Read Chang Naga TANGKHITBÜ 5 Bible Online

TANGKHITBÜ 5 - Chang Naga bible

TANGKHITBÜ 5

¹Kheijinei Choba setshanga setbou mae ika tulai che maangae si tangaenei doan, amaaphilabü nyetei shangjinan hapbei.

²Hobaje ngei khuthük hangangbü hau yaangbü cheei ngüh yaangbüei, “Ho le ipla hoba amaaphilabü shuong seengla ao muan ki?” dogo ngekko hapbei.

³Khuthüka ayingsi kaodaka ayingsi kaonyu manga aokei kho tulai ipla ayingsi khüto chühla thükbü akitei.

⁴Ngo aeibou haapbei, aishanga kho tulai ipla ayingsi khüto chühla mubü aokei akitei.

⁵Hobaje jaishou shuong yoa cheei kü to laukei, “Tühaap. Jihuda phang kabü molosaonyu, Dawid thensilenei thükena; hibü haoei tulai hoba khoeibü amaaphilabü nyet shangjinbü kho ipla thükkei.”

⁶Kheijinei ngei Choba setshang jenyua langkei kibü meisiau lei si jaishou shuongei kailepan San Shoushou che loan hapbei. Hao kho chühla haitibü tegü kikei. Hao la laang nyet angan hoba nyek nyet yeman kikei; khübü kho kaodak pendou to hautibü Mühghaü soushou nyet kikei.

⁷Hao loukei hoba Choba setshanga setan kibou mae ik ka tulai kho sungkei.

⁸Ladang haoei kho sungkei, langkei kibü meisiau lei si jaishou shuong saoto lei khoei San Shoushou thedanga khüpetkei. Haoen weko kongkin che bang hoba jenei shenan honeibü phau che bang kikei; khübü kho Mühghaü mütshuongei welaubü kikei.

⁹Haoenei chia haanbü che laukei: “Tulai kho sungla hoba khübü amaaphilabü shangjinbü kho ipla no mubü, aishanga no haitikei hoba no haibü danko phang, ngühyem, mütli hoba phangshuong weko ka Mühghaü shanga nyi mütshuong jektheda.

¹⁰Nyi haoen seneibü Mühghaü shanga ungshedbü sangle la yeitikei, hoba haoenei kaodaka songdaklabü.”

¹¹Kheijinei ngei chühkei hoba ngei kho Choba setshang, langkei kibü meisiau shuong hoba jaishou shuong kaijembo lobü khuthük hangangbü juongeibü ngüh ditkei; hoba haoeneibü lühbak kho shongh shongha, hoba hajar hajar lauko kikei.

¹²Haoenei ngüh yaangbüei laukei; “Haitibü San Shoushouei sei, keisiyaang, songsihon, hau, nyenhang, soneikangbü hoba nyensang hapla mukei.”

¹³Hobaje khuthüka, kaodaka, kaomanga hoba simaanga, yaübü peisilei khümbo hoba yaübü wekoei hai lauko ngei ditkei: “Choba setshanga setan kibou hoba San Shoushou to ponpen shanga, nyensang, nyenhang, soneikangbü hoba hau, ponpen thon akiko yingshi.”

¹⁴Hobaje langkeibü meisiau lei khoei laukei, “Amen”; hoba jaishou shuongei khüpetkei hoba lembei.