei lemshonei lauko ditkei, “Haü, thükenbou Mühghaü Bunyubou, kaibü matjembü shuong ngühmai hoba saopobü ki.”

⁸Leiboubü khuthük hangangbüei haoeibü thung kho chanyu to khokan jinkei; hoba müt to siko juokla hao la seisihau kukei.

⁹Mütshuong aubüei aeibou juokeikei; khübü shieinangei thüka sei kibou Mühghaü nyen to haoenei khükkeiuokkei, lausikei haoenei maangpon asepei hoba hao yaangenbou nyen asang.

¹⁰Ngaoboubü khuthük hangangbüei meisiau Choba setshanga haoeibü thung kho khokan jinkukei, hoba khoeibü sangle nakthühan apbei. Hobaje mütshuongei shatbü ka haoeneibü lishang to takngailangkei,

¹¹hoba haoeneibü shat si mou to phetbü anatla khuthük Mühghaü nyen shakei; lausikei haoenei haoeneibü kümsilei kaje maangpon asepei.

¹²Lakboubü khuthük hangangbüei haoeibü thung kho Efrata shumang yaangbüa khokan jinkei. Kheijinei kho dei hapbei hoba khoei chaang aeka louko kibü Choba shuong shanga lam lamlekukei.

¹³Hobaje dragon haken ka, hoba meisiau haken ka, hoba amlangbü thuseibü haken ka dogo yuk phatbü asaopobü soushou sem longko ngei hapbei.

¹⁴Haoen kho shabü mühghaü soushou shuong hoba haoenei amaaphilabü kümda. Thükenbou Mühghaü Chalou yaangbü lason to kaodak khümboeibü Choba shuong huishaila shanga haoen hauda.

¹⁵(Ngo kokbü che phatko louada. Ao müt pianleman kida, hoba ao mütkong paian pühdaka himou abaulabü lele aoei hele lamlean kida kho mütei haükei!)

¹⁶Hobaje Ibri ngüha Armagedon nyenbü kaoen chenei haoen takshatkei.

¹⁷Nyetboubü khuthük hangangbüei haoeibü thung kho mühloma khokan jinkei; hoba lembüchem ka Choba setshang ka ngüh yaangbü che longko laukei, “Ho küma.”

¹⁸Kheijinei langpon, hoba langh, hoba langmak longkei, hoba hatlabü che selo nyikei. Kaopakbü ka jaüan ladangkei nyian achühbü hatlabü selo kaangbütham nyikei!

¹⁹Sangyaang yaangbü kho phejan sem la bangkei hoba phangshuongeibü sangyaang shuong kho tuongkei. Babilon yaangbou kho Mühghaüei damenkei, hoba Mühghaü maangshat ihthung kho sao la kukei.

²⁰Su pendou maukei hoba shongh shuong akiko apbei.

²¹Hobaje müh ka seret anjinsem thüng atsheibü senlang yaangbang müt thükto lotkei, hoba kho senlang shieinangei shanga haoenei Mühghaü to khükkeiuokkei, aishanga shieinangei kho yongko yaangan kikei.