Read Chang Naga TANGKHITBÜ 6 Bible Online

TANGKHITBÜ 6 - Chang Naga bible

TANGKHITBÜ 6

¹Kheijinei San Shoushou khoei amaaphilabü shangjinbü nyet kho ipbo hapbei, hoba ngei langkeibü meisiau lei yoa cheei langmak tegü ngüh yaangbüei, “Kaiya!” dogo lauko ditkei.

²Ngei chühkei hoba koli thupaibü che kikei. Khonei setbouei lau che jungkei, hao la khun che hankukei, hoba shian apla shanga thük hapbo haukei.

³Ladang San Shoushouei amaaphilabü shangjinbü nyiboubü kho ipbei, ngei nyiboubü meisiauei, “Kaiya!” dogo lauko ditkei.

⁴Kho phaia lubü koli saklangbü che longkei. Hobaje kho thüka setbou la mütshuong cheei che haitiyola shanga hoba kaodak ka sangmai ngailangla sakkubü kukei; hoba inlou yaangbü che kho hao la kukei.

⁵Ladang San Shoushouei amaaphilabü shangjinbü semboubü kho ipbei, ngei semboubü meisiauei, “Kaiya!” dogo laubü ditkei. Ngei chühkei, hoba khonei koli nakhübü che kiteikei. Khonei setboueibü ikmanga seret yaüjin che jungkei.

⁶Langkeibü meisiau lei jenyu ka longbü ngüh che tegü lauko ngei ditkei, “Whet youshou seret che lu adoli che hoba barli youshou seret sem lu adoli che, lausikei oliv onang si ih teleiluti.”

⁷Ladang San Shoushouei amaaphilabü shangjinbü leiboubü kho ipbei, ngei leiboubü meisiauei, “Kaiya!” dogo laubü ditkei.

⁸Ngei chühkei hoba khonei koli phaklakbü son che kikei. Khonei setboueibü nyen kho Haibü, hoba Yemsang hao phainei setkei. Kaodak ka phejan leiboubü kho inei, müheinouei hoba limsilangei, hoba kaodak kabü meisiauei dogo shemtila shanga haoen la hau kuan kikei.

⁹Ladang San Shoushouei amaaphilabü shangjinbü ngaoboubü kho ipbei, khonei Mühghaüeibü ngühlang hoba haoenei jungenbü ngühchung laüa haitibü shuongeibü soushou shuong ngei lemshon phanga hapbei.

¹⁰Haoenei ngüh yaangbüei ngekkei, “Saopobü hoba ngühmai Bunyubou, matjemla hoba kün haitibü sii shanga kaonyudaka kibü shuong to phoklamla nyi lalokche haisühla?”

¹¹Haoen mütpem weko la hele thupaibü che bang kukei, hoba jenabou khangenbü shuong hoba jaisinasi shuong, haoen tegü aoyou haitilabü ki, haoen pendou lühbak aonlang shongko haksoteila haoen to lenkei.

¹²Kheijinei ngei chühkei, hoba San Shoushouei amaaphilabü shangjinbü lakboubü kho ipbei, kheijinei selo yaang nyikei; chanyu kho neikek tegü nakkhüan yeikei, hoba litnyu khümbo sii la yeikei;

¹³yei kaangbüei bhuklong nyaakeitijinei bhuk asembü atbü tegü khanshoulitshou shuong kaodak to moletnyu atkhümbei;

¹⁴müh kho tulai tungaibü tegü maukei; shongh hoba su pendou jembü kaoen ka kukkei.

¹⁵Kheijinei kaodak kabü Choba shuong, khuleibü shuong, yaangenbü shuong, keijeibü hoba hau kibü dan, hoba aao hoba solo müt pendou haoen lolo laangkhün si shongh kabü laanglipa hukei.

¹⁶Haoenei shongh hoba laanglak to laukei, “Kün thükto lotashi hoba Choba setshanga setbou thenyek si San Shoushou maangshat ka kün hukai;

¹⁷aishanga haoeneibü maangshat Chalou yaangbü kho lousüha, hoba aoei loan kienla?”