Read Chang Naga RUT 3 Bible Online

RUT 3 - Chang Naga bible

RUT 3

¹Nyetche Naomiei shoueibü yak to laukei, “Küshou, no maanghaiko kilabü lele ngei ka shanga chem che lambukho no?

²Tou Boaz, aoeibü sambü sao shuong yoa no kikei, hao seneibü chempen ayingsi? Chühashi, tao nyi amshanga haoeibü barli youshou siplabü.

³Hibü no lolo sakteisaopoan onang naangashi hoba kaibü neisimei maiboutham lean, amshang to no yanashi, lausikei hao ashauayungkhüm shongko nyi no lolo müt khola tengeti.

⁴Hobaje ladang hao yeplaje nyi hao yepshang chühletnyu phoshi hoba no atashi, hoba haoeibü you waan apbushi hoba yepashi, hoba nyi ai kümla kho haoei ka la lenlabü.”

⁵Hobaje Rutei jongaikei, “Nyi lenbü pendou ngei kümlabü.”

⁶Hibü sao amshang khüto yankei hoba saoei laoeibü nyuei lenbü tegü pendou kümbei.

⁷Hobaje ladang Boaz shaukei yungkei hoba olinko kikei, haoei yepshang thonbü junga yepla haukei, kheijinei Rut hangsho loukei hoba haoeibü you waan sao khünei yepbei.

⁸Hobaje methu- phanga müt kho mokkei hoba hao lolo sepeikei hoba chühashi, hao junga yaksa che yepan kikei.

⁹Hobaje haoei laukei, “No ao?” Hobaje saoei jongaikei, “Ngo kaibü samnyu Rut; hibü kaibü samnyu la kaibü shembe nei seikushi, aishanga kaibü thenbou nyangbü che ki.”

¹⁰Hobaje haoei laukei, “Küshou, BUNYUBOUei no haükushi, shalebü yingsikei, keibü yingsikei nyi heshou shuong phai asembü danko khangbü toje tou thonlama nyi kü to onou aei lena.

¹¹Hobaje tou küshou, no tehüt, nyi phebü pendou ngei ka la kümbulabü, aishanga ngeibü mütli sangnyua kibü pendouei no mubü yaksa che dogo ngekei.

¹²Hobaje chempen dogo laubü kho tükde; lausi dogokei kütokei nyangbou chempen che kia.

¹³Taoje kiteishi, ngeyang ong ngelabü, haoei ka to chempen haangei louan kümalonga maiakei, haoei ka to chempen phejan kümsilei akümlonga, BUNYUBOU lang kiabuba ngei ka to chempen phejan kümlabü, lang angeshongko hanei yepshi.”

¹⁴Hobaje langngeko sao hao yoa yepbei hoba sao langngesaoko kijinei pikei, aishanga saoei laukei, “Yaksa che amshang khüto loukei dogo angetilabü.”

¹⁵Hobaje haoei laukei, “Nyi yukan kibü yukjin sungba hoba kho hatlepashi.” Hobaje saoei kho hatlepbei hoba barli youshou tak- yang lak takkuan sao la khünei jinkukei, hoba sao sangnyu to haukei.

¹⁶Hobaje ladang Rut saoeibü laoeibü nyu jungto loukei, saoei laukei, “Küshou nouyangnyu, no laibü?” Kheijinei saoei müt khoei kümbü pendou lenkei.

¹⁷Hobaje saoei laukei, “Barli youshou takyang lak ho haoei kü la kukei, aishanga haoei laukei, ‘Kaibü laoeibü nyu chem to no ikkong ohaujan.’ ”

¹⁸Kheijinei saoei laukei, “Dambü lai haüthükjung loula kho nyi ange shongko sangsembo kishi, aieilausi kümsilei kho tat ayeishongko müt kho khei ongje akilabü.”