Read Chang Naga RUT 4 Bible Online

RUT 4 - Chang Naga bible

RUT 4

¹Tou Boaz sangnyu bakhün to angan khünei setkei, hoba chühashi, haoei chempen ao shanga laukei, hao louko kikei. Hibü Boazei laukei, “Hai, no kho hato kaishima; hoba hanei setashi,” hoba hao louan setkei.

²Hobaje sangnyubü jaishou müt an leian louan laukei, “Kan hanei setshima,” hoba haoen setkei.

³Hobaje haoei haoeibü chempen to laukei, “Naomi ao Moab kaodak ka sepeijung longeikei, saoei seneibü jaisina Elimelekeibü kaophai yakkho lauda.

⁴Hibü ngei ka to hai laukho dogo dambei. Hanei setan kibü thedanga hoba ngeibü mütli jaishou thedanga kho jekashi. Nyi kho jekngaikho laualonga jekngaiashi, lausikei nyi kho tejekngaikho dogo laualonga ngei ngelabü lele kü la lenshi; aieilausi ka to liman kho jekngaila ao aki, hoba kaphainei ngo ong.” Hobaje haoei laukei, “Ngei kho jekngailabü.”

⁵Kheijinei Boazei laukei, “Nyi ai chaloua Naomi hoba Ruteibü ik ka sek jekda kho yoa haibüeibü nyen haoeibü phet yoa weeilabü lele haiboueibü yak nyi jekngaijan.”

⁶Kheijinei haoeibü chempen khoei laukei, “Kü shangabü phet leilubüla kü shanga ngeije ho jekngaila athük, ngei jekngaibü thüng kho nyi leashi, aishanga ngei kho jekngaila athük.”

⁷Tou jekngaiyobü hoba jeiyobü Israelbü yoa shangiedbü song hai kikei, namyak tükde dogo laula shanga müt cheei ngok hangletan haoei kho lubü la kulabü hoba ho shangied Israelbü aukabü leyobü song kikei.

⁸Hibü chempen khoei Boaz to laukei, “Kho nyi jekashi,” hoba haoei haoeibü ngok hangletnyu apbei.

⁹Hobaje Boazei jaishou shuong hoba mütli to laukei, “Elemelek shangabü pendou hoba Malon si Chilon ham shangabü pendou Naomieibü ik ka ngei jeka dogo tat kan aukabü kia.

¹⁰Kho to limbo haibou nyen haoeibü phet yoa kila hoba haiboueibü nyen haoeibü jaisina yoka hoba hao kishang bakhün ka abangtila Maloneibü yak Moab sao Rutkei yakla lela ngei jeka, tat kan aukabü ki.”

¹¹Hobaje bakhüna kibü müt hoba jaishou pendouei laukei, “Kün aukabü kia. Kaibü ik to lotlabü yaksa kho Rachel si Lea, aoyouei Israel phang huongena haosi phatko BUNYUBOUei yeitishi, hoba no Efrataa naangmaishi, hoba Bethlehema yaangenshi.

¹²Hobaje BUNYUBOUei ka la kubü ho medei lilabü ka Perez chemdang ao Tamar ka Jihuda pakkei kho phatko kaibü chemdang kitishima.”

¹³Hibü Boazei Rut lekei, hoba sao yakla yeikei, hoba hao sao jungto atkei hoba BUNYUBOUei sao mang akongko aptikei, hoba saoei bousu shou che bukkei.

¹⁴Hobaje yaksa shuongei Naomi to laukei, “BUNYUBOU aoei tat ka chempen che ongkei apyoan aphoku, hao sangashi, hoba Israela haoeibü nyen hangentiashi.

¹⁵Hao langkei khümenbou hoba no noushou lama haangngaitibü che kilabü; aishanga kashoueibü yak aoei no sanouda hoba ao ka thedanga bousushou nyet to khaibou ki saoei hao bukkei.”

¹⁶Kheijinei Naomiei nashou kho tonjung louan saoeibü khukua tonkei hoba sao kho thuinyu la yeikei.

¹⁷Hobaje saoeibü chempen yaksa shuongei hao la nyen che kuko laukei, “Naomi la bousu shou che bukkuakei,” hoba haoenei haoeibü nyen Obed nyenkei, hao Dawideibü bou Jesseeibü bou ki.

¹⁸Tou habü ho Perez ka pakbü ki. Perez ka Hezron pakkei,

¹⁹Hezron ka Ram pakkei hoba Ram ka Amminadab pakkei.

²⁰Amminadab ka Nashon pakkei, hoba Nashon ka Salmon pakkei.

²¹Salmon ka Boaz pakkei hoba Boaz ka Obed pakkei,

²²hoba Obed ka Jesse pakkei hoba Jesse ka Dawid pakkei.