Read Chang Naga 1 SAMUEL 1 Bible Online

1 SAMUEL 1 - Chang Naga bible

1 SAMUEL 1

¹Tou Efraim shongh kaodak kabü Ramathaim ka Zofbü müt che kikei, hoba haoeibü nyen Elkana kikei; hao Jerohameibü shou hoba hao Efraimbü Zufeibü shou Tohu hoba Elihueibü shi kikei.

²Haoei yak müt nyi kikei, cheeibü nyen Hanna hoba lubü cheeibü nyen Penina; hoba Peninaei shousi kikei, lausikei Hannaei shousi aki.

³Hobaje kho po weko sangnyu ka Shiloa lakjaibou Thükenbou BUNYUBOU jungto lemla hoba lembü kula angkei. Hobaje Elieibü shou müt nyi Hofni si Finehas BUNYUBOUeibü ungshedbou khünei kikei.

⁴Hobaje Elkanaei lembü kubü chalou sühjinei, haoei haoeibü yak Penina hoba saoeibü bousu shou si yaksa shou la phejan kukei.

⁵Lausikei Hanna laje phejan penyi thüng kukei; aishanga haoei Hanna to sanoukei, lausikei BUNYUBOUei saoeibü nasetshang khinkukei.

⁶Hobaje saoeibü maangjamnyuei sao nyamnyamtiko khauangtikei, aieilausi BUNYUBOUei saoeibü nasetshang khinkukei.

⁷Hobaje kho tegü Elkanaei po weko kümbei, ladang ong sao BUNYUBOUeibü chem to angkei, haubü weko Peninaei sao maangto shattikei, hibü sao haapbei hoba ashauayung.

⁸Hobaje saoeibü lao Elkanaei sao to laukei, “Hanna, no aila haapda? Hobaje no aila ashau ayungda? Hobaje kaibü maang- pon aila ngangko ong kida? Bousushou an tokei ka thedanga ngo khaibou aying lo?”

⁹Hibü Shiloa haoen shauan yungan phaia Hanna meimeikei. Tou ungshedbou Eli BUNYUBOU lembüchem kouthung nyangko hao setshanga setan kikei.

¹⁰Hobaje sao soushoua ngühko kikei hoba BUNYUBOU to welaukei, hoba aeibou haapbei.

¹¹Hobaje saoei thebülanbü che lekei, hoba laukei, “O Thükenbou BUNYUBOU, nyi maimaitham kaibü samnyu aaola lebü to chühalonga hoba ngo damenalonga hoba kaibü samnyu amaalonga, lausi tokei kaibü samnyu la bousu shou che kualonga kheijinei haoeibü langkei salang pendou BUNYUBOU la ngei kulabü hoba haoeibü khua khujin ajinkulabü.”

¹²Hobaje saoei BUNYUBOU to athakko lounyu welaujinei saoeibü sembung Eliei chühenkei.

¹³Tou Hanna saoei saoeibü maanga joyokei, saoei sembungkhop ong topeikei, lausi saoeibü ngühje adit. Hibü sao ihei jaakkei dogo Eliei dambei,

¹⁴hoba Eliei sao to laukei, “No lalokche ihei jaakan kila?”

¹⁵Hobaje Hannaei jongaiko laukei, “Aying, ngeibü BUNYUBOU, ngo soushoua maangngangbü yaksa che ki; ngei ih ayingsi nyakidei ayung, lausikei BUNYUBOU thedanga ngei ngeibü soushou haakletnyu phokukei.

¹⁶Kaibü samnyu Belial nouyangnyu che tegü teweima; aishanga tou sühko maangthon hoba maangngangbü juong ka ngei joyoa.”

¹⁷Kheijinei Eliei jongaiko laukei, “Haksoa haushi, hoba Israel Mühghaüei nyi hao ka hibü kaibü subüjabü sakkushima.”

¹⁸Hobaje saoei laukei, “No khangenbou ka thedanga onou haptishima.” Kheijinei yaksanyu kho jembü lam to haukei, hoba shaukeiyungkei hoba saoeibü thenyek touje maangmau akitei.

¹⁹Hobaje haoen ngeyang enyu pikei hoba BUNYUBOU to lembei hoba sepeikei, hoba haoeneibü chem Rama to loukei, hoba Elkanaei jembü yak ngekei, hoba BUNYUBOUei sao damenkei.

²⁰Hobaje ladang jih sühjung loukei. Hanna mang akongko apbei hoba bousushou che bukkei hoba saoei haoeibü nyen Samuel dogo nyenkei, aieilausi saoei laukei, “Ngei hao BUNYUBOU ka hikei.”

²¹Elkana hoba hao chemdang pendou po weko haitibü lembü hoba takletbü lemla angkei.

²²Lausikei Hannaje üang; aishanga saoei hao lao to laukei, “Shou in athon shongko ngo üanglabü, hoba kho phaia ong hao BUNYUBOU thedangto longlabü hoba khünei ponpen kila shanga ngei hao leian loulabü.”

²³Hobaje saoeibü lao Elkanaei sao to laukei, “Ka la maibü che leshi, nyi hao in athon shongko haiteishi; BUNYUBOUei ong haoeibü ngüh haüthüktishima.” Hibü yaksa khoei haisühkei hoba saoei hao aching shongko saoeibü bousushou kho senyopbei.

²⁴Hobaje ladang hao saoei sen aptikei, saoei sao yoa masu pongsu sem hoba wen efa che hoba ih jephot che künan Shiloa BUNYUBOUeibü chem to hao leian loukei, hoba shou kho toukei nashou ong kikei.

²⁵Hobaje haoenei masu pongsu haitikei, hoba shou kho Eli jungto leian loukei.

²⁶Hobaje saoei laukei, “O ngeibü bunyubou, no lang kisije ngeibü bunyubou, BUNYUBOU to welauko hanei ka junga loan kibü yaksanyu kho ngo ki.

²⁷Ho shou shanga ngei welaukei, hoba BUNYUBOUei ngei hao ka hibü ngeibü subüjabü kü la kuan kia.

²⁸Hibü ngeikei hao BUNYUBOU la kuda, hao lang kishongko hao BUNYUBOU la kuda.” Hobaje khünei haoenei BUNYUBOU to lembei.