Read Chang Naga TANGKHITBÜ 8 Bible Online

TANGKHITBÜ 8 - Chang Naga bible

TANGKHITBÜ 8

¹Kheijinei ladang San Shoushouei nyetboubü amaaphilabü shangjinbü kho ipbei, angh tho thüng khuthüka ngüh alongko kikei.

²Mühghaü thedanga lobü khuthük hangangbü nyet kho ngei hapbei hoba haoen la teklaang nyet kukei.

³Kheijinei khuthük hangangbü lubü che loukei hoba lemshona lokei. Haoei haoeneibü jenjok phau che jungan Choba setshang thedanga kibü honeibü lemshona Mühghaü mütshuongei welaujinei lemla shanga hao la jen juongnyu kukei.

⁴Mühghaü mütshuong welau yoa khuthük hangangbüeibü ik ka jongsak wankhük kho Mühghaü thedang to angkei.

⁵Hobaje khuthük hangangbüei phau kho sungkei. Haoei kho lemshon kabü wanei shentikei hoba kaodak to tekyantikei; hoba khünei langmak hoba langh hoba langpon hoba selonyibü kikei.

⁶Kheijinei teklaang nyet jungbü khuthük hangangbü nyet khoei khübü metla lamlekei.

⁷Shaangbouei haoeibü teklaang metkei; hoba siiei khonan sen hoba wan longkei, hoba khübü kho kaodak to jonan koutikei. Kaodak phejan sem ka che lonkei, bunyu phejan sem ka che lonkei, hoba sang pendou lonan shembei.

⁸Khuthük hangangbü nyiboubüei haoeibü teklaang metkei; hoba wan longan kibü shongh yaangbü tegübü denche simaangto shemattikei. Yungnyu phejan sem ka che sii la yeikei,

⁹yungnyua kibü langkeibü meisiau phejan sem ka che haikei, hoba long phejan sem ka che leilukei.

¹⁰Khuthük hangangbü semboubüei haoeibü teklaang metkei; hoba wannyat tegü longan kibü khanshoulitshou yaangbü che atkei. Ho shumang phejan sem ka chenei hoba deipakshanga shatkei.

¹¹Khanshoulitshou kho, “Khauekbü” nyenkei. Hobaje dei phejan sem ka che khauekbü la yeikei, hoba dei khauekbü la yeisije kho deiei müt juongnyu haikei.

¹²Khuthük hangangbü leiboubüei haoeibü teklaang metkei; hoba chanyu phejan sem ka che hoba litnyu phejan sem ka che, hoba khanshoulitshou phejan sem ka che kakan apbei, hibü khoei khübü phejan sem ka che nakthühan apbei, hoba chalou phejan sem ka che, hoba nangnakkei phejan sem ka chenei ngesakbü akitei.

¹³Kheijinei ngei chühkei, hoba mühloma aulu che seengeiko ngüh yaangbüei lauko ditkei, “Khuthük hangangbü semei metla kibü lubü teklaang ngühlang shanga kaodaka kibü danshuong shanga, khonku, khonku, khonku!”