Read Chang Naga TANGKHITBÜ 20 Bible Online

TANGKHITBÜ 20 - Chang Naga bible

TANGKHITBÜ 20

¹Hobaje thonshang akibü püngkhün koukhin hoba yangmen yaangbünyu hao ika jungan khuthük hangangbü che khuthük ka louyenko ngei hapbei.

²Hobaje haoei dragon, khei hangbü pinyu, laobou shabü mühghaü ayingsi Satan, kho lapbei hoba po hajar che shanga hao khühan phokei.

³Hobaje haoei hao thonshang akibü püngkhün to jinkei, hoba po hajar che kho apen shongko, haoei phangshuong khüpettila athüktila shanga hao khünglepbei, hoba kho thüka amaaphilabü shangjinkei. Kho phaia hao jih tuisho shanga litilabü.

⁴Hobaje ngei Choba setshang hapbei, hoba kho thüka haoen setkei, hoba haoen la matjemlabü kuan kikei. Hobaje Jisu aukabü shanga hoba Mühghaü ngühlang songlenbü shanga aoyou khu thetkei khübüeibü soushou shuong ngei hapbei. Haoenei meisiau ayingsi haoeibü heangsho alem, hoba haoeneibü khüngja si haoeneibü ika haoenei amaaphilabü shangjinbü asunglet. Haoen langkeingaikei hoba Jisu yoa po hajar che songdakkei.

⁵(Po hajar che kho apen shongko joubü haibü shuong kho nyibou alangkei.) Kho shaangbou langngaibü ki.

⁶Kho shaangbou langngaibüa thujambü shuong haübou hoba saopobü dan ki. Haoen thüka nyiboubü haibüei sei aki, lausikei haoen Mühghaüeibü hoba Khristaeibü ungshedbou shuong ki, hoba haoenei hao yoa po hajar che songdaklabü.

⁷Hobaje ladang po hajar che kho onlaje, Satan kho haoeibü thüngdang ka litilabü,

⁸hoba kaodak kaonyek leia kibü phangshuong, Gog si Magog, haoen khüpettiko takshatla shanga hao haulabü; haoeneibü lühbak kho yungnyu phetsen maimai ki.

⁹Haoen kaonyudak pendou phambo haukei hoba Mühghaü mütshuong shaishang si haoei sanoubü sangnyu komlepbei, lausikei khuthük ka wan lotkei hoba haoen lonkei.

¹⁰Hobaje haoen khüpettibou kaokabü mühghaü kho, wan hoba wansat moli püngkhüna, laonei ho meisiau si amlangbü thuseibü kida, khüto lapan jinkei. Khonei haoen change nangnak ponpen thon akiko khonkulabü.

¹¹Hobaje Choba setshang thupaibü yaangbü che hoba khonei setbou ngei hapbei. Hobaje kaodak si khuthük haothe ka satkei hoba kishang ühüpbo maukei.

¹²Hobaje Choba setshang thedanga haibü shuong hanbü hoba yaangbü pendou loan ngei hapbei, hoba le shuong ipbei. Hobaje lubü le, langkei le kho ipbei. Hobaje khübü lea doan kibü tegü, haibü shuong jembü kümsilei thüng matjembei.

¹³Hobaje yungnyuei jembü to kibü haibü shuong khümbomeiko kukei, hoba haibü si Yemsangei jembü to kibü haibü shuong khümbo kuan apbei; hoba mütpem weko jembü kümsilei thüng matjembei.

¹⁴Hobaje haibü si Yemsang molowana jinkei. Ho nyiboubü haibü, khei wan-nang püngkhün ki.

¹⁵Hobaje ateibü nyen langkei lea doan akitei longa hao molowan to jinkei.