Read Chang Naga TANGKHITBÜ 19 Bible Online

TANGKHITBÜ 19 - Chang Naga bible

TANGKHITBÜ 19

¹Kho phaia khuthüka noknyüh yaangbü cheei ngekbü langh tegübüei lauko ngei ditkei, “Haliluya! Khümenbü, soneikangbü hoba sei seneibü Mühghaüeibü ki,

²aishanga haoeibü matjembü ngühmai hoba saopobü ki. Suonlamnyu aoei sao asangalan yaangbüei kaodak to lusakbü sungbakei, kho sao thükto haoei matjembü hautikei, hoba hao khangenbü shuong haibü shanga haoei sao to phok lambei.”

³Hobaje haoenei nyibou laukei, “Haliluya! Hobaje sao ka wankhük ponpen thon akiko angdang leda.”

⁴Hobaje jaishou shuong saoto lei hoba langkeibü meisiau leiei khüpetkei hoba Choba setshanga setan kibou Mühghaü to lembo laukei, “Amen, haliluya!”

⁵Choba setshang ka ngüh longko laukei, “Kan hao khangenbü shuong, hoba kan hao to hatbü shuong, kan hanbü yaangbü pendouei seneibü Mühghaü la nyensang kuashi.”

⁶Hobaje noknyüh cheei ngekbü phatko hoba dei juongnyuei ngühbü tegü hoba langmak yaangeibü langh tegü lauko ngei ditkei, “Haliluya, aishanga Thükenbou, seneibü Bunyubou Mühghaüei haoeibü songdak khanga.

⁷Senei olinkho hoba olinyoakho hoba hao la soneikangbü kuakho, aieilausi San Shoushoueibü chemkan jihsi- phai kho lousüha. Haoeibü chemkannyuei sao lolo lamlea,

⁸hoba hele shanga Mühghaüei sao la inyaibü nei, lailaibü hoba hinseibü neisimei kukei.” Inyaibü neisimei kho Mühghaü mütshuongeibü saopobü kümsilei shuong ki.

⁹Hobaje ngüh khoei kü to laukei, “Ho doashi: San Shoushou Chemkan lem to aoyou ngakei haoen olinbou.” Haoei kü to tokei laukei, “Habü Mühghaü ngüh shuong kho ngühmai ki.”

¹⁰Hobaje hao to lemla haoyou junga khüpetkei, lausikei haoei kü to laukei, “Khei teküm. Ngo ka yoa hoba kaibü jaisinasi shuong yoa liko khangenbü che ki. Sen pendou Bunyuboueibü ngühchung künbü shuong ki; Mühghaü lemshi. Aishanga Bunyuboueibü ngühchung kho songlen ngüh soushou ki.”

¹¹Hobaje ngei khuthük ipan hapbei; hoba khünei koli thupaibü che kikei, hoba khonei setbou kho Maanglemenbou hoba Ngühmai dogo nyenan kikei; aishanga haoei saopobüa matjemda hoba wapyoda.

¹²Haoeibü nyek kho wanlüh ki, hoba haoeibü khua khun juongnyu ki. Haoei hao to liman aoeikei angebü nyen che ki.

¹³Hobaje haoei sii hambü neisimei leakei, hoba hao Mühghaü Ngüh dogo nyenkei.

¹⁴Hobaje khuthükbü lakoubü shuong inyaibü nei, thupaibü hoba hinseibü neisimei lean koli thupaibü shuonga setan hao phai sembei.

¹⁵Hobaje phangshuong to ngümla shanga hao sembung ka inlou akbü che loushatda; hoba haoei namjuei haoen thüka songdaklabü, hoba Thükenbou Mühghaü khauang maangpok semlüh hek ngünshang kho haoei nakeilabü.

¹⁶Hobaje haoeibü neisimeia hoba haoeibü youshia nyen che: “CHOBA SHUONG THÜKA CHOBA HOBA BUNYUBOU SHUONG THÜKA BUNYUBOU” dogo doan kikei.

¹⁷Hobaje ngei khuthük hangangbü che chanyua loan hapbei. Hobaje haoei mühloma seengeibü aushuong pendou to ngüh yaangbü cheei ngekkei, “Kaiya,

¹⁸kanei Choba shuong phe, yaangenbü shuong phe hoba hau kibü shuong phe, hoba koli shuong phe hoba khübünei setbü shuong phe, hoba dongebü si aao shuong phe, hoba yaangbü si hanbü müt pendoueibü phe shaula Mühghaü lem yaangbü to takshatashi.”

¹⁹Hobaje ho kolia setbü hoba haoeibü lakjaibü shuong khulimbo wapyola shanga, ho meisiau hoba kaodak Choba shuong hoba haoeneibü lakjaibü shuong yoshaibü ngei hapbei.

²⁰Hobaje meisiau hoba hao yoa laobou amlangbü thuseibüei hao thedanga amaaphilabü kümbei khübünei haoei kho meisiau amaaphilabü sungletbü shuong hoba haoeibü heangsho lembü shuong khüpettikei, haosi ham lapbei. Hobaje wansat moliei longan kibü wan-nang to ham lang lapan jinkei.

²¹Hobaje joubü tan kho kolia setbou sembung ka longbü inlouei haitikei; hoba aushuong pendou haoeneibü pheei senyüh shembei.