Read Chang Naga TANGKHITBÜ 21 Bible Online

TANGKHITBÜ 21 - Chang Naga bible

TANGKHITBÜ 21

¹Hobaje khuthük haanbü hoba kaodak haanbü che ngei hapbei; aishanga shaangbou khuthük si shaangbou kaodak kho dana, hoba yungnyu touje aki.

²Hobaje jembü lao shanga chemkannyuei hele lamlebü tegü lamlean, saopobü sangyaang, haanbü Jerusalem, Mühghaü jungka khuthük ka louyenko ngei hapbei.

³Hobaje Choba setshang ka ngüh yaangbüei lauko ngei ditkei, “Chühashi, Mühghaü müt yoa kila louakei. Hao haoen yoa kilabü hoba haoen kho hao mütshuong yinglabü; Mühghaü jembü lolo haoen yoa kilabü hoba haoeneibü Mühghaü yinglabü.

⁴Haoei haoeneibü nyek ka nyeksi pendou haman apbulabü hoba haibü touje akilabü, mang haap- yobü ayingsi haaplabü ayingsi khonku touje akilabü; aishanga shaangbü shuong dankhüma.”

⁵Hobaje Choba setshanga setbouei laukei, “Chühashi, ngei pendou haanbü kümda.” Hobaje haoei lauda, “Doashi: Aishanga habü ngüh mailemlabü hoba ngühmai ki.”

⁶Hobaje haoei kü to laukei, “Khübü loushada. Ngo Alfa hoba Omega, khangbü hoba shembü. Deilabü la ngei langkei dei pakshang ka mu aleko ong yungtilabü.

⁷Aoei thükenda haoei habü phet phanlabü; hoba ngo hao Mühghaü yinglabü, hoba hao küshou yinglabü.

⁸Lausikei hattembü, maialembü, mangsenlabü, müt haitibü shuong, asang- alanbü, seibütakbü shuong, heangsho lembü shuong, hoba yepeibü shuong pendou wan hoba wansat wankhükei longan kibü molowan phejan haplabü: kho nyiboubü haibü ki.”

⁹Hobaje thonbü shieinangei nyetei shenko thung nyet jungbü khuthük hangangbü nyet yo ka che kü jungto loukei hoba kü to joyokei. Haoei laukei, “Kaiya, ngei ka la leiyetnyu, San Shoushoueibü yak kho lenlabü.”

¹⁰Soushoua haoei ngo shongh yaangbü hoba suokbü che to leiangkei, hoba haoei saopobü sangyaang, haanbü Jerusalem, Mühghaü jungka khuthük ka

¹¹Mühghaü soneikangbüei shenan louyenko kü la haptikei. Khoeibü ngesakbü kho, khei namseklaang, chalongphat hinseibü jasper maimai kiteikei.

¹²Khonei laang ba yaangbü hoba suokbü, hoba bakou anthüknyi kikei hoba bakoua khuthük hangangbü anthüknyi kikei. Hobaje khonei Israel shousi phang anthüknyi nyen doan kiteikei.

¹³Chaang aenei bakou sem, yungthang aenei bakou sem, yungkük aenei bakou sem hoba chanep aenei bakou sem kikei.

¹⁴Hobaje sangyaang laang ba khünei kishang anthüknyi kikei, hoba khonei San Shoushou hangangbü anthüknyi nyen anthüknyi doan kikei.

¹⁵Hobaje kho sangyaang hoba khübü bakou shuong takla shanga kü to joyobouei honeibü phodong takjin che kikei.

¹⁶Hobaje sangyaang kho chemnyek lei, süng si khaang jetei ong kikei. Haoei phodongei sangyaang kho takan chühsi mail hajar cheto saongao ngao kiteikei. Khoeibü süng, khaang hoba suokbü jetei ong kikei.

¹⁷Hobaje haoei kümthang takkei; kho müt che, khei khuthük hangangbüei takbüei phak khujinto lak kikei.

¹⁸Hobaje kümthang kho jasperei thenyokei, hoba sangnyu kho lanbü hon hinseibü mangchüh tegübüei yaükei.

¹⁹Sangyaang laangshong ba denshang kho namseklaang phang pendouei hemaiko yaükei. Shaangbou denshang kho jasper kikei, nyiboubü, kho safir, semboubü kho agate, leiboubü kho emerald,

²⁰ngaoboubü kho sardonika, lakboubü kho sardia, nyetboubü kho khrisol, setboubü kho beril, güboubü kho topaz, anboubü kho khrisopras, anthükche boubü kho jasin, hoba anthüknyi boubü kho amethis.

²¹Hobaje bakou anthüknyi kho phülem anthüknyi kiteikei: bakou weko kho phülem che bangei kümbei. Hobaje sangnyu khongchi kho mangshoubü mangchüh tegü hon hinseibü kiteikei.

²²Hobaje sangyaang khünei ngei ai lembüchem ühüp; aishanga pendou Thükenbou Bunyubou Mühghaü hoba San Shoushou kho lembüchem ki.

²³Hobaje sangyaang khonei hautila shanga chanyu ayingsi litnyu ngesakbü akhamda, aieilausi Mühghaü soneikangbüei kho ngesaktikei, hoba San Shoushou khoeibü wanthung ki.

²⁴Hobaje phangshuongei kho ngesakbü maanga pailabü, hoba kaodak Choba shuongei haoeneibü soneikangbü kho maangto sungbalabü.

²⁵Hobaje ho bakou chaloua ladangkei akhinlabü, hoba khonei nangnak akilabü.

²⁶Hobaje haoenei phangshuongeibü soneikangbü hoba nyenhang khüto sungbalabü.

²⁷Hobaje denche ihinseibü, ayingsi mangsenlabü jungeibü hoba yepeibü khüto aokei ütlabü lausikei aoyou nyen ong ho San Shoushoueibü langkei lea doan ki haoen ong atlabü.