Read Chang Naga TANGKHITBÜ 2 Bible Online

TANGKHITBÜ 2 - Chang Naga bible

TANGKHITBÜ 2

¹“Efesiaa kibü lashong hangangbü jungto doashi: Aoei haoeibü mae ika khanshoulitshou nyet jungda hoba ao honeibü wanthung nyet jenyua paida, haoei habü ngüh shuong lauda;

²“Ngei kaibü kümsilei ngeakei. Nyi latetche haujembo kümbeileikei hoba latetche maangkaangko natenkei. Nyi müt amaibü shuong to anatenda dogo ngeakei; aoyouei haoen lolo youkoikjai dogo nyenda, lausikei youkoikjai aying, nyi khübü takteia, hoba nyi haoen yepeibü dan dogo lapena.

³Nyi natenda, nyi kü nyen laüa aeibou aman apa hoba hükomangko ayei.

⁴Lausikei ngei ka khu limbo ho kia, khei nyi kaibü shaangbou sanou mautia.

⁵Hibü, no laka atetkeije damenashi; maangpon sepeiashi hoba nyi shaangla kümbü kümsilei kho kümashi. Khei ayinglonga, no maangpon asepeisije, ngo ka jungto loulabü hoba denshang ka kaibü wanthung kho ngailanglabü.

⁶Lausikei Nikholabü ai kümsilei ngei mangsenda khübü kho nyikei mangsenda, kho ngüh nyi ki.

⁷Lashong dan to Soushouei ai lenda, ao nou yembei haoei ditashi. Aoei thükenda hao la ngei Mühghaü paradaisa kibü langkei bunyu ka shaulabü kulabü.”

⁸“Smernaa kibü lashong hangangbü jungto doashi: Ao khangbü hoba shembü, ao haian langngaikei haoei habü ngüh lauda;

⁹“Ngei kaibü khonkubü hoba no shale khonsakbü ngeakei (tükdebüei no keiasikei), hoba aoyouei jembü to Jihudabü dogo lauda, lausikei haoen Jihudabü aying, lausikei Satan sinagog ki, haoenei nyikubü kho ngei ngekei.

¹⁰No tou nyangko khonkulabü kibü khütokei tehütma. Chühashi, kan takteila shanga Satanei kan at thüngdang to jinla kümda, hoba kan chalou annyet shieinangeilabü. Haibüa sühko natenashi, hoba ngei ka la langkei khun kho kulabü.

¹¹Lashong dan to Soushouei ai lenda, ao nou yembei haoei ditashi. Aoei thükenda hao la nyiboubü haibüei khonsak akulabü.”

¹²“Pergamaa kibü lashong hangangbü jungto doashi: Aoei jijiham akbü inlou jungkei haoei habü ngüh lauda;

¹³“No lanei kida ngei ngeakei; no Satan Choba setshang junga kida. Lausikei nyi kü nyen kaangkhühtham hatlepakei. Ladang ngeibü aukabü Antipas kan yoa Satan thüngshanga haitikei kho jihsiphaia mangkei nyi kü to mailembü aliti.

¹⁴Lausikei ngei kakhu limbo ngüh shijo kia: Aishanga Balaam, aoei Israelbü shuong phaiyettila shanga heangsho to lembü shausiyung shautila hoba asangalanbü kümtila Balak to lenkei, haoeibü lenbü phai sembü müt at nyi khünei phoakei.

¹⁵Kho tegü ong nyikei Nikolabüei lenbü ditbü dan at kan yoa phoakei.

¹⁶Hibü maang- pon sepeiashi. Khei ayinglonga ngo ka jungto tongde loulabü hoba kü sembung inlouei haoen khulimbo wapyolabü.

¹⁷Lashong dan to Soushouei ai lenda, ao nou yembei haoei ditashi. Aoei thükenda huan kibü mana phejan che ngei hao la kulabü; ngei tokei hao la ninulaang thupaibü che kulabü, laobou laanga sungletbou to liman aoei angebü nyen haanbü che doan ki.”

¹⁸“Thiatiraa kibü lashong hangangbü jungto doashi: Aoeibü nyek wanlüh tegü hoba aoeibü you namsek chinam phatko ki kho Mühghaü Shouei habü ngüh lauda.

¹⁹“Ngei kaibü kümsilei, kaibü sanou, kaibü mailem, nyi khangenbü hoba natenbü pendou ngekei; hoba kaibü toubü kümsilei shuong kho shaangbou to maibou ki.

²⁰Lausikei ngei ka khu limbo ho ki, khei Jezebel, laobou saoei jembü lolo thuseinyu dogo lauko, ngo khangenbü shuong to asangalanbü jungeila, hoba heangsho to lembü shausiyung shaula lenda, sao to nyi natenkei.

²¹Ngei sao la maangpon sepeila jihsiphai kukei, lausikei saoei suonlambü ka maangpon sepeimang asüh.

²²Hibü ngei sao shatbü shen chenei lengtida, hoba aoyouei sao to asangalanbü jungeilaje haoenei jembü kümsilei ka maangpon asepeilonga haoen khonsak khonku yaangbü to attilabü.

²³Ngei saoeibü shousi shuong khümbo shemtilabü; hoba ngo haübü hoba maangpon lambou ki dogo lashong pendouei ngelabü, hoba ngei kan mütpem weko la lulueibü kümsilei thüng jongsak kulabü.

²⁴Lausikei Thiatiraa kibü joubü aoyou danei ho lenbü asunglet, khei atei Sataneibü haübü kümsilei dogo laubü aoyouei ange, kan to ngei lenda, ngei kan thükto lubü onat ai ajinyokuda.

²⁵Lausikei ngo aloushongko kanei ai ki khonei kaangkhühtham hatlepashi.

²⁶Aoei thükenda hoba thonbüa sühko ngei mangsühbü tegü maanglanko kümda, ngei kü Bou ka hau lai hapbei kho tegü, phangshuong thüka ngei hau kulabü. Haoei haoen thüka namjuei songdaklabü hoba thamchak tegü phetnyintilabü, hoba ngei hao la khanyang kho kulabü.

²⁹Lashong dan to Soushouei ai lenda, ao nou yembei haoei ditashi.”