Read Chang Naga TANGKHITBÜ 9 Bible Online

TANGKHITBÜ 9 - Chang Naga bible

TANGKHITBÜ 9

¹Kheijinei khuthük hangangbü ngaobouei haoeibü teklaang metkei; hoba khuthük ka kaodak to atbü khanshoulitshou che ngei hapbei. Hobaje khanshoulitshou kho la thonshang akibü püngkhün koukhin kukei.

²Haoei thonshang akibü püngkhün kho ipbei, hoba khüka wanlong yaangbü kabü wankhük tegü wankhük longkei; püngkhün kabü wankhük khoei chanyu si yei nakthühtham apbei.

³Wankhük khüka kaodak to koksüng longkei, hoba haoen la kaodakbü sinkip la tegü hau kukei.

⁴Kaodak sang ayingsi sangtüngbü peisilei ayingsi bunyu ai khon asaktilabü, lausikei aoyoueibü khüngjaa Mühghaüei amaaphilabü shangjinbü aki, khübü shuong ong khonsaktila haoen la lenkei.

⁵Haoen haitila aying lausikei lit ngao shanga khonkutila haoen la sakkukei. Haoenei kulabü khonku kho sinkipei müt to takjinei lai ong khonsakda kho phatko kilabü.

⁶Khübü chaloua mütshuongei haibü lamlabü lausikei kho ühüplabü; haoenei haimang sühlabü, lausikei haibüei haoen apyolabü.

⁷Koksüng shuong kho chühla wapyola lamlean kibü koli shuong tegü kikei; haoeneibü khua honeibü khun phatko kikei, hoba haoeneibü thenyek kho müteibü thenyek phatko kikei.

⁸Haoen la yaksaeibü khulou tegü kikei, hoba haoeneibü hauh kho molosaonyueibü hauh tegü kikei.

⁹Haoeneibü khükhom kho nameibü khükhom tegü kikei, hoba haoeneibü kaak langh kho lason to laangbü koli juongnyuei senan haubü kailong langh tegü kikei.

¹⁰Sinkip tegü haoen to mei hoba lüh kikei, hoba lit ngao sühko mütshuong khonkutilabü sei haoeneibü meia kikei.

¹¹Thonshang akibü püngkhün hangangbü kho haoeneibü Choba kikei. Haoeibü nyen kho Ibri ngüha Abaddon hoba Grik ngüha Appolion, tetlabü Shemtibou.

¹²Shaangbou khonku kho dana; ho phaito lubü khonku penyi louada.

¹³Kheijinei khuthük hangangbü lakboubüei haoeibü teklaang metkei; hoba Mühghaü thedanga kibü honeibü lemshon chemnyek lei ka ngüh che ngei ditkei.

¹⁴Ngüh khoei teklaang jungan kibü khuthük hangangbü lakboubü khüto laukei, “Efrata shumang yaangbüa khinlepan kibü khuthük hangangbü lei kho litiashi.”

¹⁵Jihsiphai, chalou, lit hoba po shanga lamlean phobü khuthük hangangbü lei kho khunak shousi phejan sem ka che haitila shanga litikei.

¹⁶Hobaje koli daka setbü lühbak milion saoan kiteikei.

¹⁷Ngei mangsanga khübü koli hoba khonei setbü shuong hapbei; haoenei khükhom la wan tegü saklangbü, mühsak hoba sulfur tegü semjeibü lekei. Koli shuongeibü khu molosaonyu khu tegü yembei, hoba haoeneibü sembung ka wan, wankhük hoba wansat moli longkei.

¹⁸Haoeneibü sembung ka angbü wan, wankhük hoba wansat moli, khübü khonku sem khoei kaodaka kibü müt phejan sem ka che shemtikei;

¹⁹aishanga koli shuongeibü sei kho haoeneibü sembunga hoba meia kikei. Haoeneibü khuyembü mei kho pinyu tegü kikei, hoba khübüei haoenei khonsaktikei.

²⁰Khübü khonsakei ühaitiko joubü khunak shousi shuongei haoeneibü ikei kümbü ka maangpon asepei, lausikei shabü soushou shuong hoba chühla, ditla hoba paila athükbü honeibü heangsho, chandinam, chinam, laang hoba bu lemyokei.

²¹Haoenei müt haitibü, seibütakbü, asangalan hoba kokbü ka maangpon asepei.