Read Chang Naga RUT 2 Bible Online

RUT 2 - Chang Naga bible

RUT 2

¹Tou Naomi saoei chempen che nyaksinam juong kibü müt che saoeibü lao Elimelekeibü you jungka kikei, haoeibü nyen Boaz.

²Hobaje Moabbü sao Rutei Naomi to laukei, “Ngo sek to koukho hoba ao thedanga ngei onou haplaje hao phai ka youman atbü hekho.”

³Hobaje sao meimeijung koukei hoba seka youlatbü phainei haoenei atbü youman heko paikei. Thu maiko sao Elimelek chempen Boazeibü sek to kouto haükei.

⁴Hobaje chühashi, Boaz Bethlehem ka loukei hoba youlatbü shuong to laukei, “BUNYUBOU kan yoa kishi!” Hobaje haoenei hao to jongaikei, BUNYUBOUei no haükushi!

⁵Kheijinei Boazei youlatbou ikjaibou to laukei, “Ho aoeibü yaksa nashou?”

⁶Hobaje youlatbü shuong ikjaibouei hao to jongaiko laukei, “Ho Moab kaodak ka Naomi yoa longeibü Moab sao ki.

⁷Hobaje saoei laukei, ‘Ngei ka to sudajada, youlatbü phainei youthep yoa youman atbü heshaitikai.’ Hibü sao louan longche chem to ngaibü to liman ngeyang ka chasem sühko hedanglekei.”

⁸Kheijinei Boazei Rut to laukei, “Kü shou nyi ho ditashi, müeibü sek to youman hela tohau ayingsi haka tebang, lausikei ngeibü samnyu shuong nyangko kishi.

⁹Haoenei latjung danbü seka kaibü nyek theashi hoba haoen phai to haushi. Heshou shuong to haoenei ka to ameitila ngei ngühkhüm kua. Hobaje no ladang dei lalaje dei jephot to hauan heshou shuongei khubü dei yungshi.”

¹⁰Kheijinei saoei saoeibü the khümbei hoba sao lolo kaoa khüpetan hao to laukei, “Ngo yenbou sao che yingan nyi kü to maangshiklabü lele aila ngo ka thedanga onou hapbei?”

¹¹Hobaje Boazei sao to jongaiko laukei, “Nyi kaibü lao haian phaia laoeibü nyu to nyi kümbü hoba lai kaibü nyusibou hoba jembü bukbü kaodak apyoan nyi shangied angebü mütshuong jungto loubü pendou shangabü kü la maisho lena.

¹²BUNYUBOUei kaibü kümsilei muko kushi, hoba Israel Mühghaü BUNYUBOU, aoeibü kaakphanga hula no loukei, haoei ka la jongsak souko kushima!”

¹³Kheijinei saoei laukei, “Ngeibü BUNYUBOU, nyi kü to aeibou onouda, aishanga nyi ngo senyühshemtia hoba ngo kaibü sambü sao to aei onouko joyoa.”

¹⁴Hobaje shaubüyungbü jiha Boazei sao to laukei, “Hato kaiya, hoba shauashi, hoba kaibü shausiyung haijepbüa hamashi.” Hobaje saoei youlatbü shuong yoa setkei, hoba haoei sao la youshou ngoubü kukei, hoba saoei photko shauankei joukei.

¹⁵Hobaje tokei ladang sao youman atbü hela haula meimeikei Boazei haoeibü heshou shuong la sakkuko laukei, “Sao la youthep yokakei küntiashi, hoba sao tethanget.

¹⁶Tokei youthep ka sao shanga youshen at sungenashi hoba kho phokushi, hoba sao la yoshaitiashi hoba sao to tehak.”

¹⁷Hobaje chasem sühko saoei seka youman atbü hekei, hoba saoei yoshaibü younet kho barli youshou takyang che thüng kikei.

¹⁸Hobaje saoei kho künan sangnyu to atkei, hoba saoeibü laoeibü nyuei saoei ai yoshaikei kho hapbei. Tokei Rutei saoei photko shauan joubü künbaan sao la kukei.

¹⁹Hobaje saoeibü laoeibü nyuei sao to laukei, “Tat nyi youman atbü laka hekei? Hobaje no aoeibü seka khüpkei? No aoei thounoukei hao haübou yingshi!” Kheijinei sao aoyoa kümbeileikei, kho saoei saoeibü laoeibü nyu la lenkei hoba laukei, “Tat kü yoa kümbou müt khoeibü nyen Boaz.”

²⁰Hobaje Naomiei saoeibü shoueibü yak to laukei, “BUNYUBOU aoei langkibü si haibü ham ka haoeibü onou asungngaida, hao haübou yingshi.” Hobaje Naomiei sao to laukei, “Müt kho sen chempen hoba seneibü youjungtham nai.”

²¹Kheijinei Moabsao Rutei laukei, “Haü, haoei kü to aeila leko laukei, ‘Haoenei ngeibü sek alatkhüm shongko no ngeibü youlatbü shuong yoa yangshi.’ ”

²²Hobaje Naomiei saoeibü shoueibü yak Rut to laukei, “Küshou nouyangnyu, müeibü seka haoenei ka to ameitilabü lele no haoeibü sambü sao yoa khüpbü kho maibou.”

²³Hibü barli youshou si whet youshou alatkhüm shongko youman atbü heshaila Boazeibü sambü sao shuong yoa aeibou paplepan khüpbei, hoba saoeibü laoeibü nyu yoa sao kikei.