Read Chang Naga TANGKHITBÜ 7 Bible Online

TANGKHITBÜ 7 - Chang Naga bible

TANGKHITBÜ 7

¹Kho phaia ngei khuthük hangangbü lei kaodak chemnyek leia loan hapbei. Kaodak ayingsi yungnyu ayingsi bunyu che to ongkei asoutila shanga kaodak kabü yeilam lei pendou haoenei hatlepan phokei.

²Hobaje langkeibü Mühghaüeibü amaaphilabü shangjinbü jungan chaang aeka khuthük hangangbü lubü che longko ngei hapbei. Kaodak si yungnyu leilutila hau sakkuan kibü khuthük hangangbü lei kho to haoei ngüh yaangbüei ngekko laukei,

³“Künei küneibü Mühghaü khangenbü khüngjaa amaaphilabü ashangjin shongko kaodak yingsikei, yungnyu yingsikei ayingsi bulong yingsikei khon tesakti.”

⁴Kheijinei amaaphilabü shangjinbü shuong lühbak ngei ditkei; kho Israel shousi shuong phang weko ka hajar saongaoto saonyito lei kiteikei.

⁵Jihuda phang ka hajar anthüknyi, Reuben phang ka hajar anthüknyi, Gad phang ka hajar anthüknyi,

⁶Asher phang ka hajar anthüknyi, Naftali phang ka hajar anthüknyi, Manasee phang ka hajar anthüknyi,

⁷Simeon phang ka hajar anthüknyi, Levi phang ka hajar anthüknyi, Issakhar phang ka hajar anthüknyi,

⁸Zebulun phang ka hajar anthüknyi, Josef phang ka hajar anthüknyi, Benjamin phang ka hajar anthüknyi dogo shangjinkei.

⁹Kho phaia ngei chühkei hoba aoeikei wela athükbü mütshang yaangbü che kiteikei; haoen kho phangshuong, phang, mütli hoba ngühyem weko ka kiteikei. Haoen thupaibü helea haoeneibü ika hekyang ham jungan Choba setshang hoba San Shoushou thedanga loan kikei.

¹⁰Haoenei ngüh yaangbüei ngekkei: “Khümenbü kho Choba setshanga setbou küneibü Mühghaü hoba San Shoushou ka ki.”

¹¹Khuthük hangangbü pendou Choba setshang, jaishou shuong hoba langkeibü meisiau shuong kaiko lokei hoba haoenei haoen lolo Choba setshang thedanga khü- petkei hoba Mühghaü lembo

¹²laukei, “Amen. Haülabü, soneikangbü, songsihon, nyensangbü, nyenhang, sei hoba hau pendou thon akiko seneibü Mühghaü to yingshi: Amen.”

¹³Kheijinei jaishou yoa müt cheei kü to laukei, “Hele thupaibü lean kibü shuong kho aoyou hoba haoen laka loukei?”

¹⁴Ngei hao to laukei, “Yaangbou, nyi ngekei.” Haoei kü to laukei, “Habü shieinangei yaang ka loushadbü mütshuong ki. Haoenei San Shoushoueibü siia haoeneibü hele sakan thupaibü yeitikei.

¹⁵Khoei ong haoen Mühghaü Choba setshanga ki hoba hao to haoeibü lembüchema change nangnak hao lemda; hoba Choba setshanga setbouei haoen neichemei danglepkulabü.

¹⁶Haoen ladangkei nyibou mühei ühailabü ayingsi dei alalabü; juokbü chanyu aubü ladangkei haoen thüka ashatlabü.

¹⁷Aishanga Choba setshang jenyua kibü San Shoushou haoeneibü sanlombou yinglabü hoba haoen langkei deipakshang to leilabü; hoba Mühghaüei haoeneibü nyek ka nyeksi pendou haman apbulabü.”