Read Chang Naga TANGKHITBÜ 18 Bible Online

TANGKHITBÜ 18 - Chang Naga bible

TANGKHITBÜ 18

¹Kho phaia ngei lubü khuthük hangangbü che khuthük ka louyenko hapbei. Hao la songdak hau yaang kukei, hoba haoeibü soneikangbüei kaodak shenkei.

²Haoei ngüh yaangbüei ngekkei, “Sao tuonga! Sao tuonga, Babilon yaangbü! Sao kho shabü soushou shuong kishang, asao- pobü soushou hoba asaopobü hoba mangsenlabü au shuong thüngshang la yeia;

³aishanga phangshuong pendou sao yoa saoeibü asangalanbü ihei jakeda, hoba kaodak Choba shuongei sao to asangalanbü jungeikei, hoba sao apsilebü maangdüh danko kaodak namseibü dan keikei.”

⁴Kheijinei ngei khuthük ka lubü ngüh che lauko ditkei, “Kü mütshuong, kan saoeibü shabüa ühamlabü, hoba saoeibü shieinangei asungletlabü lele kan sao ka longan apashi;

⁵aishanga saoeibü shabü shuong müha onko longa, hoba Mühghaüei saoeibü shedbü damena.

⁶Saoei mü lai jungeikei kho tegü saokei jungeiashi. Saoei kümbü mu phejan nyiei aei kungaiashi. Saoei mü shanga kheikubü thung khonei sao la phejan nyiei aei totkuashi.

⁷Saoeibü olin kungkhen hoba apsilebü langkei to thambo sao la khonku hoba maangmau kushi. Aishanga saoei lolo laungaida, ‘Ngo Chobasao che tegü setda; ngo latnyu aying hoba ngei maangmau ladangkei ühüplabü.’

⁸Hibü chalou chenei saoeibü shieinangei loulabü: limsilang, maangmau hoba mühsinou; hoba sao kho wanei lonlabü; aishanga sao matjembou kho Thükenbou Bunyubou Mühghaü ki.”

⁹Ladang haoenei sao lonbü wankhük haplaje, sao to asang- alanbü jungeibü hoba apsilebü langkei kibü kaodak Choba shuongei sao shangabü mang haaplabü.

¹⁰Haoei sao khonku to hatenan hebüa loda hoba lauda, “Yaangbü hoba hauki yaangkibü Babilon sangyaang, ügütü, ügütü, ügütü! Angh che kanglanga kaibü matjem lousüha.”

¹¹Kaodak namseibü shuongei sao shanga haapda hoba mang haapda aieilausi haoeneibü peisilei:

¹²hon, chandinam, namseklaang, hoba ponlem; inyaibü nei maibü, nakthüngan sakbü nei, yanglüh nei, saklangbü nei; citron bu phang pendou, thunyu hauh si namton bu ka kümbü peisilei, chinam, nam hoba marbel;

¹³phoulo, shikmei maitibou, jen, ponlem onang hoba bunai; ih, onang, wen hoba whet; masu, sanlon, koli, koli kailong, aao hoba müteibü langkei yoan, khübü pendou touje aoeikei ajekda.

¹⁴(“Ngei ka to lenda, nyi maangdühbü buhek kho satan apa; apsilebü hoba soneikangbü pendou ka la maukua; khübü kho ladangkei nyibou ühüpmailabü.”)

¹⁵Khübü peisilei yakbü namseibü shuong aoyou sao danko keibü yeikei, haoenei sao khonkubü hapan hatla hebüa lolabü. Haoenei haaplabü hoba mang haaplabü,

¹⁶hoba laulabü, “Inyaibü nei hoba nakthüngan sakbü hoba saklangbü, hoba hon hoba namseklaang hoba phülemei hele lebü ho sangnyu yaangbü, ügütü! ügütü!

¹⁷Aishanga angh che kanglanga khübü nyaksinam khütetche kho shema.” Kheijinei long-bou shuong hoba wakoubü shuong, hoba longleibü si longa küm-mu lebü shuong pendou hebüa lokei.

¹⁸Haoenei sao lonbü wan ka wankhük longbü hapan ngekkei, “Ho sangnyu yaangbü phatko ai sangyaang ki!”

¹⁹Haoenei jembü khua thamngu mokan jinko haapyokei hoba mang haapbei. Haoenei ngekkei, “Saoeibü nyaksinam yaangbü danko yungnyu kabü long-bou shuong keitibü sangyaang kho ügütü! ügütü! ügütü! Angh che kanglanga sao mautojana.”

²⁰Khuthükei olinashi. Kan Mühghaü mütshuong, kan hangangbü shuong hoba thuseibü shuong, sao leilubü to olinashi. Mühghaüei kan shanga sao khulimbo matjembü hautia.

²¹Hobaje hau kibü khuthük hangangbü cheei wen ngünbü laangdak che tonenkei hoba yungnyu to baman attiko laukei, “Babilon yaangbü sangnyu kho hainyu koulangtilabü hoba ladangkei nyibouje ühüplabü.

²²Hobaje kongkin tuokbü shuong, chia laubü shuong, pithung hoba teklaang metbü langh ka to ladangkei nyibou aditlabü; jaken yaüenbü aokei ka to nyibou ühüplabü; ngühbü langh ka to ladangkei nyibou aditlabü;

²³wanthung ngesakbü ka to ladangkei nyibou ühüplabü; hoba chemkanbou ayingsi chemkannyu langh ka to ladangkei nyibou aditlabü. Aishanga kaibü namseibü shuong kho kaodakeibü khulei laanglei shuong kiteikei, hoba phangshuong pendou kho kaibü seibütakbü shuongei khü- pettia.

²⁴Hobaje thuseibü shuong sii, Mühghaü mütshuong sii hoba kaodaka haitibü shuong pendoueibü sii sao to hapbei.”