Read Chang Naga TANGKHITBÜ 22 Bible Online

TANGKHITBÜ 22 - Chang Naga bible

TANGKHITBÜ 22

¹Hobaje khuthük hangangbüei Mühghaü hoba San Shoushou Choba setshang ka chalong phatko lailaitham koubü langkei dei shumang che kü la lenkei.

²Ho sangyaang khongchi ka koukei. Hobaje deiko jijinei langkei bunyu chebang kikei, hoba khoei buhek phang anthüknyi hekda, hoba lita che hekda, hoba bunyu yik kho phangshuong mailabü shanga kiteikei.

³Hobaje shedsikhau touje aikei akilabü. Khünei Mühghaü hoba San Shoushoueibü Choba setshang kilabü, hoba hao khangenbü shuongei hao to lemlabü;

⁴haoenei hao the haplabü, hoba hao nyen kho haoeneibü khüngjaa kilabü.

⁵Touje khünei nangnak akilabü, hoba haoenei wanthung ngesakbü ayingsi chanyu akhamlabü, aieilausi Bunyubou Mühghaüei haoen la ngesakbü kulabü, hoba haoenei ponpen thon akiko songdaklabü.

⁶Hobaje khuthük hangangbüei kü to laukei, “Habü ngüh mailemlabü hoba ngühmai ki, hoba tongde ai loushadlabü ki, kho thuseibü soushou shuong Mühghaü Bunyubouei hao khangenbü shuong to lenla jembü khuthük hangangbü hautikei.

⁷Ditashi! Ngo tongde louada. Aoei ho lea tetenbü ngüh shuong jungeida hao olinbou.”

⁸Hobaje ngo Johanei habü ngüh shuong ditkei hoba hapbei. Ladang ngei khübü ditkei hoba hapbei, laobou khuthük hangangbüei kü la khübü lenkei, hao lemla ngo hao you junga khüpetkei.

⁹Hobaje haoei kü to laukei, “Khei teküm. Ngo ka yoa hoba kaibü jaisina thuseibü shuong hoba ho lea dobü jungeibü shuong yoa liko khangenbü che ki. Mühghaü lemshi.”

¹⁰Hobaje khuthük hangangbüei kü to laukei, “Habü le tetenbü ngüh shuong amaaphilabü shangjinko tekhin; aishanga pienbü jih lousühda.

¹¹Ao ngühmaang alan, hao toukei ngühmaang alanko kijan; hoba ao ihinsei, hao toukei ihinseibü yingjan; hoba ao ngühmaanglanbü ki hao toukei ngühmaanglanko kijan; hoba ao saopobü ki, hao toukei saopotham kijan.”

¹²Bunyubouei lauda, “Ditashi! Ngo tongde louada, hoba mütpem weko la jembü kümsilei thüng kula ngei kü yoa jongsak künbada.

¹³Ngo Alfa hoba Omega, shaangbou hoba thonbou, khangbou hoba shembou.”

¹⁴Aoyouei jembü nei sakda haoen olinbou; aishanga haoen la langkei bunyu ka shautilabü hoba sangyaang bakhün to lottilabü.

¹⁵Kei shuong hoba seibütakbü shuong, hoba asangalanbü, hoba müt haitibü shuong, hoba heangsho lembü shuong hoba yepeibü sanoubü hoba jungeibü shuong pendou bataka kilabü.

¹⁶“Ngo Bunyubouei lashong dan shanga kan to habü ngüh aukabü kula ngeibü khuthük hangangbü hautia. Ngo Dawid li hoba thensilen, soneibü langnge khanyang.”

¹⁷Soushou hoba Leiyetnyuei lauda, “Kaiya!” Hobaje aoei ditda haoei, “Kaiya!” dogo lenshi. Ao dei lada hao loutikai, hoba aoei mangsühda haoei langkeibü dei mu akuko leashi.

¹⁸Ho lea tetenbü ditbü shuong mütpem weko to ngei aukabü kuko lenda: Atei habü ngüh to denche shomyoalonga, ho lea doan kibü shieinangei shuong kho müt to Mühghaüei shomyokulabü;

¹⁹hoba atei ho tetenbü le ngühshuong ka denche apalonga, ho lea doan kibü langkei bunyu hoba saopobü sangyaang ka Mühghaüei hao phejan apbulabü.

²⁰Aoei ho ngühlang kuda, haoei lauda, “Haü, ngo tongde louda.” Amen. Bunyubou Jisu, Kaiya!

²¹Bunyubou Jisu onou pendou yoa kishi. Amen.