Read Chang Naga TANGKHITBÜ 4 Bible Online

TANGKHITBÜ 4 - Chang Naga bible

TANGKHITBÜ 4

¹Kho phaia ngei chühkei, hoba khuthüka koukap che ipan kikei, hoba shaangbou ngüh ngei ditbü kho, teklaang phatbü cheei kü to joyoko kikei. Khoei laukei, “Hato kaiyang, hoba ho phaia ai loushadlaje ngei ka to lenlabü.”

²Kheijineitham soushou kü thükto lotkei. Hobaje khuthüka Choba setshang che kiteikei, hoba kho Choba setshanga müt che setan kiteikei.

³Khonei setbou chühla kho jasper hoba karnelian phatko kiteikei; hoba Choba setshang kaijembo yepukshangjep che eme- rald phatko jenan kikei;

⁴Choba setshang kaiko ngei Choba setshang saoto lei hapbei. Choba setshang khünei jaishou shuong saoto lei setan kikei; haoenei neisimei thupaibü lean kikei, hoba haoeneibü khua honeibü khun hanan kikei.

⁵Choba setshang khoka langpon, langh hoba langmak longkei. Choba setshang thedanga hantin nyet longan kikei; khübü kho Mühghaü soushou nyet ki.

⁶Choba setshang thedanga mangchüh phatko sonlailaibü yungnyu che tegü kikei, hoba Choba setshang jenyua hoba kaijembo langkeibü meisiau lei, thedang hoba phai pendou nyeklangei shenan kikei.

⁷Shaangbou meisiau kho molosaonyu phatan, nyiboubü kho masu shoushou phatbü, semboubü kho müteibü thenyek phatko yeman, hoba leiboubü kho seengbü aulu phatko kikei.

⁸Meisiau lei kho kaak lakbang yeman, tangae mangae pendou nyeklangei shenan kikei. Change nangnak hak asoko, “Saopobü, saopobü, saopobü, Bunyubou Mühghaü, Thükenbou, ao kiteikei, ao tou ki, hoba ao louada,” dogo haoenei lauko chia laukei.

⁹Hobaje ladang ong khübü meisiau shuongei ponpen thon akiko langkei kibou Choba setshanga setbou la soneikangbü, soumo hoba nyensang kulaje,

¹⁰jaishou saoto lei khoei Choba setshanga setbou thedanga khüpetda, hoba ponpen thon akiko langkei kibou to lemda, hoba haoenei haoeneibü khun Choba setshang thedanga sungenan phokuko chia hai laulabü,

¹¹“Küneibü Bunyubou, hoba küneibü Mühghaü, soneikangbü, nyenhang hoba sei hapla no mubou; aishanga pendou nyi kümbei. Hobaje ka maangangbüei haoen yeikei hoba langkei kukei.”