Read Chang Naga TANGKHITBÜ 17 Bible Online

TANGKHITBÜ 17 - Chang Naga bible

TANGKHITBÜ 17

¹Hobaje thung nyet jungbü khuthük hangangbü nyet yo ka che loukei hoba kü to joyokei. Haoei laukei, “Kaiya, hoba deinyu juong thüka sangbü asangalannyu thükto matjembü hautibü kho ngei ka la lenlabü.

²Kaodak Choba shuongei sao to asangalanbü jungeikei hoba kaodaka kibü mütshuong saoeibü asangalan ih danko jakettikei.”

³Kheijinei Soushouei ngo hapbei hoba khuthük hangangbüei ngo lamang che to leilangkei, hoba ngei yaksa che meisiau saklangbü chenei setan kibü hapbei. Meisiau kho Mühghaü nyikubü nyenei shenan kikei hoba hao la khu nyet hoba laang an yeman kikei.

⁴Yaksa kho nakthüngan sakbü hoba saklangbü hele lean hoba hon, namseklaang hoba phülem yakan kikei. Hobaje saoeibü ika mangsenlabü hoba sao asangalan ihinseibü peisileiei shenko hon thung che kikei.

⁵Saoeibü khüngjaa huphang ngühtet che doan kikei, “Babilon yaangbü, asang- alanbü nyu hoba kaodakeibü mangsenlabü.”

⁶Hobaje yaksa kho Mühghaü mütshuongeibü sii hoba Jisu to aukabü künbü siiei jakan ngei hapbei. Ladang ngei sao hapbei ngo aicheküman maangpangkei.

⁷Khuthük hangangbüei kü to laukei, “No aila maangpangkei? Ho yaksa hoba sao künbou khu nyet hoba laang an yembou meisiau huphang ngüh kho ngei ka la lenlabü.

⁸“Nyi hapbü meisiau kho lang kikei, hoba tou aki, lausikei kho thonshang akibü püngkhün ka longlabü hoba maushang to haulabü. Kaodaka kibü mütshuong, aoyoueibü nyen kaopakjinei thama langkei lea doan aki, haoenei kho meisiau hapan maangpanglabü, aieilausi kho lang kikei hoba touje aki, lausikei nyibou longeilabü.

⁹Hanei ditenbü songsido khamakei. Khu nyet kho yaksa setan kibü shongh nyet. Khübü kho Choba nyetkei ki.

¹⁰Haoen ngao tuonga, che hanei kia, lubü che kho molou, ladang hao loulaje hao longche kijan.

¹¹Hobaje meisiau laobou lang kikei hoba tou aki kho setboubü, hoba ho nyet yoakei che ki, hoba ho maushang to haulabü.

¹²Nyi hapbü laang an kho Choba an ki, haoenei songdakla akhangkei; lausikei angh che shanga meisiau yoa haoenei Choba songdak hau sungletda.

¹³Haoen chela hamakei, hoba haoenei haoeneibü hau hoba songdak kho meisiau khola kuda.

¹⁴Haoenei San Shoushou khulimbo wapyolabü, hoba San Shoushouei haoen thükenlabü, aishanga hao kho bunyu shuong yoa Bunyubou, hoba Choba shuong yoa Choba; hoba hao phaia sembü shuong, aoyou ngabü, pienbü hoba maanglemenbü ki haoen kho thükenbü phejana yolabü.”

¹⁵Hobaje khuthük hangangbüei kü to laukei, “Nyi hapbü dei shuong, laonei asang- alanbü setan kiteikei, khübü kho mütshuong hoba noknyüh, phangshuong hoba ngühyem shuong ki.

¹⁶Nyi hapbü laang an hoba meisiau khoei asangalannyu kho mangsenlabü; haoenei sao sangliphanga hoba mütkong yeitilabü, saoeibü phe shaulabü hoba sao wana lontilabü.

¹⁷Aishanga Mühghaü ngüh shuong aloushad shongko hao maangleko kümla hoba maangpon chela lean haoeneibü sangle meisiau la kula Mühghaüei haoeneibü maangpon to jinkukei.

¹⁸“Hobaje laobou yaksa nyi hapbei sao kho kaodak Choba shuong thüka songdaknyu, sangnyu yaangbou kho ki.”