Read Chang Naga TANGKHITBÜ 3 Bible Online

TANGKHITBÜ 3 - Chang Naga bible

TANGKHITBÜ 3

¹“Sardia kibü lashong hangangbü jungto doashi: Aoei Mühghaü soushou nyet ki haoei habü ngüh lauda. “Ngei no khümbo ngeakei: nyenei no lang kia, lausikei no haibü.

²Laksepashi! Mohaijinei nyi ai jouan ki kho hau kingeitiashi. Aishanga kü Mühghaü thedanga kaibü kümsilei penbüsoubü yeibü ngei ai ühüp.

³Nyi ai sungletkei hoba ditkei kho damenashi; hoba jungeiashi hoba maangpon sepeiashi. No alakseplonga ngo kokbü che tegü loulabü, hoba ngo ladang ka thükto loulaje kho jihsiphai nyi angelabü.

⁴Lausikei no Sardiaa, haoeneibü neisimei atotnyinbü müt shijo kia. Haoen kü yoa thupaibüa pailabü shanga haoen mubü.

⁵Aoei thükenda haokei haoen tegü thupaibü hele letilabü, hoba ngei hao nyen langkei le ka haman üplabü; kü Bou thedanga hoba haoeibü hangangbü shuong thedanga ngei haoeibü nyen theletlabü.

⁶Lashong dan to Soushouei ai lenda, ao nou yembei haoei ditashi.”

⁷“Filadelfiaa kibü lashong hangangbü jungto doashi: Ao saopobü hoba ngühmai, ao ika Dawid koukhin ki; ladang haoei kho koukap ipdaje aoeikei akhinda, hoba ladang haoei kho khindaje aoeikei ipla athük, haoei habü ngüh lauda.

⁸“Ngei no khümbo ngeakei. Ngei ka thedanga koukap che laobou aoeikei akhinenlabü kho ipan phokuakei. Ngei ngeakei, ka la hau hansho kia, lausikei kü ngüh jungeia hoba kü nyen atheletko aki.

⁹Satan sinagog, aoyouei jembü to Jihudabü dogo lauda, lausikei haoen Jihudabü aying, lausikei amlang lauda, kheibü müt at kia. Ngei haoen loutilabü hoba ngei ka to sanoua dogo ngetila shanga ka you junga khüpetan lemtilabü.

¹⁰Aishanga nyi ngeibü natenbü ngüha leko jungeisije, laobou takteibü jihsi- phai kaonyudaka kibü pendou jungto loulabü ki, kho kümsilei ka ngeikei no püetlabü.

¹¹Ngo tongde louada. Kaibü khun aoeikei alanglabü lele nyi ai ki kho kaangkhühtham hatlepashi.

¹²“Aoei thükenda hao kü Mühghaü lembü chema ngei thaonyu che yeitilabü, hoba hao khünei ponpen kilabü. Hobaje kü Mühghaü nyen, kü Mühghaü sangnyu, haanbü Jerusalem, laobou khuthük ka kü Mühghaü ka louyenda, kho nyen hoba kü nyen haanbü ngei hao to dolabü.

¹³Lashong dan to Soushouei ai lenda, ao nou yembei haoei ditashi.”

¹⁴“Laodikiaa kibü lashong hangangbü jungto doashi: Ao Amen, ao maanglemenbü hoba ngühmai aukabü, ao Mühghaü kümbü khangshang ki, haoei habü ngüh lauda;

¹⁵“Ngei no khümbo ngeakei; ngei ngeakei no libükei ji aubükei ji. Ngei no libü ayingsi aubü yingtimang sühda.

¹⁶Hibü no libükei ji aubükei ji, lemshedtibü yingsije, ngei no kü sembung ka ngaitilabü.

¹⁷Nyi lauda, ‘Ngo keiakei. Ngei nam apsileko ki. Ngei ai akhamda.’ Lausikei no khonsakbü thu, khonkubü, shalejongle, nyekthubü hoba mütkong dogo nyi angekei.

¹⁸No keibü yeila shanga yaüshema juokenbü hon; hoba no mütkongbü himou küpla shanga, nyi lela neisimei thupaibü; hoba nyi haplabü lele ka nyek shanga naanglabü moli; kü ka jekla shanga ngei no thungeijangeida.

¹⁹Ngei aoyou to sanouda haoen to ngei hakda hoba ngümda. Hibü aeibou maangdakashi hoba maangpon sepeiashi.

²⁰Ngo hanei koukhüna loan koukapa kuokeida. Atei kü ngüh ditan kou ipbua longa, ngo lotlabü hoba ngo hao yoa hoba hao kü yoa shaula yunglabü.

²¹Ngei ai lai thükenan kü Bou yoa haoeibü Choba setshanga setda, kho tegü aoei thükenda, hao kü yoa ngeibü Choba setshanga settilabü.

²²Lashong dan to Soushouei ai lenda, ao nou yembei haoei ditashi.”